ଗାଜା: ପୁଣି ରକ୍ତମୁଖା ଇସ୍ରାଏଲ । ଗାଜାର ଅଲ-ସିଫା ହସ୍ପିଟାଲରେ କଲା ଏୟାରଷ୍ଟ୍ରାଇକ । ଆକ୍ରମଣରେ ପ୍ରାଣ ହରାଇଛନ୍ତି ୧୫ ନାଗରିକ । ଆହତ ହୋଇଛନ୍ତି ୬୦ ଲୋକ । ଏପରିକି ଏକ ଆମ୍ବୁଲାନ୍ସକୁ ଇସ୍ରାଏଲ ମିସାଇଲ ହିଟ୍ କରିଥିବା ସୂଚନା ମିଳିଛି । ସେହିପରି ଗାଜାସ୍ଥିତ ଇଣ୍ଡୋନେସୀୟ ହସ୍ପିଟାଲ ଓ ଅଲ କୁଦୋଶ ହସ୍ପିଟାଲ ନିକଟରେ ବି ମିସାଇଲ ଷ୍ଟ୍ରାଇକ ହୋଇଛି ।
ଏହି ତିନୋଟିଯାକ ହସ୍ପିଟାଲରେ ପାଲେଷ୍ଟିନୀୟମାନେ ଚିକିତ୍ସିତ ହେଉଛନ୍ତି । ତେବେ ଇସ୍ରାଏଲ ଆଇଡିଏଫ ପକ୍ଷରୁ ହସ୍ପିଟାଲକୁ ଟାର୍ଗେଟ କରିବାକୁ ନେଇ ଚିନ୍ତା ପ୍ରକାଶ ପାଇଛି । ଗତମାସରେ ଗାଜାର ଏକ ହସ୍ପିଟାଲରେ ବଡଧରଣର ହମଲା ହେବା ପରେ ଆଜି ୩ଟି ହସ୍ପିଟାଲକୁ ଟାର୍ଗେଟ କରାଯାଇଛି । ଜେନେଭା ସମ୍ମିଳନୀର ରାଜିନାମାକୁ ଏହି ଏୟାରଷ୍ଟ୍ରାଇକ ଉଲ୍ଲଂଘନ କରୁଛି ବୋଲି ଅଭିଯୋଗ ହୋଇଛି ।
ସେପଟେ ବଡ଼ ଯୁଦ୍ଧ ଲାଗି ହେଜବୁଲ୍ଲା ମୁଖ୍ୟଙ୍କ ବଡ଼ ଆହ୍ବାନ । ଯୁଦ୍ଧରେ ଜୀବନ ଉତ୍ସର୍ଗ ଲାଗି ହେଜବୁଲ୍ଲା ମୁଖ୍ୟ ସୟଦ ହାସନ ନସରାଲ୍ଲା କର୍ମୀଙ୍କୁ ଦେଇଛନ୍ତି ଆହ୍ବାନ । ହମାସର ଯୁଦ୍ଧ ସମ୍ପୂର୍ଣ୍ଣ ଭାବେ ପାଲେଷ୍ଟାଇନ ଲାଗି ବୋଲି ସେ କହିଛନ୍ତି । ସେପଟେ ସାମୟିକ ଅସ୍ତ୍ରବିରତି ଲାଗି ଆମେରିକାର ପ୍ରସ୍ତାବକୁ ଅଗ୍ରାହ୍ୟ କରିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ।ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତ୍ୟାନାହୁଙ୍କ ସହ ଆମେରିକା ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ଯୁଦ୍ଧ ବନ୍ଦ ପ୍ରସଙ୍ଗରେ ଆଲୋଚନା କରିଥିଲେ ବି ବିଶେଷ ସଫଳତା ମିଳିନାହିଁ ।
