ଆସାମରେ ଭୂକମ୍ପ ଝଟକା: ଦୋହଲି ଗଲା ଏକାଧିକ ଉତ୍ତର-ପୂର୍ବ ରାଜ୍ୟ

ନନ୍ଦିଘୋଷ ବ୍ୟୁରୋ: ଆସାମର ଉଦଲଗୁଡି ସମେତ ଉତ୍ତ-ପୂର୍ବ ଭାରତର ଏକାଧିକ ସ୍ଥାନରେ ଭୂକମ୍ପର ଝଟକା ଅନୁଭବ ହୋଇଛି । ରିକ୍ଟଲ ସ୍କେଲରେ ଏହାର ତିବ୍ରତା ୫.୮ ମପାଯାଇଛି । ଆସାମର ଉଦଲଗୁଡିରେ ଏହାର କେନ୍ଦ୍ର ସ୍ଥଳ ରହିଥିଲା । ଅପରାହ୍ନ ୫ଟା ୨୦ ମିନିଟରେ ଭୂକମ୍ପର ଝଟକା ଅନୁଭବ ହୋଇଥିଲା । ପ୍ରାକୃତିକ ଦୁର୍ବିପାକ ଯୋଗୁଁ ଧନଜୀବନ କ୍ଷତିର କୌଣସି ସୂଚନା ମିଳିନାହିଁ । ଉଦ୍ଧାରକାରୀ ଦଳ ସତର୍କ ରହିଥିବା ବେଳେ ସ୍ଥିତି ଉପରେ ନଜର ରଖାଯାଇଛି ।

ରାଷ୍ଟ୍ରୀୟ ଭୂକମ୍ପ ବିଜ୍ଞାନ କେନ୍ଦ୍ର (ଏନସିଏସ) ଅନୁସାରେ ଭୂକମ୍ପର କେନ୍ଦ୍ର ଆସାମର ଉଦଲଗୁଡି ଜିଲ୍ଲାରେ ଥିଲା ଓ ଏହାର ଗଭୀରତା ୫ କିମି ଥିଲା । ଭୁକମ୍ପର ଝଟକା ଆସାମ ସମେତ ଉତ୍ତର-ପୂର୍ବ ରାଜ୍ୟ ମେଘାଳୟ, ନାଗାଲ୍ୟାଣ୍ଡ, ମଣିପୁର ଓ ଉତ୍ତର ପଶ୍ଚିମବଙ୍ଗରେ ମଧ୍ୟ ଅନୁଭୂତ ହୋଇଛି ।