ଦେଶରେ ୩୨ ବିଶ୍ବବିଦ୍ୟାଳୟ ନକଲି, ୟୁଜିସି ଜାରି କଲା ଲିଷ୍ଟ
ନନ୍ଦିଘୋଷ ବ୍ୟୁରୋ: ୟୁଜିସି ୨୦୨୬ ବର୍ଷ ପାଇଁ ପୂରା ଦେଶରେ ୩୨ଟି ନକଲି ବିଶ୍ବବିଦ୍ୟାଳୟର ଲିଷ୍ଟ ଜାରି କରିଛି । ଏହି ସଂସ୍ଥାଗୁଡିକ ବିନା ମାନ୍ୟତାରେ ଡିଗ୍ରୀ ଦେଉଥିବା ପ୍ରମାଣ ମିଳିଛି । ୟୁଜିସି ନିଜ ଓ୍ବେବସାଇଟରେ ଏହି ନକଲି ବିଶ୍ବବିଦ୍ୟାଳୟର ଲିଷ୍ଟ ଜାରି କରିବା ସହ ଛାତ୍ରଛାତ୍ରୀ ଏବଂ ଅଭିଭାବକଙ୍କୁ ଏମିତି ଶିକ୍ଷାନୁଷ୍ଠାନରେ ନାମ ନଲେଖାଇବାକୁ ପରାମର୍ଶ ଦିଆଯାଇଛି । ଏହି ଲିଷ୍ଟରେ ଦିଲ୍ଲୀରୁ ସର୍ବାଧିକ ବିଶ୍ବବିଦ୍ୟାଳୟ ରହିଛି । ଏଥିପାଇଁ ଦିଲ୍ଲୀରେ ରହି ପାଠପଢ଼ା ପ୍ରସ୍ତୁତି କରୁଥିବା ଛାତ୍ରଛାତ୍ରୀଙ୍କୁ ସତର୍କ ରହିବାକୁ କୁହାଯାଇଛି । ଏମିତି ଡିଗ୍ରୀ ସରକାରୀ ଚାକିରି ପାଇବା ଯୋଗ୍ୟ ହୋଇ ନଥାଏ କି ଉଚ୍ଚଶିକ୍ଷା ପାଇଁ ଆବେଦନ ବେଳେ ଗ୍ରହଣୀୟ । ଗତ ଦୁଇ ବର୍ଷ ମଧ୍ୟରେ ନକଲି ବିଶ୍ବବିଦ୍ୟାଳୟ ସଂଖ୍ୟା ୨୦ରୁ ବଢ଼ି ୩୨ରେ ପହଞ୍ଚିଛି । ଏଥିରୁ ସ୍ପଷ୍ଟ ହେଉଛି ନକଲି ଶିକ୍ଷାନୁଷ୍ଠାନଙ୍କ ସଂଖ୍ୟା ବଢ଼ିବା ସହ ଛାତ୍ୟଛାତ୍ରୀଙ୍କୁ ଭ୍ରମିତ କରାଯାଉଛି ।
ଦିଲ୍ଲୀରେ ସର୍ବାଧିକ ନକଲି ବିଶ୍ବବିଦ୍ୟାଳୟ
ପ୍ରତିଥର ସବୁଠାରୁ ଅଧିକ ନକଲି ସଂସ୍ଥା ତାଲିକାରେ ଉପରେ ଦିଲ୍ଲୀ ରହୁଛି । ରାଜଧାନୀରେ ୧୨ଟି ଶିକ୍ଷାନୁଷ୍ଠାନକୁ ନକଲି ଘୋଷିତ କରାଯାଇଛି । ଏଥିରେ ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ପବ୍ଲିକ ଆଣ୍ଡ ଫିଜିକାଲ ହେଲ୍ଥ ସାଇନ୍ସ, କମର୍ଶିଆଲ ୟୁନିଭର୍ସିଟି ଲିମିଟେଡ, ୟୁନାଇଟେଡ ନେଶନ୍ସ ୟୁନିଭର୍ସିଟି, ଭୋକେସନାଲ ୟୁନିଭର୍ସିଟି, ଏଡିଆର- ସେଣ୍ଟ୍ରାଲ ଜୁରିଡିକଲ ୟୁନିଭର୍ସିଟି, ଇଣ୍ଡିଆନ ଇନଷ୍ଟିଚ୍ୟୂଟ ଅଫ ସାଇନ୍ସ ଆଣ୍ଡ ଇଞ୍ଜିନିୟରିଂ, ବିଶ୍ବକର୍ମ ଓପନ ୟୁନିଭର୍ସିଟି ଫର ସେଲ୍ଫ-ଏମ୍ପ୍ଲୟମେଣ୍ଟ, ଆଧ୍ୟାତ୍ମିକ ବିଶ୍ବବିଦ୍ୟାଳୟ, ଓ୍ବାଲ୍ଡ ପିସ ଅଫ ୟୁନାଇଟେଡ ନେସନ୍ସ ୟୁନିଭର୍ସିଟି, ଇନଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ ଆଣ୍ଡ ଇଞ୍ଜିନିୟରିଂ, ମାଇଣ୍ଟେନ ଇନଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ ଆଣ୍ଡ ଟେକ୍ନୋଲଜି, ନେଶନାଲ ଇନଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ ସଲୁସନ ପରି ବିଶ୍ବବିଦ୍ୟାଳୟର ନାଁ ରହିଛି ।
ଅନ୍ୟ କେଉଁ ରାଜ୍ୟରୁ କେତେ ?
ତାଲିକାରେ ଉତ୍ତର ପ୍ରଦେଶର ୪, ମହାରାଷ୍ଟ୍ର ଓ ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ, ପୁଡୁଚେରୀ ଓ କର୍ଣ୍ଣାଟକରୁ ଦୁଇଟି ଲେଖାଏଁ ସଂସ୍ଥାର ନାଁ ରହିଛି । ଏହାବାଦ କେରଲା, ହରିୟାଣା, ରାଜସ୍ଥାନ, ଝାରଖଣ୍ଡ, ଅରୁଣାଚଳ ପ୍ରଦେଶରୁ ଗୋଟିଏ ଲେଖାଏଁ ସଂସ୍ଥା ରହିଛନ୍ତି । ଏମାନଙ୍କ ମଧ୍ୟରେ ଗାନ୍ଧି ହିନ୍ଦି ବିଦ୍ୟାବିଠ (ପୟାଗ), ନେତାଜୀ ସୁଭାଷ ଚନ୍ଦ୍ର ବୋଷ ଓପନ ୟୁନିଭର୍ସିଟି (ଅଲିଗଡ଼), ରାଜା ଅରେବିକ ୟୁନିଭର୍ସିଟି (ନାଗପୁର), ଇଣ୍ଡିଆନ ଇନଷ୍ଟିଚ୍ୟୁଟ ଅଫ୍ ଅଲଟରନେଟିଭ ମେଡିସନ (କୋଲକାତା) ପରି ସଂସ୍ଥା ରହିଛନ୍ତି ।
ଛାତ୍ରଛାତ୍ରୀଙ୍କ ପାଇଁ ପରାମର୍ଶ
ୟୁଜିସି ସ୍ପଷ୍ଟ କରିଛି, ମାନ୍ୟତା ନଥିବା ସଂସ୍ଥାରୁ ମିଳିଥିବା ଡିଗ୍ରୀର ଆଇନଗତ ମହତ୍ବ ନାହିଁ । ଏମିତି ସ୍ଥିତିରେ ଛାତ୍ରଛାତ୍ରୀମାନେ କୌଣସି ବିଶ୍ବବିଦ୍ୟାଳୟରେ ନାମ ଲେଖାଇବା ପୂର୍ବରୁ ୟୁଜିସିର ଅଧିକାରିକ ଓ୍ବେବସାଇଟରେ ଉକ୍ତ ସଂସ୍ଥା ମାନ୍ୟତା ପ୍ରାପ୍ତ କି ନୁହେଁ ଯାଞ୍ଚ କରନ୍ତୁ । ସାମାନ୍ୟ ଅବହେଳା ଆପଣଙ୍କ ଭବିଷ୍ୟତ ଉପରେ ଭାରି ପଡିପାରେ, ଏଥିପାଇଁ ସତର୍କ ରୁହନ୍ତୁ ।
