ନନ୍ଦିଘୋଷ ବ୍ୟୁରୋ : ଗତ ୨୭ ତାରିଖ କଂଗ୍ରେସର ବିଧାନସଭା ଘେରାଉ ବେଳେ ଉପୁଜିଥିବା ଆଇନଶୃଙ୍ଖଳା ପରିସ୍ଥିତିକୁ ନେଇ ପିସିସି ସଭାପତିଙ୍କ ସମେତ କଂଗ୍ରେସର ସବୁ ବିଧାୟକଙ୍କ ବିରୋଧରେ ମାମଲା କରିଛି ପୋଲିସ। କ୍ୟାପିଟାଲ ଥାନା ପିସିସି ସଭାପତିଙ୍କ ସମେତ ୫ ହଜାରରୁ ଅଧିକ କଂଗ୍ରେସ କର୍ମୀଙ୍କ ବିରୋଧରେ ମାମଲା ରୁଜୁ ହୋଇଛି। ବିଏନଏସ ୧୮୯(୨), ୧୯୧(୨), ୧୨୬(୨), ୧୩୨, ୧୨୧(୧), ୩୨୪(୪)ରେ ମାମଲା ରୁଜୁ ହୋଇଛି। ଏହାକୁ ନେଇ ଆଜି ପିସିସି ସଭାପତି ଓ ସବୁ ବିଧାୟକ ହାଇକୋର୍ଟରେ ଆଗୁଆ ଜାମିନ ଆବେଦନ କରିଛନ୍ତି। ରାଜ୍ୟରେ ମହିଳା ନିର୍ଯାତନା ରୋକିବାରେ ରାଜ୍ୟ ସରକାରଙ୍କ ବିଫଳତା ବିରୋଧରେ କଂଗ୍ରେସ ବିଧାନସଭା ଘେରାଉ କରିଥିଲା। ତାପୂର୍ବରୁ ବିଧାନସଭାରେ କଂଗ୍ରେସ ଏହାକୁ ନେଇ ବାରମ୍ବାର ହଟ୍ଟଗୋଳ କରି ଗାନ୍ଧି ମୂର୍ତ୍ତି ତଳେ ଧାରଣା ଦେଇ ଆସୁଥିଲା। କିନ୍ତୁ ସରକାରୀ ଦଳ କଂଗ୍ରେସ ବିଧାୟକଙ୍କ ଉଦବେଗକୁ ଗୁରୁତ୍ବ ଦେବା ବଦଳରେ ସବୁ ବିଧାୟକଙ୍କୁ ନିଲମ୍ବନ କରିଥିଲା।
