ହସ୍ପିଟାଲରେ ରୋଗୀଙ୍କ ପ୍ୟାଣ୍ଟରେ ଫାଟିଲା ମୋବାଇଲ୍, ଭୟରେ ଦୌଡିଲେ ରୋଗୀ

ନନ୍ଦିଘୋଷ ବ୍ୟୁରୋ: ରୋଗୀଙ୍କ ପ୍ୟାଣ୍ଟରେ ଫାଟିଲା ମୋବାଇଲ୍ । ଜଳିପୋଡି ପାୁଁଶ ହୋଇଗଲା ରୋଗୀଙ୍କ ଫୋନ । ଏଭଳି ଅଭାବନୀୟ ଘଟଣା ଘଟିଛି ଉତ୍ତରପ୍ରଦେଶର ବାରବାଙ୍କିର ଜିଲ୍ଲା ହସ୍ପିଟାଲରେ । ଏଠାରେ ଭର୍ତ୍ତି ହୋଇଥିବା ଜଣେ ରୋଗୀଙ୍କ ପ୍ୟାଣ୍ଟର ପକେଟରେ ରଖାଯାଇଥିବା ମୋବାଇଲ୍ ଫୋନ୍ ବିସ୍ଫୋରଣ ହେବାରୁ ଏହି ପରିସ୍ଥିତି ସୃଷ୍ଟି ହୋଇଥିଲା। ଜୋରରେ ବିସ୍ଫୋରଣ ଶୁଣି ରୋଗୀମାନେ ଭୟଭୀତ ହୋଇଯାଇଥିଲେ। ହସ୍ପିଟାଲ କର୍ମଚାରୀମାନେ ମଧ୍ୟ ଦୌଡ଼ି ପଳାଇଥିଲେ । ତେବେ ତୁରନ୍ତ ହସ୍ପିଟାଲର କିଛି କର୍ମଚାରୀମାନେ ଅଗ୍ନି ନିର୍ବାପକ ସିଲିଣ୍ଡର ସାହାଯ୍ୟରେ ନିଆଁକୁ ନିୟନ୍ତ୍ରଣ କରିଥିଲେ ଯାହାଦ୍ବାରା ପରିସ୍ଥିତି ନିୟନ୍ତ୍ରଣକୁ ଆସିଥିଲା । ସୂଚନା ପାଇବା ପରେ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚିଥିଲା ।

ସୂଚନା ଅନୁଯାୟୀ ବାରବାଙ୍କିର ଉଜ୍ଜ୍ୱଳ ନଗରରେ ରହୁଥିବା ଅବନିଶ ପାଲ ତାଙ୍କ ବାଇକ୍ ଯୋଗେ ଲକ୍ଷ୍ନୌ ଯାଉଥିଲେ। ସେ କିଛି ଦୂର ଯିବା ପରେ ତାଙ୍କ ବାଇକ୍ ଏକ କାର ସହିତ ଧକ୍କା ହୋଇଥିଲା। ଏହି ଦୁର୍ଘଟଣାରେ ସେ ଗୁରୁତର ଆହତ ହୋଇଥିଲେ। ଘଟଣାସ୍ଥଳରେ ଉପସ୍ଥିତ ଲୋକମାନେ ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲକୁ ନେଇଥିଲେ। ତାଙ୍କୁ ହସ୍ପିଟାଲର ଜରୁରୀକାଳୀନ ୱାର୍ଡରେ ଚିକିତ୍ସା କରାଯାଉଥିଲା। ଏହି ସମୟରେ ତାଙ୍କ ପ୍ୟାଣ୍ଟ ପକେଟରେ ରଖାଯାଇଥିବା ମୋବାଇଲ୍ ଫୋନ୍ରୁ ଧୂଆଁ ବାହାରିବାକୁ ଲାଗିଲା। ସେ କିଛି ବୁଝିବା ପୂର୍ବରୁ, ମୋବାଇଲ୍ ବିସ୍ଫୋରଣ ହୋଇ ନିଆଁ ଲାଗିଗଲା ।

