ମହୁଆ ମୋଇତ୍ରାଙ୍କ ବିବାଦୀୟ ବୟାନ: ଅମିତ ଶାହଙ୍କ ମୁଣ୍ଡ କାଟି ଟେବୁଲରେ ରଖିଦେବା ଦରକାର

ନନ୍ଦିଘୋଷ ବ୍ୟୁରୋ: କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ନେଇ ଟିଏମସି ସାଂସଦ ମହୁଆ ମୋଇତ୍ରାଙ୍କ ବିବାଦୀୟ ବୟାନ । ଅନୁପ୍ରବେଶକାରୀକୁ ନେଇ ଶାହଙ୍କ ମୁଣ୍ଡ କାଟି ଟେବୁଲ ଉପରେ ରଖି ଦେବାକୁ କହିଛନ୍ତି ମହୁଆ । ପଣ୍ଚିମବଙ୍ଗରେ ବେଆଇନ ଅନୁପ୍ରବେଶକୁ ନେଇ କାର୍ଯ୍ୟାନୁଷ୍ଠାନକୁ ନେଇ ଏପରି ଆପତ୍ତିଜନକ ବୟାନ ଦେଇଛନ୍ତି ମହୁଆ । ନିଜ ଭାଷଣରେ ମହୁଆ ଦର୍ଶାଇଛନ୍ତି ଯେ, ବେଆଇନ ଅନୁପ୍ରବେଶ ପାଇଁ କେନ୍ଦ୍ର ସରକାରଙ୍କ ଏବଂ ତାଙ୍କ ଏଜେନ୍ସି ସମ୍ପୂର୍ଣ୍ଣ ଭାବେ ଦାୟୀ ।

‘ମୁଣ୍ଡ କାଟି ଟେବୁଲରେ ରଖି ଦିଅ’

ସେ କହିଛନ୍ତି, ମୁଁ ପଚାରିବାକୁ ଚାହେଁ, ସେ (ଅମିତ ଶାହ) କେବଳ ଅନୁପ୍ରବେଶ ଅନୁପ୍ରବେଶ ଚିଲ୍ଲାଉଛନ୍ତି । ସୀମା ସୁରକ୍ଷାରେ ଥିବା ଏଜେନ୍ସ କେନ୍ଦ୍ର ଗୃହ ମନ୍ତ୍ରାଳୟ ଅଧୀନରେ ଆସୁଛି । ପ୍ରଧାନମନ୍ତ୍ରୀ ଲାଲକିଲ୍ଲାରୁ ଅଗଷ୍ଟ ୧୫ ତାରିଖରେ କହିଥିଲେ ଅନୁପ୍ରବେଶ ହେଉଛି ଓ ଏହି କାରଣରୁ ଜନସଂଖ୍ୟାରେ ପରିବର୍ତ୍ତନ ଘଟୁଛି । ପ୍ରଧାନମନ୍ତ୍ରୀ ଏ କଥା କହୁଥିବା ବେଳେ ପ୍ରଥମ ଧାଡିରେ ବସିଥିବା ଅମିତ ଶାହ ତାଳି ବଜାଉଥିଲେ ।

ଆଗକୁ ସେ କହିଛନ୍ତି, ଯଦି ଭାରତର ସୀମାକୁ ସୁରକ୍ଷା ଦେବାକୁ କେହି ନାହାନ୍ତି । ଯଦି ଅନ୍ୟ ଦେଶର ଲୋକେ ପ୍ରତିଦିନ ହଜାର ହଜାର ସଂଖ୍ୟାରେ ଅନୁପ୍ରବେଶ କରି ଆମ ମାଆ ଓ ଭଉଣୀଙ୍କ ଉପରେ ନଜର ପକାଉଛନ୍ତି, ଆମ ଜମି ହଡପ କରୁଛନ୍ତି, ତେବେ ପ୍ରଥମେ ଅମିତ ଶାହଙ୍କ ମୁଣ୍ଡ କାଟି ଟେବୁଲ ଉପରେ ରଖିଦେବା କଥା ।

