ବେଙ୍ଗାଲୁରୁ: ବିଧାନସଭା ନିର୍ବାଚନ ପୂର୍ବରୁ ବିଜେପି ଛାଡ଼ି କଂଗ୍ରେସରେ ମିଶିଲେ ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ସେଟ୍ଟର। କଂଗ୍ରେସ ଅଧ୍ୟକ୍ଷ ଖଡଗେଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି ସେଟ୍ଟର । ପିସିସି କାର୍ଯ୍ୟାଳୟରେ ସଭାପତି ଡିକେ ଶିବକୁମାର, ସିଦ୍ଧରମୈୟାଙ୍କ ଉପସ୍ଥିତିରେ ଗୁରୁତ୍ବପୂର୍ଣ୍ଣ ବୈଠକ ପରେ ସାମ୍ବାଦିକ ସମ୍ମିଳନୀରେ ଏ ନେଇ ସୂଚନା ଦିଆଯାଇଛି।
ବିଜେପି ଟିକେଟ ନଦେବାରୁ ସେଟ୍ଟର ଗତକାଲି ଦଳରୁ ଇସ୍ତଫା ଦେଇଥିଲେ । ବିଜେପି ପ୍ରାର୍ଥୀ ତାଲିକାକୁ ନେଇ ଦଳର ହାଇକମାଣ୍ଡଙ୍କ ନିଷ୍ପତ୍ତିକୁ ଖୋଲାଖୋଲି ବିରୋଧ କରିଥିଲେ ସେଟ୍ଟର। ଦିଲ୍ଲୀରେ ବରିଷ୍ଠ ନେତାଙ୍କ ସହ ଆଲୋଚନା ପରେ ବି ଟିକେଟ ପ୍ରତିଶ୍ରୁତି ନମିଳିବାରୁ ଗତକାଲି ସେ ଦଳ ଛାଡ଼ିଥିଲେ । ଆଜି ସେ କଂଗ୍ରେସ ଅଧ୍ୟକ୍ଷ ଓ ବରିଷ୍ଠ ନେତାଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି।
ଗତ ୬ମାସ ଧରି ବିଜେପିରେ ତାଙ୍କୁ ଅଣଦେଖା କରାଯାଉଥିବା ସେଟ୍ଟର କହିଛନ୍ତି। ସେଟ୍ଟର କଂଗ୍ରେସ ଟିକେଟରେ ହୁବାଲିରୁ ଲଢ଼ିବେ ବୋଲି ସୂଚନା ମିଳିଛି। ପୂର୍ବତନ ମୁଖ୍ୟମନ୍ତ୍ରୀ ସେଟ୍ଟର ଲିଙ୍ଗାୟତ କମ୍ୟୁନିଟିର ଜଣେ ପ୍ରଭାବଶାଳୀ ନେତା। ସେଟ୍ଟର କଂଗ୍ରେସରେ ସାମିଲ ହେବା ପରେ ଲିଙ୍ଗାୟତ ସମୁଦାୟର ସମର୍ଥନ କଂଗ୍ରେସ ପ୍ରତି ରହିବ ବୋଲି କହିଛନ୍ତି ପିସିସି ସଭାପତି ଡିକେ ଶିବକୁମାର।
