କେବେ ହେବ ମହାନଦୀ ଜଳ ବିବାଦର ଅନ୍ତ ?

ନନ୍ଦିଘୋଷ ବ୍ୟୁରୋ: ମହାନଦୀ ହେଉଛି ଓଡ଼ିଶାର ହକ । ଆଉ ହକ ଲାଗି ମହାନଦୀ ପାଇଁ ଛତିଶଗଡ଼ ସହ ଲଢେଇ ଜାରି ରଖିଛି ମହାନଦୀ ବଞ୍ଚାଅ ଆନ୍ଦୋଳନ । ପ୍ରଥମ ଦିନ ଗୋଲ ଟେବୁଲ ବୈଠକ ପରେ ଆଜି ଛତିଶଗଡ଼ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟର ସ୍ମାରକପତ୍ର ଦେଇଛି ସଙ୍ଗଠନ । ସେପଟେ ମହାନଦୀ ଜଳ ବିବାଦ ପ୍ରସଙ୍ଗରେ ରାଜ୍ୟ ସରକାରଙ୍କ ଭୂମିକାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ । ଟ୍ରିପଲ ଇଞ୍ଜିନ ସରକାରରେ ତୁରନ୍ତ ଓଡ଼ିଶାକୁ ହକ ମିଳୁ ବୋଲି ଦାବି ହୋଇଛି ।

କେବେ ହେବ ମହାନଦୀ ଜଳ ବିବାଦର ସମାଧାନ ? କେବେ ଓଡ଼ିଶାକୁ ମିଳିବ ତାର ହକ୍ ? ଓଡ଼ିଶାର ଦାବି ନେଇ ମହାନଦୀ ବଞ୍ଚାଅ ଆନ୍ଦୋଳନ ଛତିଶଗଡ଼ରେ ଲଢ଼େଇକୁ ଜୋରଦାର କରିଛି । ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏଙ୍କୁ ସଂଗଠନ ପ୍ରଦାନ କରିଛି ସ୍ମାରକପତ୍ର । ମହାନଦୀ ଜଳ ବିବାଦର ସମାଧାନ ପାଇଁ ମୁଖ୍ୟମନ୍ତ୍ରୀଙ୍କୁ ୪ଟି ପ୍ରସ୍ତାବ ଦିଆଯାଇଛି । ସିଭିଲ ସୋସାଇଟି ସହ ଆଲୋଚନା କରି ମହାନଦୀ ଉପରେ ନିର୍ଭରଶୀଳ ଲୋକଙ୍କ ସହ ଆଲୋଚନା କରାଯାଉ । ଜଳ ଆବଣ୍ଟନ ନେଇ ନିଷ୍ପତ୍ତି ନେବା ପୂର୍ବରୁ ବିଶେଷଜ୍ଞ ଦଳ ସହ କରାଯାଉ ଆଲୋଚନା । ଇକୋଲୋଜିକାଲ ଦିଗକୁ ଗୁରୁତ୍ୱ ଦେଇ ସବୁ ଷ୍ଟେକ ହୋଲ୍ଡରଙ୍କୁ ନେଇ ଖୋଲା ଆଲୋଚନା କରିବାକୁ ପ୍ରସ୍ତାବ ଦିଆଯାଇଛି । ସେପଟେ ମହାନଦୀ ଜଳ ବିବାଦ ସମାଧାନ ଦିଗରେ ସରକାରୀ ଦଳର ଆଭିମୁଖ୍ୟକୁ କଡ଼ା ସମାଲୋଚନା କରିଛି ବିଜେଡି ।

ମହାନଦୀ ପ୍ରସଙ୍ଗରେ ବିଜେପି ସରକାରଙ୍କ ନୀତିକୁ ନେଇ ବର୍ଷିଛି କଂଗ୍ରେସ । ଏବେ ଟ୍ରିପଲ ଇଞ୍ଜିନ ସରକାର । ଛତିଶଗଡ଼, କେନ୍ଦ୍ର ଓ ଓଡ଼ିଶାରେ ବିଜେପି ସରକାର । ଓଡ଼ିଶାର ସ୍ୱାର୍ଥ ପାଇଁ ରାଜ୍ୟ ସରକାର ଲଢ଼ିବା କଥା, ତଥାପି ନ୍ୟାୟ ମିଳୁନି । ସରକାର ଚାହିଁଲେ ଗୋଟିଏ ଦିନରେ ସମସ୍ୟାର ସମାଧାନ ହେବ । ହେଲେ ବିରୋଧୀଙ୍କ ଜବାବରେ ଚିରାଚରିତ ଭାବେ ଉତ୍ତର ରଖିଛି ବିଜେପି । ସରକାରର ନିଷ୍ଠା ଅଛି ଓ ଆଲୋଚନା ପର୍ଯ୍ୟାଲୋଚନା ମାଧ୍ୟମରେ ମହାନଦୀ ବିବାଦର ସମାଧାନ କରାଯିବ । ଛତିଶଗଡ଼ ସହ ଆଲୋଚନା ଚାଲିଛି । ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ମହାନଦୀ ଜଳ ବିବାଦ ସମାଧାନ ହେବ ଓ ଓଡିଶା ନ୍ୟାୟ ପାଇବ ବୋଲି କହିଛି ବିଜେପି ।

ପୂର୍ବରୁ ଅନେକ ଆନ୍ଦୋଳନ ଓ ଚାପ ପରେ ମଧ୍ୟ ଛତିଶଗଡ଼ ସରକାର ଓଡ଼ିଶାର ସ୍ୱାର୍ଥକୁ ଗୁରୁତ୍ୱ ନ ଦେଇ ମନଇଚ୍ଛା କାର୍ଯ୍ୟ କରିଛନ୍ତି । ତେଣୁ ଏବେ ମହାନଦୀ ପ୍ରସଙ୍ଗରେ ଓଡିଶା କିଭଳି ନ୍ୟାୟ ପାଇବ ତା ଉପରେ ରହିଛି ରାଜ୍ୟବାସୀଙ୍କ ନଜର ।