ବଦଳିଛି ସମୟ, ସଶକ୍ତ ହେଉଛନ୍ତି ମହିଳା । ଘରର ଚାରିକାନ୍ଥରୁ ବାହାରି କରୁଛନ୍ତି ରୋଜଗାର । କଟକ ଜିଲ୍ଲା ନରସିଂହପୁର ବ୍ଲକ ଅଲରା ପଂଚାୟତ ଲେମ୍ବୋ ବନ୍ଧସାହି ଗାଁରେ ମହିଳାଙ୍କୁ ରୋଜଗାର ଦେଉଛି ଫୁଲଝାଡୁ । ବନ୍ଧସାହି ଗାଁରେ ୪ଟି SHGର ୪୦ରୁ ଉର୍ଦ୍ଧ୍ଵ ମହିଳା ଏକାଠି ହୋଇ ପ୍ରସ୍ତୁତ କରୁଛନ୍ତି ଫୁଲ ଝାଡୁ । ମହିଳାମାନଙ୍କୁ ଝାଡୁ ତିଆରି କରିବାରେ ପୁରୁଷ ମାନେ ସାହାଯ୍ୟ ମଧ୍ୟ କରୁଛନ୍ତି । ଆଉ ଝାଡୁକୁ ବଜାରରେ ବିକ୍ରି କରି ମହିଳାମାନେ ମାସିକ ମୁଣ୍ଡ ପିଛା ୮ ରୁ ୧୦ ହଜାର ଟଙ୍କା କରୁଛନ୍ତି ରୋଜଗାର ।
ଲେମ୍ବୋ ବନ୍ଧସାହି ଗାଁରେ ଏମବିକେ ନିରୂପମା ନାୟକଙ୍କର ତତ୍ୱବାଧାନରେ ଚାରୋଟି ମିଶନ ଶକ୍ତି ମହିଳା ଗ୍ରୁପକୁ ନେଇ ଗୋଟିଏ ପିଜି ଗ୍ରୁପ ଗଠିତ ହୋଇଛି । ଯେଉଁଥିରେ ୪୦ରୁ ଉର୍ଦ୍ଧ୍ଵ ମହିଳା ସାମିଲ ହୋଇଛନ୍ତି । ମହିଳାମାନେ କଞ୍ଚାମାଲ ପାଇଁ ବ୍ୟାଙ୍କରୁ ୨୦ ଲକ୍ଷ ଟଙ୍କାର ଋଣ ଆଣି କରୁଛନ୍ତି ବ୍ୟବସାୟ । ଅନ୍ୟପଟେ ଆଗାମୀ ଦିନରେ ମହିଳା ମାନଙ୍କୁ ମେସିନ ସହ ଭୁବନେଶ୍ଵର ଓ କଟକରେ ଝାଡୁର ବିକ୍ରିବଟା ପାଇଁ ସୁବିଧା ଯୋଗାଇ ଦିଆଯିବ ବୋଲି କହିଛନ୍ତି ବିଡିଓ । ଫୁଲଝାଡୁକୁ ମହିଳାମାନେ ନରସିଂହପୁର, ଚମ୍ପେଶ୍ୱର, ବାଲିଝରି, ଗୋପପୁର ଓ ବଡମ୍ବା ଆଦି ସପ୍ତାହିକ ହାଟରେ ବିକ୍ରି କରି ବେଶ ଦୁଇ ପଇସା ରୋଜଗାର କରୁଛନ୍ତି ।
