ଆଣ୍ଠୁଏ ଖାଲ, ରାସ୍ତାରେ କାଦୁଅ ପଚପଚ ! ଅମ୍ବୁଲାନ୍ସ ବି ଅଟକି ଯାଉଛି…

ବଲାଙ୍ଗିର: ଆଣ୍ଠୁଏ ଖାଲ, ରାସ୍ତାରେ କାଦୁଅ ପଚପଚ । ଏପରିକି ଜରୁରୀକାଳୀନ ସେବାରେ ନିୟୋଜିତ ଥିବା ଡାକ୍ତରଖାନା ଗାଡ଼ି ମଧ୍ୟ ରାସ୍ତାରେ ଅଟକି ରହୁଛି । ଆମେ କହୁଛୁ ବଲାଙ୍ଗିର ଜିଲ୍ଲା ପୁଇଁନ୍ତଳା ବ୍ଲକ ଜାମଗାଁ-ସାତମାଇଲ ରାସ୍ତାର ଅବସ୍ଥା ।

ରାସ୍ତା ମଝିରେ ଫସିରହୁଛି ଆମ୍ବୁଲାନ୍ସ । ବର୍ଷା ହେଲେ ଏହା ହେଉଛି ଏହି ଅଞ୍ଚଳର ନିତିଦିନିଆ ଘଟଣା । ଗତ ବର୍ଷ ବନ୍ୟାରେ ଧୋଇ ଯାଇଥିଲା ରାସ୍ତା । ହେଲେ ଏହାକୁ ବର୍ଷେ ବିତିଯାଇଥିଲେ ବି ମରାମତି ହୋଇପାରି ନାହିଁ । ବଲାଙ୍ଗିର ପୁଇଁନ୍ତଳା ବ୍ଲକ ଜାମଗାଁ-ସାତମାଇଲ ରାସ୍ତା । ଅସରାଏ ବର୍ଷା ହେଲେ ରାସ୍ତାର ଏହି ସ୍ଥାନରେ ପାଣି ଜମି ରହିବା ସହ ଖାଲଖମା ସୃଷ୍ଟି ହୋଇଛି । ଫଳରେ ଜାମଗାଁ-ସାତମାଇଲ ରାସ୍ତାରେ ଯାତାୟାତ କରୁଥିବା ଯାନବାହନ ଗୁଡିକ ରାସ୍ତାରେ ଥିବା ଖାଲରେ ପଡ଼ିରହୁଛି । ବାରମ୍ବାର ଗୁହାରି କରିବା ପରେ ବି ପ୍ରଶାସନ ପକ୍ଷରୁ ସମାଧାନ କରାଯାଉନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।

ଜାମଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ସମେତ ଆଖପାଖ ଅଞ୍ଚଳର ଗ୍ରାମବାସୀମାନେ ସ୍ୱାସ୍ଥ୍ୟସେବା ସମେତ ଅନ୍ୟାନ୍ୟ କାମ ପାଇଁ ଏହି ରାସ୍ତା ଦେଇ ଯାତାୟତ କରଥାନ୍ତି । ତେବେ ଜାମ ଗାଁ ନିକଟରେ ରାସ୍ତା ଉପରେ ରହିଥିବା ଖାଲଖମା ଯୋଗୁଁ ଲୋକେ ନାହିଁ ନଥିବା ଅସୁବିଧା ଭୋଗୁଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ତେବେ ବିଡିଓଙ୍କୁ ଘଟଣା ସଂପର୍କରେ ପଚରାଯିବାରୁ ତଦନ୍ତ ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ସେ କହିଛନ୍ତି ।

(ଦୀପକ ପୁରୋହିତ)