ଫାଇଜର ପରେ ମୋଡେର୍ଣ୍ଣା ଟିକାକୁ ଅନୁମତି ଦେଲା ଆମେରିକା
1 min read
ଓ୍ୱାସିଂଟନ୍: କରୋନା ଭାଇରସ୍ ସହ ଲଢ଼େଇରେ ଆମେରିକା ଜୋରଦାର ପ୍ରସ୍ତୁତି କରୁଛି । ଗୋଟିଏ ପରେ ଗୋଟିଏ ପାଦ ଆଗେଇ ଚାଲିଛି । ପୂର୍ବରୁ ଫାଇଜର ଭ୍ୟାକ୍ସିନ୍କୁ ଜରୁରୀକାଳିନ ପରିସ୍ଥିତିରେ ବ୍ୟବହାର ପାଇଁ ଅନୁମତି ମିଳିସାରିଥିବା ବେଳେ ଏବେ ଆଉ ଏକ କରୋନା ଭ୍ୟାକ୍ସିନ୍କୁ ଅନୁମତି ମିଳିସାରିଛି । ଶୁକ୍ରବାର ମୋଡେର୍ଣ୍ଣା ଭ୍ୟାକ୍ସିନକୁ ମଧ୍ୟ ଆମେରିକା ଜରୁରୀକାଳୀନ ବ୍ୟବହାର କରିବାକୁ ଅନୁମତି ଦେଇଛି । ଏବେ ଉଭୟ ଭ୍ୟାକ୍ସିନ୍ର ଫଳାଫଳ ଆସିବାକୁ ବାକି ଅଛି । କିନ୍ତୁ ଏବେ ସୁଦ୍ଧା ମିଳିଥିବା ରିପୋର୍ଟ ଅନୁଯାୟୀ ଉଭୟ ଟିକା ନିରାପଦ ମନେ ହେଉଛି । କରୋନା ମହାମାରୀ ଦ୍ୱାରା ଆମେରିକା ବିଶ୍ୱରେ ସର୍ବାଧିକ ପ୍ରଭାବିତ ହୋଇଥିବା ଦେଶ ।
ଆମେରିକାର ଖାଦ୍ୟ ଏବଂ ଔଷଧ ପ୍ରଶାସନର ଅନୁମୋଦନ ପରେ ସୋମବାରଠାରୁ ମୋଡେର୍ଣ୍ଣା ଟିକା ଆରମ୍ଭ ହୋଇପାରେ । ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ହେଲଥ୍ ସହଯୋଗରେ ମୋର୍ଡେନା ଏହି ଟିକା ପ୍ରସ୍ତୁତ କରିଛି । ବିଶେଷ କଥା ହେଉଛି ଏହି ମୋର୍ଡେନା ଟିକା, ଫାଇଜର ଏବଂ ବାୟୋଏନ୍ଟେକ୍ ଟିକା ସହିତ ପ୍ରାୟ ସମାନ ।
ମିଳିଥିବା ସୂଚନା ଅନୁଯାୟୀ, ମୋଡେର୍ଣ୍ଣା ଟିକା ଅତ୍ୟଧିକ ଥଣ୍ଡା ତାପମାତ୍ରା ଆବଶ୍ୟକ କରେ ନାହିଁ । ଏହି କାରଣରୁ ଏହାକୁ ପରିଚାଳନା କରିବା ଫାଇଜର୍ ତୁଳନାରେ ସହଜ ହୋଇପାରେ । ଏକ ସରକାରୀ ବିବୃତ୍ତି ଅନୁଯାୟୀ, ଏଫଡିଏ ଜାଣିବାକୁ ପାଇଛି ଯେ, ମୋଡେର୍ଣ୍ଣା କୋଭିଡ-୧୯ ଟିକା ଜରୁରୀକାଳୀନ ପରିସ୍ଥିତିରେ ବ୍ୟବହାର ପାଇଁ ସମସ୍ତ ବୈଧାନିକ ମାନଦଣ୍ଡ ପୂରଣ କରିଛି । ଏକ ଗଣମାଧ୍ୟମ ସଂସ୍ଥାକୁ NIH ନିର୍ଦ୍ଦେଶକ ଡକ୍ଟର ଫ୍ରାନ୍ସିସ୍ କଲିନ୍ସ କହିଛନ୍ତି ଯେ, ଉଭୟ ଟିକା ଆଶାଠାରୁ ଅଧିକ ଭଲ କାମ କରୁଛି ।
