‘ମୁଁ ମରିସସରେ ଜନ୍ମିଛି ସତ, କିନ୍ତୁ ମୋ ହୃଦୟ ଓଡିଶା ମାଟିରେ ରହିଛି । ମୋ ପୂର୍ବଜ ଏଠାରୁ ଯାଇଥିଲେ, ଏବେ ମୁଁ ସେହି ମାଟି ନେଇ ମୋ ଦେଶକୁ ଫେରିବି । ଏଭଳି ମନ୍ତବ୍ୟ ଦେଇଛନ୍ତି ପ୍ରବାସୀ ଓଡିଆ ରାମରୂପ ଜୁଗରନାଥ । ସାତ ଦରିଆ ପାର ହୋଇ ସୁଦୂର ମରିସସରୁ ରାମରୂପ ନିଜ ରକ୍ତ ସଂପର୍କୀୟଙ୍କୁ ଖୋଜିବାକୁ ଆସିଥିଲେ ଯାଜପୁର । ଆତ୍ମୀୟ ସ୍ବଜନଙ୍କ ପରିଚୟ ତ ପାଇ ପାରିପାରିଲେନି ହେଲେ ପାଇଲେ ନିଜ ମାଟିର ସନ୍ଧାନ । ଆଗରୁ ୩ ଥର ଆସି ନିରାଶ ହୋଇ ଫେରିଯାଇଥିଲେ । ଏଥର ସେ ନିଜ ଜନ୍ମମାଟିର ସନ୍ଧାନ ପାଇଁ ବେଶ ଖୁସିବ୍ୟକ୍ତ କରିଛନ୍ତି ।
ରାମରୂପଙ୍କ ପୂର୍ବଜମାନେ ପ୍ରାୟ ଦୁଇ ଶତାବ୍ଦୀ ଆଗରୁ ମରିସସ ଯାଇଥିଲେ । ୫ ପିଢିରୁ ଉର୍ଦ୍ଧ୍ବକାଳ ଧରି ସେଠାରେ ରହିଥିଲେ । ଆଉ ଗାଁକୁ କେହି ଫେରିନଥିଲେ । ରାମରୂପ ନିଜ ମାଟିର ମଣିଷଙ୍କୁ ଖୋଜିବାକୁ ଜିଲ୍ଲାପ୍ରଶାସନ ସହଯୋଗରେ ଯାଜପୁର ଆସି ଗାଁ ଗାଁ ବୁଲିଥିଲେ । ଗଣପତିପୁର ବ୍ରାହ୍ମଣବାଡି ଗାଁରେ ନିଜର ପୂର୍ବଜ ରହୁଥିବା ନେଇ ସନ୍ଧାନ ପାଇଥିଲେ । ସେହି ଗାଁରୁ ଯତ୍ନ ସହକାରେ ମାଟି ସଂଗ୍ରହ କରି ମରିସସକୁ ନେଇଯାଇଛନ୍ତି । ସତରେ ମାଟି ଓ ମଣିଷର ସମ୍ପର୍କ ଜନ୍ମଜନ୍ମାନ୍ତରର ସମ୍ପର୍କ । ରାମରୂପଙ୍କ ଏହି ଯାତ୍ରା ପ୍ରତ୍ୟେକ ସ୍ବଦେଶୀ ଓ ପ୍ରବାସୀ ଓଡିଆଙ୍କ ମନରେ ନିଶ୍ଚୟ ଭରିଦେବ ଉନ୍ମାଦନା ।
