ଜମାକାରୀଙ୍କ ୪୦ ଲକ୍ଷ ହଡ଼ପ କରି ପୋଷ୍ଟମାଷ୍ଟର ଫେରାର୍

କେନ୍ଦ୍ରାପଡ଼ା: ଜମାକାରୀଙ୍କ ୪୦ ଲକ୍ଷ ହଡ଼ପ କରି ପୋଷ୍ଟମାଷ୍ଟର ଫେରାର୍। ଏହି ଅଭିଯୋଗ ଆସିଛି କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ସଂସାରଫଳ ପୋଷ୍ଟ ଅଫିସରୁ। ପୋଷ୍ଟରମାଷ୍ଟର ହେଲେ ଜନତ ରାଉତ । ପ୍ରାୟ ୧୫୦ ଜମାକାରୀଙ୍କ ସବୁ ଟଙ୍କା ନେଇ ସେ ଫେରାର ହୋଇଯାଇଛନ୍ତି। ସେ ବହୁ ଦିନ ଧରି ଅଫିସ ନ ଆସିବାରୁ ଲୋକଙ୍କ ସନ୍ଦେହ ହୋଇଥିଲା ଏବଂ ସେମାନେ ଉପଖଣ୍ଡସ୍ତରୀୟ ପୋଷ୍ଟ ଅଫିସକୁ ଯାଇ ବୁଝାବୁଝି କରିବା ପରେ ଏହା ଜଣାପଡ଼ିଥିଲା ଯେ, ଲୋକେ ଯେତେ ଟଙ୍କା ଜମା କରିଛନ୍ତି, ପାସବୁକରେ ଯେତେ ଟଙ୍କାର ଷ୍ଟାମ୍ପ ବାଜିଛି, ପ୍ରକୃତରେ ସେତିକି ଟଙ୍କା ସେ ଜମା କରି ନାହାନ୍ତି। ଏନେଇ ଚିନ୍ତାରେ ଜମାକାରୀ । ଭବିଷ୍ଯତରେ ପାଇଁ ଲୋକେ ଜମା ରଖିଥିବା ସବୁ ଟଙ୍କା ନେଇ ପୋଷ୍ଟ ମାଷ୍ଟର ଜନତ ରାଉତ ଛୁ ମାରିଛି। ଲକ୍ଷେ ଅଧେ ନୁହେଁ, ୪୦ ଲକ୍ଷ ଟଙ୍କା ନେଇ ଫେରାର।

ଆଜି ନୂଆ ପୋଷ୍ଟ ମାଷ୍ଟର ଓ ନିରୀକ୍ଷକଙ୍କୁ ଘେରାଉ କରିଥିଲେ ଜମାକାରୀ। ମାସକ ଭିତରେ ସମାଧାନ ଓ ସଂପୃକ୍ତ ପୋଷ୍ଟମାଷ୍ଟରଙ୍କୁ ବହିଷ୍କାର ପାଇଁ ପ୍ରତିଶୃତି ଦେବା ପରେ ଲୋକେ ଶାନ୍ତ ହୋଇଛନ୍ତି। ଏହା ଆଗରୁ ରାଜନଗର କୃଷ୍ଣନଗର ପୋଷ୍ଟ ଅଫିସରେ ମଧ୍ଯ ୫୦ ଲକ୍ଷର ଘୋଟାଲା ହୋଇଥିବାର ଅଭିଯୋଗ ହୋଇଥିଲା।