ଭୁବନେଶ୍ବର: ଦୁଇ ଦଶନ୍ଧି ତଳେ ରାଜ୍ୟରେ ଘନ ଅର୍ଥନୈତିକ ସଙ୍କଟ ଲାଗିରହିଥିଲା। ବର୍ତ୍ତମାନ ରାଜସ୍ବ ପରିଚାଳନାରେ ଓଡିଶା ଉତ୍କର୍ଷତା ଲାଭ କରିଛି। ଦୁଇ ଦଶନ୍ଧି ତଳେ ରାଜ୍ୟରେ ବ୍ଯାପକ ଦାରିଦ୍ର୍ୟ ଓ ପୁଷ୍ଟିହୀନତା ଥିଲା। କେବିକେ ଅଞ୍ଚଳରେ ଦାରିଦ୍ର୍ଯ ଖବରର ଶୀର୍ଷରେ ଥିଲା। ମାତ୍ର ବର୍ତ୍ତମାନ ସେଠାରେ ଯଥେଷ୍ଟ ବିକାଶ ଘଟିଛି। ଏହି ଅଞ୍ଚଳ ଏବେ ଭାରତର ଭାତ ହାଣ୍ଡି ଭାବେ ଉଭା ହୋଇଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଇଣ୍ଡିଆ ଟୁଡେ କନକ୍ଲେଭରେ ଯୋଗଦେଇ ମୁଖ୍ୟମନ୍ତ୍ରୀ କହିଛନ୍ତି- ରାଜ୍ଯରେ ଅନେକ ବିପର୍ଯ୍ୟୟ ଆସିଛି। ତେବେ ଉଚିତ ପୂର୍ବପ୍ରସ୍ତୁତି ଯୋଗୁ ଧନଜୀବନ ରକ୍ଷା କରାଯାଇପାରିଛି। ଜୀବନ ରକ୍ଷାର ବାସ୍ତବ ଉଦାହରଣ ବିଶ୍ବବାସୀଙ୍କ ଆଗରେ ଓଡିଶା ଦେଖାଇପାରିଛି। କୋଭିଡ କାଳରେ ବି ଓଡିଶାର ପ୍ରମୁଖ ଭୂମିକା ଯୋଗୁ ଅନେକ ଜୀବନ ରକ୍ଷା ହୋଇପାରିଥିଲା।
ପୁଞ୍ଜିନିବେଶର ପ୍ରକୃଷ୍ଟ ଲକ୍ଷ୍ଯସ୍ଥଳ ସାଜିଛି ଓଡିଶା। ବର୍ତ୍ତମାନ ଓଡ଼ିଶା ଦକ୍ଷିଣ ଏସିଆର ଆଲୁମିନିୟମ ରାଜଧାନୀ ଓ ଦେଶର ଷ୍ଟିଲ ହବ ପାଲଟିଛି। ଦୁଇ ଦଶନ୍ଧି ତଳେ ୭୦ ପ୍ରତିଶତ ଲୋକ ଦାରିଦ୍ର୍ଯ ସୀମାରେଖା ତଳେ ଥିଲେ। ବର୍ତ୍ତମାନ ମାତ୍ର ୧୦ ପ୍ରତିଶତ ଲୋକ ଦାରିଦ୍ର୍ୟ ସୀମାରେଖା ତଳେ ରହିଛନ୍ତି। କୋଟିଏରୁ ଅଧିକ ଲୋକ ଦାରିଦ୍ର୍ଯରୁ ମୁକୁଳିଛନ୍ତି। ହକି ଓ ଅନ୍ଯାନ୍ୟ କ୍ରୀଡା କ୍ଷେତ୍ରରେ ରାଜ୍ଯର ଯଥେଷ୍ଟ ବିକାଶ ଘଟିଛି। ମିଶନ ଶକ୍ତି ଜରିଆରେ ମହିଳା ସଶକ୍ତିକରଣ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛି ଓଡିଶା। ୨୦୧୯ ଲୋକସଭା ନିର୍ବାଚନରେ ମହିଳାଙ୍କ ଲାଗି ଏକ ତୃତୀୟାଂଶ ଆସନ ସଂରକ୍ଷଣ କରି ଓଡ଼ିଶା ଉଦାହରଣ ସାଜିଛି। ବିଏସକେୱାଇ ଜରିଆରେ ରାଜ୍ଯବାସୀ ଉପକୃତ ହେଉଛନ୍ତି। ନୂଆ ଓ ସଶକ୍ତ ଓଡ଼ିଶା ଗଠନ ଦିଗରେ 5Tର ଗୁରୁତ୍ବପୂର୍ଣ୍ଣ ଭୂମିକା ରହିଛି। ଆସନ୍ତା ୨୦୩୬ ସୁଦ୍ଧା ନୂଆ ଓଡିଶା ଗଠନ ଆଭିମୁଖ୍ଯକୁ ସଫଳ ଲାଗି ସବୁସ୍ତରରୁ ଉଦ୍ୟମ ହେଉଛି ବୋଲି କହିଛନ୍ତି ମୁଖ୍ଯମନ୍ତ୍ରୀ।
