ଦ୍ବିତୀୟ ଦିନରେ 5T ସଚିବଙ୍କ ମାରାଥନ ସମୀକ୍ଷା, ରାଜକନିକା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସ୍ବାସ୍ଥ୍ୟସେବାର ଅନୁଧ୍ୟାନ

କେନ୍ଦ୍ରାପଡ଼ା: ଦ୍ବିତୀୟ ଦିନରେ କେନ୍ଦ୍ରାପଡ଼ାରେ 5T ସଚିବଙ୍କ ମାରାଥନ ସମୀକ୍ଷା । ଗ୍ରାଉଣ୍ଡରେ ଲୋକଙ୍କ ସମସ୍ୟା ଶୁଣୁଛନ୍ତି ଭି.କେ ପାଣ୍ଡିଆନ୍ । ରାଜକନିକା ସିଏଚସି ଯାଇ ଚିକିତ୍ସା ବ୍ୟବସ୍ଥାର ଅନୁଧ୍ୟାନ କରିଛନ୍ତି 5T ସଚିବ । ଏହା ପୂର୍ବରୁ ଆଳି ଫୁଟବଲ ଷ୍ଟାଡିୟମ ବୁଲି ଦେଖିଥିଲେ 5T ସଚିବ । ୫୦ରୁ ଅଧିକ ବାଳିକା ଫୁଟବଲ ଖେଳାଳିଙ୍କ ସହ ଆଲୋଚନା କରିଥିଲେ ଭି.କେ ପାଣ୍ତିଆନ୍ । ଓଡ଼ିଶା ନୁହେଁ ଦେଶର ନାଁ ରଖିବା ସହ ଭଲ ଖେଳିବାକୁ ପରାମର୍ଶ ଦେଇଥିଲେ । ଖେଳାଳିଙ୍କ ସମସ୍ୟାର ତୁରନ୍ତ ସମାଧାନ କରିବାକୁ ନିର୍ଦ୍ଦେଶ ଦେଇଛନ୍ତି 5T ସଚିବ । ଏହାପରେ ମିଶନ ଶକ୍ତି ଦ୍ବାରା ପରିଚାଳିତ ମେଡିକାଲ କ୍ୟାଣ୍ଟିନରେ ଭୋଜନ କରିଥିଲେ । ଖାଦ୍ୟର ମାନ ଯାଞ୍ଚ କରିବା ସହ ମହିଳାଙ୍କ ସହ ଆଲୋଚନା କରିଥିଲେ ।

ଏହାପରେ ତରାସ ଓ ବଡପାଲ୍ଲି 5T ହାଇସ୍କୁଲ ପରିଦର୍ଶନ କରିବା କାର୍ଯ୍ୟକ୍ରମ ରହିଛି । ରାଜନଗର ସିଏଚସି ଓ ବାଲିସାହିପାଟଣାରେ ମିଲ୍କ ଶକ୍ତି ପ୍ରୋସେସିଂ ୟୁନିଟର ଅନୁଧ୍ୟାନ କରିବେ । ସେଠାରୁ କେରଡ଼ାଗଡ଼ ଜଗନ୍ନାଥ ମନ୍ଦିର, ବାୟା ବାବା ମଠ ଯିବେ । ଭାଟପଡ଼ା ଓ ଗୁପ୍ତିରେ ବିଭିନ୍ନ ଉନ୍ନୟନ ପ୍ରକଳ୍ପର ସମୀକ୍ଷା ପରେ ରାଜନଗର ମିଶନ ଶକ୍ତି କାଫେରେ ମଧ୍ୟାହ୍ନ ଭୋଜନ କରି ସଂସ୍କୃତି ଭବନରେ ଲୋକଙ୍କ ସମସ୍ୟା ସମ୍ପର୍କରେ ଆଲୋଚନା କରିବାର କାର୍ଯ୍ୟକ୍ରମ ରହିଛି ।