ଚେନ୍ନାଇ: ଚେନ୍ନାଇର ଏକ ମନ୍ଦିରରେ ମାୟିଲେରୁ ମହୋତ୍ସବ ଚାଲିଥିବା ବେଳେ କ୍ରେନ୍ ଖସି ପଡ଼ି ତିନି ଜଣଙ୍କ ମୃତ୍ୟୁ ହୋଇଛି । ୧୦ରୁ ଊର୍ଦ୍ଧ୍ବ ଲୋକ ଆହତ ହୋଇଛନ୍ତି । ସମସ୍ତ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଚେନ୍ନାଇର କେଲଭିଠି ଠାରେ ଘଟିଥିବା ଏହି ଅଘଟଣର ଭିଡିଓ ସାମ୍ନାକୁ ଆସିଛି।
ମଣ୍ଡିୟମ୍ମନ ମନ୍ଦିରରେ ମହୋତ୍ସବ ଚାଲିଥିବା ବେଳେ ହଜାର ହଜାର ଲୋକଙ୍କ ଭିଡ଼ ଜମିଥିଲା। ପାରମ୍ପରିକ ରୀତିନୀତି ମୁତାବକ ଲୋକମାନେ କ୍ରେନରେ ଲଟକି ଠାକୁରଙ୍କୁ ମାଳ ପିନ୍ଧାଇବାକୁ ଚେଷ୍ଟା କରୁଥିବା ବେଳେ କ୍ରେନଟି ଓଲଟି ପଡ଼ିଥିଲା। ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଥିବା ବେଳେ ୧୦ଜଣ ଆହତ ହୋଇଛନ୍ତି ।
ସେହି ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। କ୍ରେନ ଖସି ପଡ଼ିବା ପରେ ଲୋକମାନେ ଚିତ୍କାର କରି ଏଣେତେଣେ ଦୌଡୁଥିବାରୁ ଦଳାଚକଟ ଭଳି ପରିସ୍ଥିତି ଉପୁଜିଥିଲା ।
