ନନ୍ଦିଘୋଷ ବ୍ୟୁରୋ: କେନିୟାରେ ବିଦ୍ରୋହ। ପାର୍ଲାମେଣ୍ଟ ଜାଳିଦେଲେ ଲୋକେ। ପୋଲିସର ଗୁଳିମାଡ଼ରେ ୧୦ ନାଗରିକଙ୍କ ମୃତ୍ଯୁ ହୋଇଥିବା ଜଣାପଡିଛି। ଅନେକ ନାଗରିକ ଆହତ ହୋଇଛନ୍ତି। କେନିୟାରେ ନୂଆ ଆୟକର ନିୟମକୁ ବିରୋଧ କରି ଆନ୍ଦୋଳନ କରୁଥିଲେ ଜନତା। ଆନ୍ଦୋଳନ୍ ଜୋର ଧରିବା ସହ ହିଂସାତ୍ମକ ହୋଇଥିଲା। ରାଜଧାନୀ ନାଇରୋବିରେ ପାର୍ଲାମେଣ୍ଟ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ । ପୋଲିସକୁ ଆକ୍ରମଣ କରିବା ସହ ପାର୍ଲାମେଣ୍ଟ ଭିତରକୁ ଜୋର ଜବରଦସ୍ତ ପଶିଥିଲେ। ପାର୍ଲାମେଣ୍ଟରେ ପଶି ନିଆଁ ଲଗାଇ ଦେଇଥିଲେ ଆନ୍ଦୋଳନକାରୀ। ବିକ୍ଷୋଭକାରୀଙ୍କୁ ଘଉଡ଼ାଇବାକୁ ପୋଲିସ ପାଣି ଓ ଲାଠି ମାଡ଼ କରିଥିଲା। ଶେଷରେ ଗୁଳିମାଡ଼ରେ ଯାଇଛି ୫ ଜଣଙ୍କ ଜୀବନ। ନିକଟରେ ପାର୍ଲାମେଣ୍ଟରେ ଗୃହୀତ ହୋଇଥିଲା ଆର୍ଥିକ ବିଲକୁ ନେଇ ଏହି ବିରୋଧ ତେଜିଛି। ଆନ୍ଦୋଳନକାରୀମାନଙ୍କ ସହ ପୋଲିସର ଜୋରଦାର ସଂଘର୍ଷ ହୋଇଛି।
ସଂସଦର ପରିସର ଭିତରେ ପଶି ଆନ୍ଦୋଳନକାରୀ ବିଭିନ୍ନ ସ୍ଥାନରେ ନିଆଁ ଲଗାଇଦେଇଛନ୍ତି। ଆନ୍ଦୋଳନକାରୀଙ୍କୁ ଘଉଡାଇବା ଲାଗି ପୋଲିସ ଲୁହବୁହା ଗ୍ଯାସ ପ୍ରୟୋଗ କରିବା ସହ ପାଣିମାଡ କରିଛି। ବିଲକୁ ବିରୋଧ କରି ସାଂସଦମାନ ଇସ୍ତଫା ଦିଅନ୍ତୁ ବୋଲି ଦାବି କରିଛନ୍ତି ଆନ୍ଦୋଳନକାରୀ। କେବଳ ସଂସଦ ଭବନ ପରିସରରେ ନୁହେଁ ଦେଶର ଅନେକ ସହରରେ ବି ଆନ୍ଦୋଳନର ନିଆଁ ବ୍ଯାପିଛି। ଦେଶରେ ବ୍ଯାପକ ସଙ୍କଟ ଜାରି ରହିଥିବାବେଳେ ଟାକ୍ସ ବୃଦ୍ଧିକୁ ସାରା ଦେଶରେ ବିରୋଧ କରାଯାଇଛି। ଏପରିକି ରାଷ୍ଟ୍ରପତି ୱିଲିୟ ରୁଟୋ ଇସ୍ତଫା ଦିଅନ୍ତୁ ବୋଲି ଆନ୍ଦୋଳନକାରୀ ଦାବି କରିଛନ୍ତି। କୋଭିଡ ଓ ୟୁକ୍ରେନ ଯୁଦ୍ଧ ପରଠାରୁ ଦେଶରେ ଅର୍ଥନୈତିକ ସ୍ଥିତି ଅତ୍ଯନ୍ତ ଘନୀଭିତ ହୋଇଛି। ଏହି ଆର୍ଥିକ ବିଲରେ ୨ ଦଶମିକ ୭ ବିଲିୟନ ଡଲାରର ଅତିରିକ୍ତ ଆୟ ଲକ୍ଷ ରଖାଯାଇଛି। ଗୋଟିଏ ପଟେ ମରୁଡି ସ୍ଥିତି ଥିବାବେଳେ ଅନ୍ଯ ପଟେ ରନ୍ଧନ ତେଲ, ପାଉଁରୁଟି, କାର ଆଦି ଉପରେ ଅଧିକ କର ପ୍ରସ୍ତାବ ରହିଛି।