ବିଏସଏଫକୁ ବି ଟାର୍ଗେଟ

ମୋଦି ସରକାର ଭାରତରେ ଅବୈଧ ଭାବେ ରହୁଥିବା ରୋହିଙ୍ଗିଆ ଓ ବାଂଲାଦେଶୀଙ୍କୁ ବାହାର କରିବାକୁ ଅପରେଶନ ପୁଶବ୍ୟାକ ଆରମ୍ଭ କରିଥିବା ବେଳେ ମହୁଆଙ୍କ ଏପରି ବିବାଦୀୟ ବୟାନ ଆସିଛି । ସେତିକି ନୁହେଁ, ମହୁଆ ସୀମା ସୁରକ୍ଷା ବଳ (ବିଏସଏଫ)କୁ ନେଇ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ବିଏସଏଫ ଏଠାରେ ଅଛନ୍ତି, ହେଲେ ସେମାନେ କ’ଣ କରୁଛନ୍ତି । ମୂଳ ଭାରତୀୟ ବିଏସଏଫକୁ ଡରୁଛନ୍ତି । ଏଠି ପଶ୍ଚିମବଙ୍ଗରେ ଆମକୁ କୌଣସି ଅନୁପ୍ରବେଶ ଦେଖାଯାଉନି । ତାଙ୍କ ବୟାନରୁ ଜଣାପଡୁଛି, ସୀମା ସୁରକ୍ଷାରେ ନିୟୋଜିତ ବିଏସଏଫର ଭୁମିକା ପଶ୍ଚିମବଙ୍ଗର ସ୍ଥାନୀୟ ଲୋକଙ୍କ ବାସ୍ତବତା ସହ ମେଳ ଖାଉନି । ଅନ୍ୟପକ୍ଷେ, ମହୁଆ ମୋଇତ୍ରାଙ୍କ ବୟାନକୁ ନେଇ ବିଜେପିର ଜଣେ କର୍ମକର୍ତ୍ତା ସନ୍ଦୀପ ମଜୁମଦାର ନଦିଆର କୋତବାଲି ଥାନାରେ ଏତଲା ଦେବା ସହ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦେବାକୁ ଦାବି କରିଛନ୍ତି ।

ରାହୁଲଙ୍କୁ ଶାହଙ୍କ ଟାର୍ଗେଟ

ସୂଚନାଯୋଗ୍ୟ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଦୁଇଦିନିଆ ଆସାମ ଗସ୍ତରେ ଯାଇଛନ୍ତି । ଶକ୍ରବାର ଗୌହାଟୀ ରାଜଭବନରେ ନବନିର୍ମିତ ବ୍ରହ୍ମପୁତ୍ର  ୟୁନିଟର ଉଦଘାଟନ କରିଛନ୍ତି । ଏହି ସମୟରେ ଭାଷଣରେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଶାହ ଟାର୍ଗେଟ କରିଛନ୍ତି । ସେ କହିଛନ୍ତିଳ ରାହୁଲ ଗାନ୍ଧି ନକରାତ୍ମକ ରାଜନୀତି ଆରମ୍ଭ କରି ଦେଇଛନ୍ତି । ସେ ଅନୁପ୍ରବେଶକାରୀଙ୍କୁ ବଞ୍ଚାଇବାକୁ ଯାତ୍ରା ଆରମ୍ଭ କରିଛନ୍ତି । ଭୋଟର ତାଲିକାରେ ଅନୁପ୍ରବେଶକାରୀ ସାମିଲ ହୋଇ ନିର୍ବାଚନକୁ ପ୍ରଭାବିତ କରୁଛନ୍ତି । ରାହୁଲ ଗାନ୍ଧିଙ୍କ ସାମାନ୍ୟତମ ଲଜ୍ଜା ଥିଲେ ପ୍ରଧାନମନ୍ତ୍ରୀ ଏବଂ ଦେଶବାସୀଙ୍କୁ କ୍ଷମା ମାଗନ୍ତୁ ।