ନୂଆଦିଲ୍ଲୀ: ଖସି ପଡିଲା ଲିଫ୍ଟ, ଚାଲିଗଲା ୪ଜଣଙ୍କ ପ୍ରାଣ। ଗ୍ରେଟର ନୋଏଡା ଆମ୍ରପାଲି ଡ୍ରିମ ଭ୍ୟାଲି ଫେଜ- ୨ ପ୍ରକଳ୍ପରେ ଘଟିଛି ଏପରି ଭୟାନକ ଘଟଣା। ଏଠାରେ ନିର୍ମାଣାଧୀନ କୋଠାର ଲିଫ୍ଟ ଖସିପଡିବାରୁ ସେଥିରେ ଥିବା ୪ ଜଣଙ୍କର ମୃତ୍ୟୁ ହୋଇଯାଇଛି।
ଏଥିରେ ଥିବା ଆଉ ୫ଜଣ ଲୋକ ଆହତ ହୋଇଛନ୍ତି। ଗୁରୁତର ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଲିଫ୍ଟଟି ଆଠ ମହଲାରୁ ଖସି ତୃତୀୟ ମହଲାରେ ଅଟକିଯାଇଥିଲା। ତେବେ କନଷ୍ଟ୍ରକସନ କମ୍ପାନୀ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଏହା ପୂର୍ବରୁ ନୋଏଡାର ଅନ୍ୟ ଏକ ସମ୍ଭ୍ରାନ୍ତ ଅଞ୍ଚଳରେ ଲିଫ୍ଟ ଖସିପଡିବାରୁ ଜଣେ ବୃଦ୍ଧାଙ୍କର ମୃତ୍ୟୁ ହୋଇଥିଲା। ସେହିପରି କିଛି ଦିନ ତଳେ ମହାରାଷ୍ଟ୍ର ଥାନେରେ ମଧ୍ୟ ନିର୍ମାଣଧୀନ କୋଠାର ଲିଫ୍ଟ ଖସିପଡିବାରୁ ୭ ଜଣ ଶ୍ରମିକଙ୍କ ମୃତ୍ୟୁ ହୋଇଯାଇଥିଲା।
