ଭୁବନେଶ୍ବର: ଖରାଦିନ ପୂର୍ବରୁ ବଜାରରେ ମହରଗ ଆଳୁ। ଅମଳ ସମୟରେ ବି ଉଚ୍ଚା ଦର। ପଖାଳ ସହ ଆଳୁ ସିଝା ଖାଇବାକୁ ବି ଲାଗୁଛି କଷ୍ଟ। ସାରା ରାଜ୍ୟରେ ଏବେ ନୂଆ ଆଳୁ ଆସିଥିବା ବେଳେ ହୋଲସେଲ୍ କିଲୋପ୍ରତି ୨୦ ଟଙ୍କା ଏବଂ ଖୁଚୁରା ବଜାରରେ ୨୫ ଟଙ୍କା ବିକ୍ରି ହେଉଛି।
ଚାହିଦା ଅନୁସାରେ କୋଲକାତାରୁ ଆଳୁ ଆସୁଥିବା ବେଳେ ଏବେ ପରିବହନ ଖର୍ଚ୍ଚ ଅଧିକ ରହୁଛି। ତା ସହ ଲେବର ଚାର୍ଜ ମିଶିଲେ କିଲୋ ପ୍ରତି ୧୦ ଟଙ୍କା ରୁ ଅଧିକ ଖର୍ଚ୍ଚ ହେଉଛି। ତେଣୁ ଦର ଅଧିକ ରହୁଛି ବୋଲି କହିଛନ୍ତି ବ୍ୟବସାୟୀ।
ତେବେ ମାସେ ଦେଢମାସ ମଧ୍ୟରେ ଦର ଆହୁରି କମିପାରେ ବୋଲି ବ୍ୟବସାୟୀ ଆଶା ରଖିଛନ୍ତି। କାରଣ ଏବେ ଯେତିକି ଆଳୁ ଆସୁଛି ତା ଅନୁସାରେ ଚାହିଦା ଅଧିକ ରହୁଥିବାରୁ ଦର ଟିକିଏ ଉଚ୍ଚା ରହୁଛି ବୋଲି ବ୍ୟବସାୟୀ କହିଛନ୍ତି। ସେପଟେ ସବୁ ଖାଦ୍ୟରେ ଆଳୁର ପ୍ରଧାନ ଆବଶ୍ୟକତା ରହୁଥିବାରୁ ଦର ଉଚ୍ଚା ପାଇଁ ଅସନ୍ତୋଷ ପ୍ରକାଶ କରିଛନ୍ତି ଗ୍ରାହକ।
