ମାଣ୍ଡିଆ ଦେଉଛି ରୋଜଗାର, ମେସିନରେ ପ୍ରସ୍ତୁତ କରି ସ୍ବାବଲମ୍ବୀ ହେଉଛନ୍ତି SHG ମାଆ

ଜୟପୁର: ମାଣ୍ଡିଆ ଉତ୍ପତ୍ତିସ୍ଥଳ କୋରାପୁଟ ଜିଲ୍ଲା । ଏଠାରେ ପ୍ରାୟ ୭୦ ଭାଗ ମାଣ୍ଡିଆ ଚାଷ କରାଯାଇଥାଏ । ପୂର୍ବରୁ ଆଦିବାସୀଙ୍କ ଏହା ପ୍ରମୁଖ ଖାଦ୍ୟ ଥିଲା । କିନ୍ତୁ ଏବେ ମାଣ୍ଡିଆର ମୂଲ୍ୟ ବୃଦ୍ଧି କରି ଏଥିରେ ବିଭିନ୍ନ ଖାଦ୍ୟ ପ୍ରସ୍ତୁତ କରାଯାଇପାରୁଛି । ମାଣ୍ଡିଆ ଚା’ , ବିସ୍କୁଟ, ମିକ୍ଚର, କୁକିସ୍, ଲଡୁଠାରୁ ଆରମ୍ଭ କରି ଅନେକ ଚଟପଟି ଖାଦ୍ୟ ପ୍ରସ୍ତୁତ କରାଯାଉଛି । ମିଲେଟ ବ୍ୟାଙ୍କ କରି ବିଭିନ୍ନ ଅତ୍ୟାଧୁନିକ ମେସିନ ସାହାଯ୍ୟରେ ଏସବୁ ପ୍ରସ୍ତୁତ କରି ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟକ୍ରମକୁ ପଠାଯାଉଛି । ଏଥିପାଇଁ SHG ମାଆମାନଙ୍କୁ ଦିଆଯାଉଛି ତାଲିମ । ଏହାଦ୍ବାରା ମାଆମାନେ ଆତ୍ମନିର୍ଭରଶୀଳ ହେବା ସହ ପରିବାର ପ୍ରତିପୋଷଣରେ ସହାୟତା କରିପାରୁଛନ୍ତି ।

ମିଲେଟ ବ୍ୟାଙ୍କ ପରିଦର୍ଶନ କରି କୃଷି ସଚିବ SHG ମାଆମାନଙ୍କ ସହିତ ଆଲୋଚନା କରିଛନ୍ତି । ଏଥିପାଇଁ ଭୁବନେଶ୍ବରରେ ଅଧିକ ତାଲିମ ଦେବା ପାଇଁ ପ୍ରତିଶ୍ରୁତି ଦେଇଛନ୍ତି । ଏବେ ବିଶ୍ବ ଦରବାରରେ ମାଣ୍ଡିଆ ସମସ୍ତଙ୍କ ଆଦ୍ରୁତ ହୋଇ ପାରିଛି । ତେଣୁ ଏହାକୁ ଅଧିକରୁ ଅଧିକ ପ୍ରସାର ଦିଗରେ ମିଲେଟ ବ୍ୟାଙ୍କର କାମକୁ ପ୍ରଶଂସା କରିଛନ୍ତି ସଚିବ । କୋରାପୁଟ ମାଣ୍ଡିଆର ଚାହିଦା ଅଧିକ ରହିଥିବାରୁ ମିଲେଟ ବ୍ୟାଙ୍କ ଜରିଆରେ ଅଧିକ ମାଣ୍ଡିଆ ଜାତ ଦ୍ରବ୍ୟର ବ୍ୟବହାରକୁ ଗୁରୁତ୍ବ ଦିଆଯାଇଛି ।