ପଦାରେ ପଡ଼ିଲା ତିର୍ତ୍ତୋଲ ବିଜେପିରେ କନ୍ଦଳ, ବୈଠକ ବେଳେ ଅସନ୍ତୁଷ୍ଟ କର୍ମୀଙ୍କ ଭଙ୍ଗାରୁଜା
ଜଗତସିଂହପୁର: ଉପନିର୍ବାଚନ ଭୋଟ୍ ପୂର୍ବରୁ ତିର୍ତ୍ତୋଲ ବିଜେପିରେ ତେଜୁଛି ବିବାଦ । ପ୍ରଥମେ ଟିକେଟକୁ ନେଇ ଅସନ୍ତୁଷ୍ଟଙ୍କ ରାଜ୍ୟ ବିଜେପି ଉପସଭାପତି ଭୃଗୁ ବକ୍ସିପାତ୍ରଙ୍କ ଗାଡ଼ିକୁ ପଥରମାଡ଼ ଆଉ ଏବେ ବୈଠକ ବେଳେ ଭଙ୍ଗାରୁଜା । ଗୋଟିଏ ପରେ ଗୋଟିଏ କନ୍ଦଳ ତିର୍ତ୍ତୋଲ ବିଜେପିର ମୁଣ୍ଡବିନ୍ଧା ବଢ଼ାଇ ଦେଇଛି । ଆଜି ପୁଣିଥରେ ତିର୍ତ୍ତୋଲ ବିଜେପିରେ ଗୋଷ୍ଠୀ କନ୍ଦଳ ଦେଖିବାକୁ ମିଳିଛି ।
ବିଜେପି କର୍ମୀ ବୈଠକରେ ଭଙ୍ଗାରୁଜା କରିଛନ୍ତି ଅସନ୍ତୁଷ୍ଟ ବିଜେପି କର୍ମୀ । ତିର୍ତ୍ତୋଲ ନିର୍ବାଚନ ମଣ୍ଡଳୀର ଗୋଟିଏ ମଣ୍ଡପରେ ଦଳର ରାଜ୍ୟ ଉପସଭାପତି ଭୃଗୁ ବକ୍ସିପାତ୍ର ଦଳୀୟ କର୍ମୀଙ୍କ ସହ ଆଲୋଚନା କରୁଥିବା ବେଳେ ଧସେଇ ପଶିଥିଲେ ଅସନ୍ତୁଷ୍ଟ ବିଜେପି କର୍ମୀ । ଗାଳିଗୁଲଜ କରିବା ସହ ଚେୟାର ଟେବୁଲ ଭାଙ୍ଗିବା ସହ ଦଳୀୟ ବ୍ୟାନର ଚିରି ଦେଇଥିଲେ ।
ବୈଠକରେ ଭଙ୍ଗାରୁଜା କରି ଫେରାର ହୋଇଯାଇଛନ୍ତି ଅସନ୍ତୁଷ୍ଟ କର୍ମୀ (ଦୁର୍ବୃତ୍ତ) । ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ପଚରାଉଚରା ଜାରି ରଖିଛି । ଏ ସମ୍ପର୍କରେ କ୍ୟାମେରା ସାମ୍ନାରେ ବିଜେପି କର୍ମୀ ଓ ନେତା କିଛି କହିବାକୁ ରାଜି ନାହାନ୍ତି । ଗତ ସପ୍ତାହରେ ଭୃଗୁ ବକ୍ସିପାତ୍ରଙ୍କ ଗାଡ଼ି ଉପରକୁ ବି ପଥରମାଡ଼ କରିଥିଲେ ।
