ହନିମୁନ୍ ହତ୍ୟାକାଣ୍ଡରେ ରାଜ୍ କୁଶୱାହା କିଏ ?
ନନ୍ଦିଘୋଷ ବ୍ୟୁରୋ: ଇନ୍ଦୌରରୁ ମେଘାଳୟ ହନିମୁନ୍ ପାଇଁ ଯାଇଥିବା ଦମ୍ପତି ରାଜା ରଘୁବଂଶୀ ଓ ସୋନମଙ୍କ କାହାଣୀ ଏବେ ସମ୍ପୂର୍ଣ୍ଣ ବଦଳି ଯାଇଛି । ରାଜା ରଘୁବଂଶୀଙ୍କ ମୃତଦେହ ମିଳିବା ପରେ ସୋନମଙ୍କୁ ତାଙ୍କ ହତ୍ୟା ଅଭିଯୋଗରେ ଗିରଫ କରାଯାଇଛି । ସୋମବାର ସକାଳେ ସୋନମ ଉତ୍ତରପ୍ରଦେଶର ଗାଜୀପୁରରେ ଆତ୍ମସମର୍ପଣ କରିଥିଲେ। ସୋନମଙ୍କ ସହ ଆଉ ତିନିଜଣଙ୍କୁ ମଧ୍ୟ ରାଜାଙ୍କ ହତ୍ୟା ମାମଲାରେ ଗିରଫ କରାଯାଇଛି । ପୋଲିସ୍ ଅନୁସାରେ, ସୋନମ ସୁପାରୀ ଦେଇ ନିଜ ସ୍ୱାମୀ ରାଜା ରଘୁବଂଶୀଙ୍କୁ ହତ୍ୟା କରିଥିଲେ। ମେଘାଳୟର ମୁଖ୍ୟମନ୍ତ୍ରୀ କୋନରାଡ ସାଙ୍ଗମା ନିଜେ ଟ୍ୱିଟ୍ କରି ଏହି ସୂଚନା ଦେଇଥିଲେ ।
ମେଘାଳୟର ଡିଜିପି ଇଦାଶିଶା ନୋଙ୍ଗରାଙ୍ଗ କହିଛନ୍ତି ଯେ ସୋନମ ନିଜ ସ୍ୱାମୀଙ୍କ ହତ୍ୟା ପାଇଁ ସୁପାରୀ ଦେଇଥିଲେ। ଜଣେ ଅଭିଯୁକ୍ତଙ୍କୁ ଉତ୍ତରପ୍ରଦେଶରୁ ଗିରଫ କରାଯାଇଛି, ଏବଂ ଦୁଇ ଅଭିଯୁକ୍ତଙ୍କୁ ଏସ୍ଆଇଟି ଇନ୍ଦୌରରୁ ଗିରଫ କରିଛି । ଗିରଫ ଅଭିଯୁକ୍ତମାନେ ଆଉ କିଛି ଲୋକଙ୍କ ନାମ ପ୍ରକାଶ କରିଛନ୍ତି । ଏହାପୂର୍ବରୁ ସୋନମ ଉତ୍ତରପ୍ରଦେଶର ନନ୍ଦଗଞ୍ଜ ଥାନାରେ ଆତ୍ମସମର୍ପଣ କରିଥିଲେ ଏବଂ ପରେ ତାଙ୍କୁ ଗିରଫ କରାଯାଇଥିଲା ।
ମାମଲାରେ ଏକ ନୂଆ ମୋଡ଼ ତେବେ ଆସିଲା, ଯେତେବେଳେ ସୋନମଙ୍କ ଗିରଫ ପରେ ରାଜ କୁଶୱାହା ନାମକ ଜଣେ ବ୍ୟକ୍ତିଙ୍କ ନାମ ସାମ୍ନାକୁ ଆସିଲା। ଏକ ରିପୋର୍ଟ ଅନୁସାରେ, ବିବାହ ପୂର୍ବରୁ ସୋନମଙ୍କର ରାଜ କୁଶୱାହାଙ୍କ ସହ ପ୍ରେମ ସମ୍ପର୍କ ଥିଲା। ଏହାକୁ ନେଇ ଅନୁମାନ କରାଯାଉଛି ଯେ ନିଜର ଏହି ପ୍ରେମ ସମ୍ପର୍କ ପାଇଁ ସୋନମ ରାଜା ରଘୁବଂଶୀଙ୍କୁ ସୁପାରୀ ଦେଇ ହତ୍ୟା କରିଥିଲେ।
ହନିମୁନ୍ କିପରି ହେଲା ହତ୍ୟାକାଣ୍ଡ ?
