ଜାପାନରେ ଚନ୍ଦ୍ରାୟନ-୫କୁ ନେଇ ମୋଦିଙ୍କ ବଡ଼ ଘୋଷଣା, ଇସ୍ରୋ-ଜାକ୍ସା ମିଳିତ ଭାବେ କରିବେ କାମ

ନନ୍ଦିଘୋଷ ବ୍ୟୁରୋ: ଜାପାନ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଚନ୍ଦ୍ରାୟନ-୫କୁ ନେଇ ବଡ଼ ଘୋଷଣା । ଭାରତର ଇସ୍ରୋ ଏବଂ ଜାପାନର ଜାକ୍ସା (ଜାପାନ ଏୟାରସ୍ପେଶ ଏକ୍ସପ୍ଲୋରେଶନ) ମିଳିତ ଭାବେ କାମ କରିବା ନେଇ ପ୍ରଧାନମନ୍ତ୍ରୀଙ୍କ ଘୋଷଣା । ମୋଦି କହିଲେ, ଆମେ ଚନ୍ଦ୍ରାୟନ-୫ ପାଇଁ ଇସ୍ରୋ ଏବଂ ଜାକ୍ସା ମଧ୍ୟରେ ସହଯୋଗକୁ ସ୍ବାଗତ କରୁଛୁ । ଆମର ସକ୍ରିୟ ସହଯୋଗ ପୃଥିବୀ ସୀମଠୁ ଉପରକୁ ଯାଇ ଅନ୍ତରୀକ୍ଷରେ ମାନବ ଜାତିର ପ୍ରଗତିର ପ୍ରତୀକ ବନିବ । ପ୍ରଧାନମନ୍ତ୍ରୀ ଟୋକିଓରେ ନିଜ ସମକକ୍ଷ ଶିଗେରୁ ଇଶିବାଙ୍କ ସହ ଆଲୋଚନା କରିବା ପରେ ମିଡିଆ ବ୍ରିଫିଂ କରିବା ସମୟରେ ଇସ୍ରୋ ଓ ଜାକ୍ସା ମଧ୍ୟରେ ସହଯୋଗର ଘୋଷଣା କରିଛନ୍ତି । ସେ ଆହୁରି କହିଛନ୍ତି, ଆଗାମୀ ଦଶକ ପାଇଁ ଭାରତ ଓ ଜାପାନ ସହଯୋଗର ରୋଡମ୍ୟାପ ପ୍ରସ୍ତୁତ କରି ସାରିଛୁ ।  ଦୁନିଆରେ ସବୁଠୁ ବଡ଼ ଦୁଇ ଅର୍ଥବ୍ୟବସ୍ଥା ଓ ଲୋକତନ୍ତ୍ର ମଧ୍ୟରେ ସହଯୋଗ ନା କେବଳ ଦୁଇ ଦେଶ ପାଇଁ ବରଂ ସାରା ବିଶ୍ବ ଶାନ୍ତି ଓ ସ୍ଥିରତା ପାଇଁ ଅତ୍ୟନ୍ତ ସମତ୍ବପୂର୍ଣ୍ଣ ବୋଲି ଆମେ ସହମତ ହୋଇଛୁ ।

୧୦ ବର୍ଷରେ ଜାପାନ କରିବ ୧୦ ଟ୍ରିଲିୟନ ୟେନର ନିବେଶ

ମିଡିଆ ବ୍ରିଫିଂ ବେଳେ ମୋଦି କହିଥିଲେ, ଆଗାମୀ ୧୦ ବର୍ଷ ମଧ୍ୟରେ ଜାପାନ ଭାରତରେ ୧୦ ଟ୍ରିଲିୟନ ୟେନର ନିବେଶ କରିବ । ଆଜି ଜାପାନ ଓ ଭାରତ ମଧ୍ୟରେ ସହଯୋଗ ଏକ ସୁବର୍ଣ୍ଣ ଯୁଗ ଆରମ୍ଭର ଦୃଢ଼ ମୂଳଦୁଆ ପକାଇଛି । ଆମେ ନିବେଶ, ଆବିଷ୍କାର ଓ ଆର୍ଥଇକ ସୁରକ୍ଷା ସମେତ ଅନ୍ୟ କ୍ଷେତ୍ରରେ ସହଯୋଗ ପାଇଁ ୧୦ ବର୍ଷର ରୋଡମ୍ୟାପ ପ୍ରସ୍ତୁତ କରିଛୁ ।

ପ୍ରଧାନମନ୍ତ୍ରୀ କହିଛନ୍ତି, ଭାରତ ଓ ଜାପାନ ଏକ ସ୍ବତନ୍ତଅ, ଶାନ୍ତିପୂର୍ଣ୍ଣ, ସମୃଦ୍ଧ ଓ ନିୟମ ଆଧାରିତ ହିନ୍ଦ-ପ୍ରଶାନ୍ତ କ୍ଷେତ୍ର ପାଇଁ ପ୍ରତିଶ୍ରୁତିବଦ୍ଧ । ଦୁଇ ଦେଶ ପ୍ରତିରକ୍ଷା ଉଦ୍ୟୋଗ ଓ ନୂତନତ୍ବ କ୍ଷେତ୍ରରେ ସହଯୋଗକୁ ଆହୁରି ଦୃଢ଼ କରିବାକୁ ନିଷ୍ପତ୍ତି ନେଇଛନ୍ତି । ଆତଙ୍କବାଦ ଓ ସାଇବର ସୁରକ୍ଷାକୁ ନେଇ ଦୁଇ ଦେଶର ଚିନ୍ତା ସମାନ । ପ୍ରତିରକ୍ଷା ଓ ସମୁଦ୍ର ସୀମା ସୁରକ୍ଷା ବୃଦ୍ଧି କରିବାରେ ଦୁଇ ଦେଶର ହିତ । ଏହି ସହଯୋଗ ବିଶ୍ବାସ ଉପରେ ସ୍ଥାପନ ହୋଇଛି । ଗୋଟିଏ ସମୃଦ୍ଧ ବିଶ୍ବ ନିର୍ମାଣରେ ଦୃଢ଼ ଲୋକତନ୍ତ୍ରଙ୍କ ମଧ୍ୟରେ ସହଯୋଗ ରହିଥାଏ । ଜାପାନ ପ୍ରଧାନମନ୍ତ୍ରୀ କହିଥିଲେ, ଦୁଇ ଦେଶଙ୍କୁ ଆଗାମୀ ପୀଡ଼ର ପ୍ରତିବନ୍ଧକକୁ ମୁକାବିଲା କରିବା ପାଇଁ ପରସ୍ପରଙ୍କ କ୍ଷମତାର ଲାଭ ଉଠାଇବାର ଆବଶ୍ୟକତା ରହିଛି ।