ଲକ୍ଷ୍ନୌ: ଘରେ ମଦ ରଖୁଥିଲେ ସାବଧାନ୍। ଏଣିକି ଧାର୍ଯ୍ୟ ମାତ୍ରାଠାରୁ ଅଧିକ ମାଦକ ଦ୍ରବ୍ୟ ରଖିଲେ ତଣ୍ଡ ଗଣିବାକୁ ହେବ। ସରକାର ଧାର୍ଯ୍ୟ କରିଥିବା ଲିମିଟ୍ ଠାରୁ ଅଧିକ ମଦ ଘରେ ରଖିବାକୁ ଚାହୁଁଥିଲେ ଅବକାରୀ ବିଭାଗଠାରୁ ଅନୁମତି ନେବାକୁ ପଡ଼ିବ। ଏହି ନୂଆ ଅବକାରୀ ନୀତି ଆରମ୍ଭ କରିଛନ୍ତି ଉତ୍ତରପ୍ରଦେଶ ସରକାର। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ଏ ନେଇ ଘୋଷଣା କରିଛନ୍ତି ।
ଯଦି ଆପଣ ଘରେ ଅଧିକ ପରିମାଣର ମଦ ରଖିବାକୁ ଚାହୁଁଛନ୍ତି ତେବେ ଆପଣଙ୍କୁ ଅବକାରୀ ବିଭାଗଠାରୁ ଲାଇସେନ୍ସ ନେବାକୁ ପଡ଼ିବ। ଏଥିପାଇଁ ବର୍ଷକୁ ରାଜ୍ୟ ସରକାରଙ୍କୁ ୧୨ହଜାର ଟଙ୍କା ଲେଖାଏଁ ଦେବାକୁ ହେବ। ଏହାବ୍ୟତୀତ ୫୧ ହଜାର ଟଙ୍କାର ସିକ୍ୟୁରିଟି ମଧ୍ୟ ଦେବାକୁ ପଡ଼ିବ। ବିନା ଲାଇସେନ୍ସରେ ଘରେ ମାତ୍ରାଧିକ ମଦ ରଖିଲେ ଜୋରିମାନା ଗଣିବେ ଘର ମାଲିକ।
କିନ୍ତୁ ଏହି ଲାଇସେନ୍ସ କେବଳ ଗତ ୫ବର୍ଷ ଧରି ଆୟକର ଭରୁଥିବା କରଦାତାଙ୍କୁ ହିଁ ଲାଇସେନ୍ସ ମିଳିବ। ଲାଇସେନ୍ସ ଆବେଦନ କରିବା ସମୟରେ ଇନକମ ଟ୍ୟାକ୍ସ ପୈଠ କରିଥିବା ନେଇ ରିସିଟ ବି ଦେଖାଇବାକୁ ପଡ଼ିବ। ଏଥିସହ ଆଧାର କାର୍ଡ଼ ଓ ପାନ କାର୍ଡ଼ର କପି ମଧ୍ୟ ଜମା କରିବାକୁ ପଡ଼ିବ। କେବଳ ସେତିକି ନୁହେଁ ଲାଇସେନ୍ସ ପ୍ରାପ୍ତ ବ୍ୟକ୍ତି ଘରେ କେବଳ ମଦ ଛଡ଼ା ଅନ୍ୟ କୌଣସି ନିଶା ଦ୍ରବ୍ୟ ରଖିପାରିବେ ନାହିଁ।
ସୂଚନାଯୋଗ୍ୟ, ଉତ୍ତରପ୍ରଦେଶରେ ଦିନକୁ ଦିନ ବେଆଇନ ମଦ କାରବାର ବଢ଼ିବାରେ ଲାଗିଛି। ରାଜ୍ୟରେ ଏଥିଯୋଗୁଁ ବର୍ଷକୁ କୋଟି କୋଟି ଟଙ୍କାର ରାଜସ୍ୱ ହାନୀ ବି ଘଟୁଛି। ତେଣୁ ଏହାକୁ ରୋକିବା ପାଇଁ ଉତ୍ତରପ୍ରଦେଶ ସରକାର ଏଭଳି ନୂଆ ନିୟମ ଜାରି କରିଛନ୍ତି।
