ଆଗେଇବ ଆହାର କେନ୍ଦ୍ର: ପ୍ରଦାନ କରାଗଲା ୧୧କୋଟି ୧୭ ଲକ୍ଷ ଟଙ୍କା

ଭୁବନେଶ୍ବର: ମିଶନ ଶକ୍ତିଙ୍କ ଦ୍ବାରା ପରିଚାଳିତ ଆହାର କେନ୍ଦ୍ର ଅଭିଯାନକୁ ଆଗେଇ ନେବା ଲକ୍ଷ୍ୟରେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ୧୧କୋଟି ୧୭ ଲକ୍ଷ ଟଙ୍କା ପ୍ରଦାନ କରାଯାଇଛି । ୩୪ଟି ଜିଲ୍ଲା ଆହାର ସୋସାଇଟି ଓ ସିଟି ଆହାର ସୋସାଇଟିକୁ ୨୦୨୩-୨୪ ଆର୍ଥିକ ବର୍ଷର ଦ୍ବିତୀୟ କ୍ବାଟର ପାଇଁ ଏହି ଅର୍ଥ ପ୍ରଦାନ କରାଯାଇଛି ।

ରାଜ୍ୟରେ ବର୍ତ୍ତମାନ କାର୍ଯ୍ୟକ୍ଷମ ଥିବା ୧୬୭ଟି ଆହାର କେନ୍ଦ୍ରର ପରିଚାଳନା ପାଇଁ ଏହି ଅର୍ଥ ପ୍ରଦାନ କରାଯାଇଛି । ରାଜ୍ୟର ଗରିବ ଗୁରୁବା ଲୋକଙ୍କୁ ସୁଲଭ ମୂଲ୍ୟରେ ଖାଇବା ଯୋଗାଇଦେବା ଉଦ୍ଦେଶ୍ୟରେ ଆରମ୍ଭ ହୋଇଥିବା ଆହାର ଯୋଜନା ରାଜ୍ୟ ସରକାରଙ୍କ ଖାଦ୍ୟ ସୁରକ୍ଷା ଅଭିଯାନକୁ ସୁନିଶ୍ଚିତ କରିଛି । ସବୁ ପୌରାଞ୍ଚଳରେ କାର୍ଯ୍ୟକ୍ଷମ ଥିବା ଆହାର କେନ୍ଦ୍ରରେ ଦୈନିକ ଏକ ଲକ୍ଷ ଲୋକଙ୍କୁ ୫ଟଙ୍କାରେ ମଧ୍ୟାହ୍ନ ଭୋଜନ ମିଳୁଛି । ଭୋକିଲା ପେଟରେ କେହି ଶୋଇବେ ନାହିଁ, ଏହି ଅଭିମୁଖ୍ୟରେ କାର୍ଯ୍ୟ କରୁଛି ଆହାର କେନ୍ଦ୍ର । ଏହି ଅଭିଯାନରେ ଗୋଷ୍ଠି ସମ୍ପୃକ୍ତିକୁ ଉତ୍ସାହିତ କରିବା ପାଇଁ ସମସ୍ତ ୧୬୭ ଆହାର କେନ୍ଦ୍ର ଓ ୨୭ ଆହାର ରୋଷେଇଶାଳାର ପରିଚାଳନା ଦାୟିତ୍ବ ମିଶନ ଶକ୍ତିକୁ ପ୍ରଦାନ କରାଯାଇଛି । ଏଥିପାଇଁ ନଗର ଉନ୍ନୟନ ବିଭାଗ ସବୁ ପ୍ରକାର ସହାୟତା ଯୋଗାଇଦେଉଛି ।