ନୂଆଦିଲ୍ଲୀ: ପାୱାର କରିଡରରୁ ନେଇ ପବ୍ଲିକଙ୍କ ପର୍ଯ୍ୟନ୍ତ । ଆର୍ଥିକ ବର୍ଷ ଆରମ୍ଭ ସହ ଶକ୍ତିଶାଳୀ ଭାରତୀୟଙ୍କୁ ନେଇ ସମସ୍ତଙ୍କ ମନରେ ରହିଛି ଅନେକ ପ୍ରଶ୍ନ । ପୁଣି ଏବେ ଏବେ ସରିଥିବା ୫ ରାଜ୍ୟ ନିର୍ବାଚନର ଫଳାଫଳ କିଭଳି ଦେଶକୁ ପ୍ରଭାବିତ କରୁଛି ତା’ଉପରେ ରହିଛି ସମସ୍ତଙ୍କ ନଜର । ବର୍ଷ ବଦଳିବା ସହ ବିଭିନ୍ନ ବ୍ୟକ୍ତି ବିଶେଷଙ୍କ ସ୍ଥିତିରେ ପରିବର୍ତ୍ତନ ଆସିଛି । ଜାଣିବା ବର୍ଷ ୨୦୨୨ର ଶ୍ରେଷ୍ଠ ୧୦୦ ଶକ୍ତିଶାଳୀ ଭାରତୀୟଙ୍କୁ…
ଇଣ୍ଡିଆନ୍ ଏକ୍ସପ୍ରେସ୍ ପକ୍ଷରୁ ପ୍ରକାଶିତ ଶ୍ରେଷ୍ଠ ୧୦୦ ଶକ୍ତିଶାଳୀ ଭାରତୀୟଙ୍କ ମଧ୍ୟରେ ପ୍ରଥମେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦ୍ୱିତୀୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଥିବାବେଳେ ତୃତୀୟରେ ଆରଏସ୍ଏସ୍ ମୁଖ୍ୟ ମୋହନ ଭାଗୱତ ରହିଛନ୍ତି । ଚତୁର୍ଥ ସ୍ଥାନରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ପଞ୍ଚମ ସ୍ଥାନରେ ଶିଳ୍ପପତି ମୁକେଶ ଅମ୍ବାନୀ, ଷଷ୍ଠ ସ୍ଥାନରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ସପ୍ତମ ସ୍ଥାନରେ ଆଦାନୀ ଗ୍ରୁପ୍ ଅଧ୍ୟକ୍ଷ ଗୌତମ ଆଦାନୀ, ଅଷ୍ଟମ ସ୍ଥାନରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍, ନବମ ସ୍ଥାନରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍, ଦଶମ ସ୍ଥାନରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ରହିଛନ୍ତି ।
ତାଲିକାର ୩୩ତମ ସ୍ଥାନରେ ଅଛନ୍ତି ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୨୦୨୧ ବର୍ଷରେ ନବୀନ ୪୫ତମ ସ୍ଥାନରେ ଥିବାବେଳେ ଚଳିତବର୍ଷ ୩୩ତମ ସ୍ଥାନକୁ ଉଠିଛନ୍ତି । ଦେଶରେ ସର୍ବାଧିକ ସମୟ ଲାଗି ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ରହି ଆସିଛନ୍ତି । ଏବେ ଏବେ ସରିଥିବା ପଞ୍ଚାୟତ ଓ ପୌର ନିର୍ବାଚନରେ ବିଜେଡି ବାଜିମାତ୍ କରିଛି । ପଞ୍ଚାୟତ ନିର୍ବାଚନରେ ୮୫୩ ଜିଲ୍ଲା ପରିଷଦ ଆସନରୁ ୭୬୬ଟିରେ ବିଜୟୀ ହୋଇଛନ୍ତି ବିଜେଡି ପ୍ରାର୍ଥୀ । ଏହାଛଡ଼ା ଓଡ଼ିଶା ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଲୋକଙ୍କୁ ନବୀନ ସରକାର ପ୍ରତି ଆକର୍ଷିତ କରିଛି । ଭାରତୀ ହକି ଟିମକୁ ପ୍ରାୟୋଜିତ କରି ଜାତୀୟ ସ୍ତରରେ ନାଁ କମେଇଛି ଓଡ଼ିଶା ।
