ବାତ୍ୟା କ୍ଷତିଗ୍ରସ୍ତ ଅଞ୍ଚଳର ଚାଷୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସହାୟତା ଘୋଷଣା

ଭୁବନେଶ୍ୱର: ବାତ୍ୟା ‘ବୁଲବୁଲ୍’ କ୍ଷତିଗ୍ରସ୍ତଙ୍କ ପାଇଁ ମୁଖ୍ୟମନ୍ତ୍ରୀଙ୍କ ପ୍ୟାକେଜ । ଆଜି ଲୋକସେବା ଭବନରେ ଏ ନେଇ ସମୀକ୍ଷା କରିଥିଲେ ମୁଖ୍ୟମନ୍ତ୍ରୀ । ଅଣଜଳସେଚିତ ଅଞ୍ଚଳରେ ୩୩ ପ୍ରତିଶତରୁ ଅଧିକ ଫସଲ କ୍ଷତିଗ୍ରସ୍ତଙ୍କୁ ହେକ୍ଟର ପିଛା ୬ ହଜାର ୮୦୦ ଟଙ୍କା ମିଳିବ। ଜଳସେଚିତ ଅଞ୍ଚଳରେ ହେକ୍ଟର ପିଛା ୧୩, ୫୦୦ ଟଙ୍କା ମିଳିବ । ଆମ୍ବ, କାଜୁ, ନଡ଼ିଆ ଭଳି ଚାଷରେ କ୍ଷତି ପାଇଁ ହେକ୍ଟର ପିଛା ୧୮ ହଜାର ଟଙ୍କା ଇନପୁଟ୍ ସବସିଡି ମିଳିବ । ଏଥିସହ ରବି ଋତୁରେ ଚାଷୀଙ୍କୁ ୫୦ ହଜାର ସିଡ ମିନି କିଟ୍ ବଣ୍ଟାଯିବ । ବାତ୍ୟା ପ୍ରଭାବିତ ଅଞ୍ଚଳର କୃଷକଙ୍କୁ ୩ ହଜାର ସ୍ପେୟାର ୫୦ ପ୍ରତିଶତ ରିହାତ ଦରରେ ଯୋଗାଇ ଦିଆଯିବ । ବ୍ୟାଟେରୀଚାଳିତ ସ୍ପେୟାର ପାଇଁ ସର୍ବାଧିକ ୩,୮୦୦ ଟଙ୍କା ଓ ହସ୍ତଚାଳିତ ସ୍ପେୟାର ପାଇଁ ୭୫୦ ଟଙ୍କା ଦେବାକୁ ସରକାର ଘୋଷଣା କରିଛନ୍ତି  ।

ପରିବା ଚାଷୀଙ୍କୁ ୧୦ ହଜାର ମିନି କିଟ୍ ଦିଆଯିବ । ପାନ ବରଜରେ କ୍ଷତିଗ୍ରସ୍ତ ୩୦ ୟୁନିଟ୍ ପାଇଁ ଚାଷୀଙ୍କୁ ୧୫ ହଜାର ଟଙ୍କା ଲେଖାଏଁ, ୫୦ଟି ଛତୁ ୟୁନିଟ୍ ପାଇଁ ୪୦ ହଜାର ଟଙ୍କା ଲେଖାଏଁ ପ୍ରଦାନ କରାଯିବ । ବାତ୍ୟା କ୍ଷତିଗ୍ରସ୍ତ ଅଞ୍ଚଳରେ ରବି ଫସଲ ପାଇଁ ନିଆଯାଇଥିବା ସ୍ୱଳ୍ପ ସମୟ ଅବଧି ଋଣକୁ ମଧ୍ୟମ ଅବଧିକୁ ପରିର୍ତ୍ତନ କରାଯିବାକୁ ନିଷ୍ପତ୍ତି ହୋଇଛି । ଗୃହପାଳିତ ପଶୁପକ୍ଷୀ ପାଳନରେ କ୍ଷତି ସହିଥିବା ଚାଷୀଙ୍କୁ ମଧ୍ୟ ବାତ୍ୟା ସହାୟତା ମିଳିବ । ଗାଈ ଓ ମଇଁଷି ପାଇଁ ୩୦ ହଜାର ଟଙ୍କା, ବଳଦ ପାଇଁ ୨୫ ହଜାର, ବାଛୁରୀଙ୍କ ପାଇଁ ୧୬ ହଜାର, ଛେଳି ଓ ଘୁଷୁରୀ ପାଇଁ ୩ ହଜାର ଓ କୁକୁଡ଼ା ପାଇଁ ୫୦ ଟଙ୍କା ଲେଖାଏଁ ମିଳିବ । ସେହିଭଳି ମତ୍ସ୍ୟଜୀବୀଙ୍କ ପାଇଁ ସହାୟତା ଘୋଷଣା ହୋଇଛି । ଆଂଶିକ କ୍ଷତିଗ୍ରସ୍ତ ବୋଟ୍ ରିପ୍ୟାରିଂ ପାଇଁ ୪ ହଜାର ୧୦୦ ଟଙ୍କା, ଜାଲ ରିପ୍ୟାରିଂ ପାଇଁ ୨ ହଜାର ୧୦୦ ଟଙ୍କା ମିଳିବ । ବୋଟ୍ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲେ ୯, ୬୦୦ ଟଙ୍କା ଓ ସମ୍ପୂର୍ଣ୍ଣ ନଷ୍ଟ ହୋଇଥିବା ଜାଲ୍ ପାଇଁ ୨ ହଜାର ୬୦୦ ଟଙ୍କା ଦିଆଯିବ । ମାଛ ଚାଷରେ କ୍ଷତି ପାଇଁ ୧୨, ୨୦୦ ଟଙ୍କା ଓ ୮, ୨୦୦ ଟଙ୍କା ଇନପୁଟ୍ ସବସିଡି ମିଳିବ । ମୁଖ୍ୟମନ୍ତ୍ରୀ ଆଜି ବାତ୍ୟା ପ୍ରଭାବିତ ଅଞ୍ଚଳ ଆକାଶ ମାର୍ଗରୁ ପରିଦର୍ଶନ କରିବା ପରେ ପ୍ୟାକେଜ୍ ଘୋଷଣା କରିଛନ୍ତି ।