ନୋଏଡା : କୁକୁର ଶବ ସଂସ୍କାର କରିବାକୁ ଯାଇ ମାଡ ଖାଇଲେ ଯୁବକ । ନୋଏଡାର ସରାଫାବାଦରେ ଦେଖିବାକୁ ମିଳିଛି ଏଭଳି ଘଟଣା । ସୋମବାର ସକାଳେ ଏକ ପୋଷା କୁକୁରର ଶବ ସଂସ୍କାର କରିବାକୁ ପହଞ୍ଚିଥିବା ଯୁବକକୁ ଗାଁ ଲୋକ ପ୍ରବଳ ପିଟିଛନ୍ତି । ସୂଚନା ଅନୁଯାୟୀ, ଘଟଣା ସ୍ଥଳରେ ପୋଲିସ ପହଞ୍ଚି କୁକୁରର ଶବକୁ ପୋତିବା ପରେ ସଂପୃକ୍ତ ଯୁବକକୁ ହେପାଜତରେ ନେଇଛି । ଘଟଣା ସମୟରେ ଶ୍ମଶାନରେ ହୋଇଥିବା ହୋ ହାଲ୍ଲାର ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି ।
ସୂଚନା ଅନୁଯାୟୀ, ସେକ୍ଟର ୩୬ରେ ପ୍ରଜ୍ଜ୍ୱଳ ଚୌହ୍ୱାନ ନାମକ ଯୁବକ ୩ ବର୍ଷ ହେବ ନିଜର ଏ ପୋଷା କୁକୁର ଇନ୍ଦୁମତି ସହ ରହୁଥିଲେ । କିନ୍ତୁ ରବିବାର ରାତିରେ କୁକୁରଟିର ରୋଗାଗ୍ରସ୍ତ କାରଣରୁ ମୃତ୍ୟୁ ଘଟିଥିଲା । କୁକୁରର ଅନ୍ତମ ସଂସ୍କାର ପାଇଁ ସେ ଅନଲାଇନରେ ପଣ୍ଡିତଙ୍କୁ ବୁକ୍ କରିଥିଲେ । ଯେତେବେଳେ ସେ ଶବ ସଂସ୍କାର ପାଇଁ ଶ୍ମଶାନ ପହଞ୍ଚିଲେ ଯାହାର ଖବର ପାଇ ସ୍ଥାନୀୟ ଲୋକ ଏହାକୁ ବିରୋଧ କରିବାକୁ ପହଞ୍ଚି ଯାଇଥିଲେ । ସ୍ଥାନୀୟ ଲୋକଙ୍କ ବିରୋଧ ସତ୍ତ୍ୱେ ସେ ଏହି ଶବ ସଂସ୍କାର ରୀତିନୀତିକୁ ବନ୍ଦ କରି ନଥିଲେ । ଯାହା ପରେ ସେମାନେ ପୋଲିସରେ ଅଭିଯୋଗ କରିଥିଲେ ।
ଯୁବକଙ୍କ କହିବା ଅନୁଯାୟୀ , କୁକୁରଟି ତାଙ୍କ ଏକ ପରିବାର ସଦସ୍ୟ ପରିଥିଲା । ସେଥିପାଇଁ ସବୁ ରୀତିନୀତି ଅନୁଯାୟୀ ତାର ଶବ ସଂସ୍କାର କରିବାକୁ ସେ ଚାହୁଁଥିଲେ । କିନ୍ତୁ ଗାଁ ଲୋକଙ୍କ ଅନୁଯାୟୀ ସେହି ଶ୍ମଶାନରେ ତାଙ୍କ ପୂର୍ବପୁରୁଷ ଏବଂ ଆତ୍ମୀୟ ଲୋକଙ୍କ ଶବ ସଂସ୍କାର ହୋଇଛି ଏବଂ କେବେ ଏଠି କୌଣସି ପଶୁ ପକ୍ଷୀଙ୍କ ଶବ ଦାହ କରାଯାଏ ନାହିଁ କି ସେଠାରେ ସେମାନେ ଏହା କରେଇ ଦେବେ ନାହିଁ । ଏହି କଥା ନେଇ ସେଠାରେ ହୋହାଲ୍ଲା ଆରମ୍ଭ ହୋଇଯାଇଥିଲା ଏବଂ ଯୁବକଙ୍କ ଉପରେ ମାଡ ବି ପଡିଥିଲା ।
