ଭଦ୍ରକ: ଜାଲରେ ପଡିଲା ୫ ଟନରୁ ଅଧିକ ମାଛ । ଅନଲୋଡ କରିବାକୁ ଲାଗିଲେ ଶହେ ଜଣ ମତ୍ସ୍ୟଜୀବୀ । ଏମତି ଦୃଶ୍ୟ ଦେଖିବାକୁ ମିଳିଛି ଭଦ୍ରକ ପୁରୁଣା ଧାମରା ଜେଟିରେ । ଜେଟିରେ ଏକ ଟ୍ରଲର ଲାଗିଥିଲା । ଏକାଥରକେ ଏତେ ମାଛକୁ ଦେଖିବାକୁ ଲୋକେ ଭିଡ ଜମାଇଥିଲେ । ଜାଲରେ ଥିବା ମାଛ ଗୁଡିକ ଇଲା ମାଛ ହୋଇଥିବାବେଳେ ଗୋଟିକର ଓଜନ ପ୍ରାୟ ୩ ଶହ ଗ୍ରାମ ଥିବା ଜଣାପଡିଛି ।
ଜାଲରୁ ମାଛକୁ କାଢିବାକୁ ଶହେଜଣ ମତ୍ସ୍ୟଜୀବୀ ଲାଗିଥିଲେ । ଧାମରା ଅଞ୍ଚଳର ମାଲିକ ବିକି ମଣ୍ଡଳଙ୍କ ଇଲାବତୀ ଟଲର ଦୁଇଦିନ ପୂର୍ବେ ଧାମରାର ଗଭୀର ସମୁଦ୍ରକୁ ମାଛ ମାରିବାକୁ ଯାଇଥିଲା । ତେବେ ଜାଲରେ ହଠାତ ଏକାଥରକେ ଏତେ ପରିମାଣର ମାଛ ପଡିବା ପରେ ଏହାକୁ ନେଇ ମତ୍ସ୍ୟଜୀବୀ ଫେରି ଆସିଥିଲେ । ଏସବୁ ମାଛ କେଜି ପିଛା ଶହେରୁ ୧୫୦ଟଙ୍କାରେ ବିକ୍ରିହେବ । ଏହାକୁ ପଶ୍ଚିମବଙ୍ଗ ପଠାଯିବ ବୋଲି ଟ୍ରଲର ମାଲିକ କହିଛନ୍ତି ।
