ଭୁବନେଶ୍ବର: ୨୦୨୪ ହେବ ରେକର୍ଡର ବର୍ଷ । ରାଜ୍ୟ ଶାସନ ଭାର ପୁଣିଥରେ ନବୀନଙ୍କ ହାତରେ ରହିବା ସହ ଷଷ୍ଠ ଥର ମୁଖ୍ୟମନ୍ତ୍ରୀ ହୋଇ ଦେଶରେ ଲମ୍ବା ସମୟର ସିଏମ୍ ଭାବେ ରେକର୍ଡ କରିବେ । ବିକଶିତ ଓଡ଼ିଶା ଗଠନ ସହ ରେକର୍ଡ ସଂଖ୍ୟକ ଆସନରେ ବଡ଼ ବିଜୟ ପାଇଁ କାମ ଆରମ୍ଭ କରିଦେଇଛି ବିଜେଡି । ଓଡିଶାର ହକ୍ ପାଇଁ କେନ୍ଦ୍ର ଆଗରେ ଦାବି ଦୋହରାଇ ପୂରଣ କରିବାକୁ ସଂକଳ୍ପ ନେଇଛନ୍ତି ବିଜେଡି ନେତା ଓ କର୍ମୀ । ଅନ୍ୟପଟେ ଦୁଇ ବିରୋଧୀ ବିଜେପି ଓ କଂଗ୍ରେସ ୨୪ରେ ଭଲ ପ୍ରଦର୍ଶନ କରିବାକୁ ସଜବାଜ ଆରମ୍ଭ କରିଛନ୍ତି । ରାଜ୍ୟର ୩ ପ୍ରମୁଖ ରାଜନୈତିକ ଦଳ ପାଇଁ ୨୪ ଆଣିବ ବଡ଼ ଆହ୍ବାନ ।
ରଣନୀତି ପ୍ରସ୍ତୁତ, ଗ୍ରାଉଣ୍ଡ ଓ୍ବାର୍କ ଜାରି । ଲକ୍ଷ୍ୟ ବିକଶିତ ଓଡ଼ିଶା ଗଠନ । ହକର ଲଢେଇ ବି ହେବ ଜୋରଦାର । ବିରୋଧୀ ବି ଭିଡ଼ିଲେଣି ଅଣ୍ଟା । ସବୁ ଦଳ ପାଇଁ ଅଗ୍ନି ପରୀକ୍ଷା । ଦେଶରେ ଶକ୍ତିଶାଳୀ ରାଜନୈତିକ ଦଳ ଭାବେ ଉଭା ହୋଇଥିବା ବିଜେଡି ନାଁରେ ନୂଆବର୍ଷରେ ନୂଆ ରେକର୍ଡ ହେବାକୁ ଯାଉଛି । ବିକଶିତ ଓଡ଼ିଶା ଗଠନ ପ୍ରକ୍ରିୟା ରୂପାନ୍ତରଣ ଦ୍ବାରା ତ୍ବରାନ୍ବିତ ହୋଇଛି । ୨୪ରେ ନବୀନ ଦେଶ ରାଜନୀତିରେ ଇତିହାସ ରଚିବେ । ଓଡ଼ିଶାବାସୀ ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରି ଦେଶରେ ସବୁଠୁ ଲମ୍ବା ଅବଧିର ସିଏମ୍ ଭାବେ ରେକର୍ଡ କରିବାକୁ ମନସ୍ଥ କରିସାରିଛନ୍ତି । ମୁଖ୍ୟମନ୍ତ୍ରୀଙ୍କ ନିଦ୍ଦେର୍ଶରେ 5T ଅଧ୍ୟକ୍ଷ ଗ୍ରାଉଣ୍ଡରେ ବିଭିନ୍ନ ବିକାଶମୂଳକ କାର୍ଯ୍ୟକ୍ରମକୁ ନୂଆ ରୂପ ଦେବା ସହ ଲୋକଙ୍କ କଥାରେ ଶାସନ କଳକୁ ଆଗେଇ ନେଉଛନ୍ତି । ସବୁଠି ନୂଆ ଓଡ଼ିଶା ଓ ନବୀନ ଓଡ଼ିଶା ପ୍ରତିଛବି ପ୍ରତିଫଳିତ ହେଉଛି । ଏହା ବିଜେଡିକୁ ୨୦୨୪ ସାଧାରଣ ନିର୍ବାଚନରେ ବଡ ବିଜୟ ଦେବ ବୋଲି ବିଜେଡି କହିଛି ।
ତୃଣମୂଳସ୍ତରେ ସାମାଜିକ ଆନ୍ଦୋଳନରେ ପରିଣତ ହୋଇଥିବା ବିଜେଡିର ଗୁରୁଦାୟିତ୍ବ ମଧ୍ୟ ୨୦୨୪ରେ ବଢିବ । ସବୁ କ୍ଷେତ୍ରରେ ଓଡ଼ିଶାକୁ ଏକ ନମ୍ବର କରିବା ସହ ରାଜ୍ୟର ହକକୁ କେନ୍ଦ୍ର ପାଖରେ ଦୋହରାଇ ପୂରଣ କରିବା ଦଳ ପାଇଁ ରହିବ ଚ୍ୟାଲେଞ୍ଜ । ସେହିପରି କଂଗ୍ରେସ ନୂଆ ପ୍ରଭାରୀଙ୍କ ସହ ଏକଜୁଟ ହୋଇ ଲଢିବା ଦଳ ପାଇଁ ବଡ଼ ଆହ୍ବାନ ହେବ ବୋଲି ଦଳୀୟ ବିଧାୟକ ସୁରେଶ ରାଉତରାୟ କହିଛନ୍ତି।
ନିର୍ବାଚନ ଆଉ ୩ରୁ ୪ମାସ ଥିବା ବେଳେ ନୂଆବର୍ଷରେ ନୂଆ ଜୋସରେ ଲକ୍ଷ୍ୟ ପୂରଣ କରିବାକୁ ଅଣ୍ଟା ଭିଡ଼ିଛନ୍ତି ରାଜ୍ୟର ୩ ପ୍ରମୁଖ ରାଜନୈତିକ ଦଳ । ୨୩ରେ ୨୪ ପାଇଁ ପ୍ରସ୍ତୁତିରେ ଦୁଇ ବିରୋଧୀ ବିଜେପି ଓ କଂଗ୍ରେସଠାରୁ ଢେର ଆଗରେ ରହିଛି ବିଜେଡି । ୨୦୧୯ ସାଧାରଣ ନିର୍ବାଚନ ପରେ ଅନୁଷ୍ଠିତ ପଞ୍ଚାୟତ, ପୌର ଓ ବିଧାନସଭାର ଉପ ନିର୍ବାଚନରେ ଏହାର ପ୍ରତିଫଳନ ଦେଖିବାକୁ ମିଳିଛି । ୨୦୨୪ ନିର୍ବାଚନ ଫଳାଫଳ କ’ଣ ହେବ, ତାକୁ ନେଇ ବିଭିନ୍ନ ଜାତୀୟ ଗଣମାଧ୍ୟମ ସର୍ଭେରେ ଓଡ଼ିଶାରେ ପୁଣି ନବୀନ ଓ ବିଜେଡିକୁ ସ୍ପଷ୍ଟ ଜନମତ ମିଳିଛି ।