ରାଜା ରଘୁବଂଶୀ ଓ ସୋନମଙ୍କ ବିବାହ ଗତ ମାସରେ ୧୧ ମେ’ରେ ହୋଇଥିଲା । ବିବାହର ୯ ଦିନ ପରେ ଦୁହେଁ ହନିମୁନ୍ ପାଇଁ ବେଙ୍ଗାଲୁରୁ ହେଇ ଗୁୱାହାଟୀ ପହଞ୍ଚିଥିଲେ ଏବଂ ମା’ କାମାକ୍ଷା ଦେବୀଙ୍କ ଦର୍ଶନ କରିଥିଲେ । ଏଠାରୁ ରାଜା ଓ ସୋନମ ହନିମୁନ୍ ମନାଇବା ପାଇଁ ମେଘାଳୟ ଅଭିମୁଖେ ଯାତ୍ରା କରିଥିଲେ। ମେଘାଳୟ ପହଞ୍ଚି ଦୁହେଁ ଶିଲଂ ଯାଇଥିଲେ ଏବଂ ଏକ ସ୍କୁଟି ଭଡ଼ାରେ ନେଇଥିଲେ । ୨୨ ମେ’ରେ ପରିବାର ସହ ଶେଷ ଥର ପାଇଁ କଥା ହୋଇଥିଲା ଏବଂ ଏହାପରେ ଦୁହେଁ ନିଖୋଜ ହୋଇଯାଇଥିଲେ । ଯେତେବେଳେ ପରିବାରର ସମ୍ପର୍କ ରାଜା ଓ ସୋନମଙ୍କ ସହ ହୋଇ ପାରିଲା ନାହିଁ, ମେଘାଳୟ ପୁଲିସକୁ ସେମାନଙ୍କ ନିଖୋଜ ହେବା ଅଭିଯୋଗ ଦିଆଯାଇଥିଲା ଏବଂ ଦୁହିଁଙ୍କୁ ଖୋଜା ଆରମ୍ଭ ହୋଇଥିଲା। ୧୧ ଦିନ ପରେ ରାଜା ରଘୁବଂଶୀଙ୍କ ମୃତଦେହ ଏକ ଖାଇରେ ମିଳିଥିଲା। ମୃତଦେହ ପାଖରେ ଏକ କାଠ କାଟିବା ଦାଆ ମଧ୍ୟ ମିଳିଥିଲା। ରାଜାଙ୍କ ପର୍ସ, ଘଣ୍ଟା, ସୁନା ଚେନ୍, ଅଙ୍ଗୁଠି ଏବଂ ହୀରା ବ୍ରେସଲେଟ୍ ନିଖୋଜ ଥିଲା। ଏହା ସହ ଏକ ମହିଳାଙ୍କ ସେଫଟି ସାର୍ଟ ମଧ୍ୟ ରାଜାଙ୍କ ମୃତଦେହ ପାଖରେ ମିଳିଥିଲା।
ସମ୍ପୂର୍ଣ୍ଣ କାହାଣୀ ବଦଳି ଗଲା
ପ୍ରାରମ୍ଭରେ ମନେ ହେଉଥିଲା ଯେ ରାଜା ଓ ସୋନମଙ୍କ ସହ ଲୁଟ୍ ହୋଇଛି । ହତ୍ୟାକାରୀମାନେ ଲୁଟ୍ ଉଦ୍ଦେଶ୍ୟରେ ସେମାନଙ୍କ ଉପରେ ଆକ୍ରମଣ କରିଥାଇ ପାରନ୍ତି। ରାଜାଙ୍କ ହତ୍ୟା ପରେ ସୋନମଙ୍କୁ ଖୋଜିବା ପାଇଁ ତୀବ୍ର ଅନୁସନ୍ଧାନ ଆରମ୍ଭ ହେଲା । ପୁଲିସ୍, ଏସ୍ଡିଆର୍ଏଫ୍, ଏନ୍ଡିଆର୍ଏଫ୍, ଏସ୍ଓଟି ଏବଂ ଡ୍ରୋନ୍ ସାହାଯ୍ୟରେ ଏକ ବଡ଼ ଧରଣର ଅନୁସନ୍ଧାନ ଅଭିଯାନ ଆରମ୍ଭ ହେଲା । ଖାଇରେ ଏନ୍ଡିଆର୍ଏଫ୍ ଯବାନମାନେ ଓହ୍ଲାଇ ସବୁ ସ୍ଥାନକୁ ଖୋଜାଖୋଜି କରିଥିଲେ । କିନ୍ତୁ ସୋମବାର ଯେତେବେଳେ ସୋନମଙ୍କ ଆତ୍ମସମର୍ପଣର ଖବର ଆସିଲା, କାହାଣୀ ସମ୍ପୂର୍ଣ୍ଣ ବଦଳି ଗଲା। ମେଘାଳୟର ମୁଖ୍ୟମନ୍ତ୍ରୀ କୋନରାଡ ସାଙ୍ଗମା ଟ୍ୱିଟ୍ କରି କହିଥିଲେ, ‘ସାତ ଦିନ ମଧ୍ୟରେ ମେଘାଳୟ ପୁଲିସ୍ ରାଜା ରଘୁବଂଶୀ ହତ୍ୟାକାଣ୍ଡରେ ଏକ ବଡ଼ ସଫଳତା ହାସଲ କରିଛି। ତିନି ଆକ୍ରମଣକାରୀଙ୍କୁ ଗିରଫ କରାଯାଇଛି ଏବଂ ମହିଳା ଜଣେ ଆତ୍ମସମର୍ପଣ କରିଛନ୍ତି । ଆଉ ଜଣେ ଆକ୍ରମଣକାରୀଙ୍କୁ ଧରିବା ପାଇଁ ଅଭିଯାନ ଜାରି ରହିଛି ।’
