ବ୍ୟୁରୋ ରିପୋର୍ଟ : ଭାରତ ବିରୋଧୀ ଟିପ୍ପଣୀ ପଡ଼ିଲା ମହଙ୍ଗା। ମାଳଦ୍ବୀପର ୩ ମନ୍ତ୍ରୀଙ୍କୁ ନିଲମ୍ବିତ କରିଛନ୍ତି ମାଳଦ୍ବୀପର ମୁଇଜୁ ସରକାର। ସୋସିଆଲ ମିଡିଆରେ ଭାରତ ବିରୋଧୀ ମନ୍ତବ୍ୟ ଦେଇଥିଲେ ମାଳଦ୍ବୀପର ୩ ମନ୍ତ୍ରୀ ମରିୟମ ଶିଉନା, ମାଲଶା ସରିଫ ଏବଂ ମହଜୁମ ମାଜିଦ । ଭାରତ ବିରୋଧରେ ଅସଭ୍ୟ ଭାଷାର ପ୍ରୟୋଗ କରିଥିବାରୁ ରାଷ୍ଟ୍ରପତି ମୁଇଜୁଙ୍କ ସରକାର ୩ ମନ୍ତ୍ରୀଙ୍କୁ ନିଲମ୍ବିତ କରିଛନ୍ତି। ମାଳଦ୍ବୀପର ୩ ମନ୍ତ୍ରୀ ଦେଇଥିବା ଅସଭ୍ୟ ଟିପ୍ପଣୀ ତାଙ୍କର ବ୍ୟକ୍ତିଗତ ବୋଲି କହିଛି ମାଳଦ୍ବୀପ। ଏଭଳି ଭାଷାର ବ୍ୟବହାର ସରକାର କରିପାରିବେ ନାହିଁ।
ଭାରତ ପ୍ରଧାନମନ୍ତ୍ରୀ ଲାକ୍ଷାଦ୍ବୀପ ଗସ୍ତ ସମୟର ଅନୁଭବ ସୋସିଆଲ ମିଡିଆ ଏକ୍ସରେ ପ୍ରକାଶ କରିଥିଲେ। ଲାକ୍ଷାଦ୍ବୀପର ପର୍ଯ୍ୟଟନସ୍ଥଳୀର ଉଚ୍ଚ ପ୍ରଶଂସା କରିବା ସହ ସେଠାରେ ସ୍ମୋର୍କଲିଂ କରିଥିଲେ। ଏହି ପୋଷ୍ଟକୁ ନେଇ ଅନେକ ୟୁଜର୍ସ ଲକ୍ଷାଦ୍ବୀପକୁ ମାଳଦ୍ବୀପର ବିକଳ୍ପ ପର୍ଯ୍ୟଟନସ୍ଥଳୀ ଭାବେ ଦର୍ଶାଇଥିଲେ। ଏହାପରେ ମାଳଦ୍ବୀପ ସରକାରଙ୍କ ନେତାଙ୍କ ପକ୍ଷରୁ ଆପତ୍ତିଜନକ ଟିପ୍ପଣୀ ସୋସିଆଲ ମିଡିଆରେ ଦେଖିବାକୁ ମିଳିଥିଲା।
ମାଳଦ୍ବୀପରେ ସରକାର ଗଠନ କରିଥିବା ପ୍ରୋଗ୍ରେସିଭ ପାର୍ଟି ଅଫ୍ ମାଳଦ୍ବୀପ ପିପିଏମ୍ ନେତାମାନେ ଆପତ୍ତିଜନକ ଟିପ୍ପଣୀ ଦେଇଥିଲେ । ଏହାପରେ ଭାରତ ପକ୍ଷରୁ ଟିପ୍ପଣୀକୁ ନେଇ କଡ଼ା ବିରୋଧ ପ୍ରକାଶ ପାଇଥିଲା। ଅନେକ ପର୍ଯ୍ୟଟକ ମାଳଦ୍ବୀପ ବୁଲି ଯିବାକୁ ଥିବା ହୋଟେଲ ଏବଂ ଫ୍ଲାଇଟ୍ ବୁକିଂ କ୍ୟାନସଲ କରିଥିଲେ। ଅନେକ ବଲିଉଡ ଅଭିନେତା ଏବଂ କ୍ରିକେଟର ଟୁଇଟ କରି ଏହି ବିବାଦୀୟ ବୟାନର ଘୋର ନିନ୍ଦା କରିଛନ୍ତି।
ଅନ୍ୟପଟେ ପ୍ରସଙ୍ଗକୁ ନେଇ ମାଲଦ୍ବୀପର ରାଷ୍ଟ୍ରଦୂତଙ୍କୁ ସମନ କରିଛି ଭାରତୀୟ ବୈଦେଶିକ ବିଭାଗ। ଭାରତରେ ଅବସ୍ଥାପିତ ମାଳଦ୍ବୀପ ରାଷ୍ଟ୍ରଦୂତ ଇବ୍ରାହିମ ସରିଫଙ୍କୁ ସମନ କରିବା ସହ ଜବାବ ରଖିବାକୁ କହିଛି ଭାରତୀୟ ବୈଦଶିକ ବିଭାଗ।
