କେନ୍ଦୁଝର: କେନ୍ଦୁଝର ବଡ଼ବିଲରେ ପୁଣି ଫୁଟିଲା ଗୁଳି । ଜଣେ OMDC କର୍ମଚାରୀଙ୍କୁ ଗୁଳିକରି ହତ୍ୟା । ମୃତକ ବଡ଼ବିଲ ଦଲକି ବସ୍ତିର ଦୁଃଶାସନ ବାରିକ ବୋଲି ଜଣାପଡ଼ିଛି । କିଏ ଓ କାହିଁକି ତାଙ୍କୁ ଗୁଳି କରିଛି ସେନେଇ ବଡ଼ବିଲ ପୋଲିସ ଓ ସାଇଣ୍ଟିଫିକ ଟିମ୍ ତଦନ୍ତ ଚଳାଇଛନ୍ତି । ପାରିପାର୍ଶ୍ୱକ ସ୍ଥିତିରୁ ତାଙ୍କୁ କେହି ମୁଣ୍ଡକୁ ଗୁଳି କରି ହତ୍ୟା କରିଥିବା ଜଣାପଡ଼ୁଛି । ଶନିବାର ସକାଳେ ତାଙ୍କର ଗୁଳିବିଦ୍ଧ ମୃତଦେହ ଉଦ୍ଧାର ହୋଇଛି ।
ବଡ଼ବିଲ ଦାମୁ ହଟିଂ ପାଖ ଇଲେକ୍ଟ୍ରିକ୍ ଗ୍ରିଡ୍ ପଛପଟରେ ଥିବା ଏକ ହାଇଟେନ୍ସନ୍ ଟାୱାର ନିକଟରେ ଦୁଃଶାସନଙ୍କ ମୃତଦେହ ପଡିଥିବାର ଲୋକେ ଦେଖିବାକୁ ପାଇଥିଲେ । ମୃତଦେହ ନିକଟରେ ୨ ଟି ୯ ଏମଏମ୍ ଖୋକା ପଡ଼ିଥିବା ବେଳେ ୩ଟି ଖାଲି ମଦ ବୋତଲ ମଧ୍ୟ ପଡ଼ିଛି । ଘଟଣାର ପ୍ରାୟ ୨ ଶହ ମିଟର ଦୂରରେ ମୃତ ଦୁଃଶାସନଙ୍କ ବାଇକ୍ ଏକ ଗଛ ନିକଟରେ ରହିଛି। ପରିବାର ଲୋକଙ୍କ କହିବା କଥା ଗତକାଲି ସନ୍ଧ୍ୟାରେ ଦୁଃଶାସନ OMDCରେ ଡ୍ୟୁଟି ସାରି ଘରକୁ ଫେରି ନଥିଲେ। ତେବେ ଜମିଜମା ବିବାଦକୁ ନେଇ ଏହି ହତ୍ୟାକାଣ୍ଡ ଘଟିଥିବା ମୃତକଙ୍କ ପରିବାର ଲୋକେ ସନ୍ଦେହ କରୁଛନ୍ତି ।
