ଭୁବନେଶ୍ବର: ବିଶ୍ୱକପ ହକି ପାଇଁ ରାଜଧାନୀରେ ସୌନ୍ଦର୍ଯ୍ୟକରଣ ଜାରି ରହିଛି। ରାସ୍ତାଘାଟ ସବୁକିଛି ସୁନ୍ଦର ଭାବେ ସଜେଇ ହୋଇଛି। ରାସ୍ତା ପାର୍ଶ୍ଵ ପ୍ରାଚୀରରେ ବିଜ୍ଞାପନ କିମ୍ବା କୌଣସି ପୋଷ୍ଟର ନ ମାରିବାକୁ ବିଏମସି ପକ୍ଷରୁ ଆହ୍ୱାନ ଦିଆଯିବ ସହ କଟକଣା ଜାରି କରାଯାଇଛି।
ଏହା ସତ୍ତ୍ୱେ କିଛି ସଂସ୍ଥା ନିଜର ବ୍ୟବସାୟିକ ଫାଇଦା ଉଠାଇବା ପାଇଁ ସହରର ବିଭିନ୍ନ ସ୍ଥାନରେ ପ୍ରାଚୀରରେ ପୋଷ୍ଟର ମାରୁଥିବା ନଜରକୁ ଆସିଛି। ଏଭଳି ଘଟଣାରେ ବିଏମସି ପକ୍ଷରୁ କେନସଫ୍ଟ ନାମରେ ଥାନାରେ ଏତଲା ଦାଏର କରାଯାଇଛି। ପୂର୍ବରୁ ମଧ୍ୟ ଏଭଳି ଅଭିଯୋଗରେ ଜରିମାନା ସହ ଏକାଧିକ ମାମଲା ରୁଜୁ ହୋଇଥିବା ନଜିର ରହିଛି।
ପୂର୍ବରୁ ବି ନିୟମ ଭାଙ୍ଗି ରାଜଧାନୀର କାନ୍ଥରେ ପୋଷ୍ଟର ଲଗାଇବାରୁ ବିଏମସି ପକ୍ଷରୁ ବିଭିନ୍ନ ଥାନାରେ ଏକାଧିକ ଏତଲା ଦାୟର ହୋଇଛି । କେତେକ ସଂସ୍ଥା ବିରୋଧରେ ଏଫଆଇଆର ହୋଇଛି । ଭୁବନେଶ୍ବରରେ ରାସ୍ତାକଡ଼ କାନ୍ଥ ଓ ଗଛରେ ପୋଷ୍ଟର ଲଗାଇଲେ କାର୍ଯ୍ୟାନୁଷ୍ଠାନ ହେବ ବୋଲି ପୂର୍ବରୁ ବିଏମସି ସଚେତନ କରାଇଥିଲା ।
ପୋଷ୍ଟର ମୁକ୍ତ ସ୍ମାର୍ଟସିଟି ଲକ୍ଷ୍ୟରେ ବିଏମସି । ପ୍ରଥମ ପର୍ଯ୍ୟାୟରେ ବିଭିନ୍ନ କାନ୍ଥରେ ଲାଗିଥିବା ପୋଷ୍ଟରକୁ ସଫେଇ କର୍ମଚାରୀଙ୍କ ଜରିଆରେ ହଟାଯାଇଥିଲା । ଆଗକୁ ଜୋରିମାନା ସହ ଦୃଢ଼ କାର୍ଯ୍ୟାନୁଷ୍ଠାନ ହେବ ବୋଲି ଲୋକଙ୍କୁ ଅବଗତ କରାଯାଇଥିଲା । ହେଲେ କିଛି ଅସାଧୁ ଲୋକ ଏହି ନିୟମକୁ ବେଖାତିର କରି ବାରମ୍ବାର ପୋଷ୍ଟର ଲଗାଇ ଚାଲିଛନ୍ତି। ବିଶ୍ବକପ୍ ଓ ମେକ୍ ଇନ ଓଡ଼ିଶା କନକ୍ଲେଭକୁ ନଜରରେ ରଖି ବିଏମସି ପକ୍ଷରୁ ରାଜଧାନୀର ସୌନ୍ଦର୍ଯ୍ୟକରଣକୁ ଗୁରୁତ୍ବ ଦିଆଯାଉଛି।
