ନନ୍ଦିଘୋଷ ବ୍ୟୁରୋ: ପାକିସ୍ତାନଭିତ୍ତିକ ଆତଙ୍କୀ ସଂଗଠନ ଟାର୍ଗେଟରେ ଜାମ୍ମୁ ଓ କାଶ୍ମୀର। ଅପରେସନ ସିନ୍ଦୂରର ୬ ମାସ ପରେ ଏବେ ଆସିଛି ଅଧିକ ଚିନ୍ତାଜନକ ଖବର। ଜାମ୍ମୁ ଓ କାଶ୍ମୀର ଉପରେ ସମ୍ମିଳିତ ହମଲା ଲାଗି ପାକିସ୍ତାନଭିତ୍ତିକ ଆତଙ୍କୀ ସଂଗଠନ ଲସ୍କର-ଇ-ତଏବା ଓ ଜୈସ-ଏ-ମହମ୍ମଦ ସଂଗଠନ ପକ୍ଷରୁ ସୁଚିନ୍ତିତ ଯୋଜନା କରାଯାଉଛି ବୋଲି ସୂଚନା ମିଳିଛି । ଗତ ସେପ୍ଟେମ୍ବରରୁ ଏହି ଦୁଇ ସଂଗଠନର ଅନକ କର୍ମୀ ଜାମ୍ମୁ ଓ କାଶ୍ମୀର ଭିତରେ ଅନୁପ୍ରବେଶ କରୁଥିବା ସୂଚନା ମିଳିଛି ।
ପାକିସ୍ତାନର ସ୍ପେସାଲ ସର୍ଭିସେସ ଗ୍ରୁପ ବା ଏସଏସଜି ଓ ଆଇଏସଆଇ ସହଯୋଗରେ ସେମାନେ ନିଜର କାୟା ବିସ୍ତାର କରିବାରେ ଲାଗିଛନ୍ତି ବୋଲି ଗୁଇନ୍ଦା ସୂତ୍ରରୁ ପ୍ରକାଶ । ନିୟନ୍ତ୍ରଣ ରେଖାର ଦୁର୍ବଳ ଅଞ୍ଚଳରେ ସମସେରଙ୍କ ନେତୃତ୍ବାଧୀନ ଲସ୍କର ସଂଗଠନ ରେକି କରିଥିବା ସୂଚନା ମିଳିଛି । ସମ୍ଭାବ୍ୟ ହମଲା ଲାଗି ଯୋଜନା ପ୍ରସ୍ତୁତ ହୋଇଥିବାବେଳେ ବିଭିନ୍ନ ଗୋପନ ସ୍ଥାନରେ ଅସ୍ତ୍ରଶସ୍ତ୍ର ପକାଇବା ଯୋଜନା ରହିଛି ବୋଲି ସୂଚନା ମିଳିଛି ।
