‘A’ ପଜିଟିଭ୍ ପ୍ୟାକେଟରେ ‘B’ ପଜିଟିଭ୍ ରକ୍ତ, ଭୁଲ ରକ୍ତ ନେଇ ରୋଗୀଙ୍କ ଅବସ୍ଥା ଗୁରୁତର

କଟକ: ‘A’ ପଜିଟିଭ୍ ପ୍ୟାକେଟରେ ‘B’ ପଜିଟିଭ୍ ରକ୍ତ । ଭୁଲ ରକ୍ତ ନେଇ ରୋଗୀଙ୍କ ଅବସ୍ଥା ଗୁରୁତର । କଟକ ରେଡକ୍ରସ୍ ରକ୍ତ ଭଣ୍ଡାର ବିରୋଧରେ ସାଂଘାତିକ ଅଭିଯୋଗ । ରୋଗୀଙ୍କ ଜୀବନ ସହ ଖେଳ ଖେଳାଯାଉଥିବା କହିଲେ ସମ୍ପର୍କୀୟ । ଅଭିଯୋଗର ତଦନ୍ତ ପାଇଁ କମିଟି ଗଠନ କରିଛି ସଂସ୍ଥା । କଟକ ଝୋଲାସାହି ସ୍ଥିତ ଏକ ଘରୋଇ ହସପିଟାଲରେ ଚିକିତ୍ସିତ ହେଉଥିବା ବିଭୂତି ଭୂଷଣ ଜେନାଙ୍କ ପୁଅ ଏହି ଅଭିଯୋଗ କରିଛନ୍ତି । ତାଙ୍କ ବାପାଙ୍କ ଶରୀରରେ ହିମୋଗ୍ଲୋବିନ୍ କମ୍ ଥିବାରୁ ଡାକ୍ତର ରକ୍ତ ଦେବାକୁ କହିଥିଲେ । କଟକ ରେଡକ୍ରସ୍ ରକ୍ତ ଭଣ୍ଡାରରୁ ରକ୍ତ ଆଣି ଦେବା ସମୟରେ ତାଙ୍କ ବାପା ଥରିବାକୁ ଲାଗିବା ସହ ଗୁରୁତର ହୋଇ ପଡିଥିଲେ । ସଙ୍ଗେ ସଙ୍ଗେ ରୋଗୀଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା । ଏବେ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି ।

ଅଭିଯୋଗକୁ ଅତି ଗୁରୁତର ଭାବରେ ନେଇଛନ୍ତି ରେଡକ୍ରସ୍ ରକ୍ତଭଣ୍ଡାର କର୍ତ୍ତୃପକ୍ଷ । ଖୁବଶୀଘ୍ର ଏକ କମିଟି ଗଠନ କରାଯାଇ ରକ୍ତ ପ୍ୟାକେଟରେ କିଭଳି ରକ୍ତ ତ୍ରୁଟି ରହିଲା ତଦନ୍ତ କରାଯିବ । ଦୋଷୀ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି କର୍ତ୍ତୃପକ୍ଷ ।ଭୁଲ୍ ରକ୍ତ ପଛରେ କାହାର ହାତ? କିଛି କର୍ମଚାରୀଙ୍କ ଖାମଖିଆଲି ନୀତି ଯୋଗୁ ଏଭଳି ଘଟଣା ଘଟିଥିବା ନେଇ ହୋଇଛି ଅଭିଯୋଗ ।