ସର୍ଟସର୍କିଟ ଯୋଗୁଁ ମୋବାଇଲରେ ଲାଗିଗଲା ନିଆଁ

ଘଟଣା ସମୟରେ ୱାର୍ଡରେ ଥିବା ଅଧିକାଂଶ ରୋଗୀ ଶୋଇଥିଲେ। ବିସ୍ଫୋରଣ ଶବ୍ଦ ଶୁଣି ସମସ୍ତେ ଉଠିପଡ଼ିଲେ ଏବଂ ସେଠାରେ ଦଳାଚକଟା ପରିସ୍ଥିତ ସୃଷ୍ଟି ହୋଇଗଲା। ହସ୍ପିଟାଲର କର୍ମଚାରୀମାନେ ମଧ୍ୟ ଭୟଭୀତ ହୋଇ ବାହାରକୁ ଦୌଡ଼ିବାକୁ ଲାଗିଲେ। କିନ୍ତୁ ପରିସ୍ଥିତି ସ୍ପଷ୍ଟ ହେବା ପରେ ହସ୍ପିଟାଲର କର୍ମଚାରୀମାନେ ଅଗ୍ନି ନିର୍ବାପକ ସିଲିଣ୍ଡର ସାହାଯ୍ୟରେ ନିଆଁକୁ ନିୟନ୍ତ୍ରଣ କରିଥିଲେ। ଏହି ଘଟଣାରେ ଅବନିଶଙ୍କ ମୋବାଇଲ ଫୋନ୍ ପୋଡ଼ି ପାଉଁଶ ହୋଇଯାଇଥିଲା, କିନ୍ତୁ ସୌଭାଗ୍ୟବଶତଃ ଏହି ଘଟଣାରେ କେହି ଆହତ ହୋଇନାହାଁନ୍ତି। କୁହାଯାଉଛି ଯେ ଦୁର୍ଘଟଣାରେ ମୋବାଇଲ୍ ଫୋନ୍ ମଧ୍ୟ କ୍ଷତିଗ୍ରସ୍ତ ହୋଇଥିଲା ଏବଂ ଏହିକାରଣରୁ ସର୍ଟସର୍କିଟ୍ ହୋଇଥିଲା। ଯାହାଫଳରେ କି ଏଥିରେ ନିଆଁ ଲାଗିଯାଇଥିଲା।

ରୋଗୀଙ୍କ ମଧ୍ୟରେ ଆତଙ୍କ

ବିସ୍ଫୋରଣ ଶବ୍ଦ ଶୁଣି ହସ୍ପିଟାଲରେ ଭର୍ତ୍ତି ହୋଇଥିବା ସମସ୍ତ ରୋଗୀ ଏବଂ ସେମାନଙ୍କ ସମ୍ପର୍କୀୟମାନେ ଭୟଭୀତ ହୋଇଯାଇଥିଲେ। ଏହି କାରଣରୁ ହସ୍ପିଟାଲରେ ବହୁତ ସମୟ ପର୍ଯ୍ୟନ୍ତ ଉତ୍ତେଜନା ଲାଗି ରହିଥିଲା। ତଥାପି, ସମ୍ପୂର୍ଣ୍ଣ ଘଟଣାର ସୂଚନା ମିଳିବା ପରେ, ପରିସ୍ଥିତି ଧୀରେ ଧୀରେ ସ୍ୱାଭାବିକ ହୋଇଥିଲା। ଘଟଣାର ସୂଚନା ପାଇବା ପରେ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଥିଲା। ପୋଲିସର କହିବା ଅନୁଯାୟୀ, ମୋବାଇଲ୍ ଫାଟିବା ଯୋଗୁଁ ବିସ୍ଫୋରଣ ଘଟିଥିଲା। ଏହି ଦୁର୍ଘଟଣା ସମ୍ଭବତଃ ସର୍ଟ ସର୍କିଟ୍ ଯୋଗୁଁ ଘଟିଛି। ପୋଲିସର କହିବା ଅନୁଯାୟୀ, ମୋବାଇଲ୍ ଫୋନଟି ମୋଟୋରୋଲା କମ୍ପାନୀର ଥିଲା।