ନନ୍ଦିଘୋଷ ବ୍ୟୁରୋ : ସରିଲା କଟକ ଐତିହାସିକ ବାଲିଯାତ୍ରା । ଚଳିତବର୍ଷ ମେଳାରେ ୪ଶହ କୋଟିରୁ ଅଧିକ ବ୍ୟବସାୟ ହୋଇଥିବା ସୂଚନା ଦେଇଛନ୍ତି ବ୍ୟବସାୟୀ । ୯ ଦିନ ଧରି ମହାନଦୀ କୂଳରେ ଚାଲିଥିଲା ବିଶ୍ବର ସର୍ବବୃହତ ମୁକ୍ତାକାଶ ବାଣିଜ୍ୟମେଳା । ଲକ୍ଷାଧିକ ଲୋକ ଯାତ୍ରା ବୁଲିବା ସହ ଖେଳକୁଦ, କିଣାକିଣି ଓ ଚଟପଟି ଖାଦ୍ୟର ମଜା ଲୁଟିଥିଲେ । ତେବେ ଶେଷ ଦିନରେ ଭିଡ଼ ନିୟନ୍ତ୍ରଣରେ ପ୍ରଶାସନ ଫେଲ ମାରିଥିବା ଲୋକେ ଅଭିଯୋଗ କରିଛନ୍ତି ।
ଯାତ୍ରାରେ ମୁଣ୍ଡ ମାଳମାଳ । ଖଚାଖଚ ଭିଡ଼ ଭିତରେ ଚାଲିଲା ବ୍ୟବସାୟ । ୯ ଦିନ ପରେ ସରିଛି କଟକ ଐତିହାସିକ ବାଲିଯାତ୍ରା । ଚଳିତବର୍ଷ ମେଳାରେ ୪ ଶହ କୋଟିରୁ ଅଧିକ ବ୍ୟବସାୟ ହୋଇଥିବା ଆକଳନ କରାଯାଇଛି । ଗତ ୫ ତାରିଖରୁ ୧୩ ତାରିଖ ଯାଏଁ ମହାଦୀ ପଠାରେ ଚାଲିଥିଲା ସର୍ବବୃହତ୍ତ ମୁକ୍ତାକାଶ ବାଣିବ୍ୟ ମେଳା । ୯ ଦିନ ଧରି ଯାତ୍ରାରେ ବୁଲାବୁଲି କରିବା ସହ ଖେଳକୁଦ, କିଣାକିଣି ଓ ଚଟପଟି ଖାଦ୍ୟର ମଜା ଲୁଟିଥିଲେ ଲୋକେ । ଶେଷଦିନରେ ଦର୍ଶକଙ୍କ ମନ ମୋହିଲେ ବଲିଉଡ୍ ଗାୟିକା ଶ୍ରେୟା ଘୋଘାଲ୍ । ଓଡ଼ିଆରେ ଗୀତ ଗାଇ ଦର୍ଶକଙ୍କ ମନ ମୋହିଥିଲେ ଶ୍ରେୟା । ଶ୍ରେୟାଙ୍କ କାର୍ଯ୍ଯକ୍ରମ ଦେଖିବାକୁ ଲୋକଙ୍କ ଭିତରେ ହୋଇଥିଲେ ଠେଲାପେଲା । ବ୍ଯାରିକେଡ ଭାଙ୍ଗି ୫ରୁ ଅଧିକ ଲୋକ ଆହତ ହୋଇଥିଲେ । ସେମାନଙ୍କୁ ଆମ୍ବୁଲାନ୍ସ ଯୋଗେ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ଯାହାକୁ ନେଇ ସୁରକ୍ଷା ବ୍ଯବସ୍ଥାକୁ ଦାୟି କରିଛନ୍ତି ଲୋକେ ।
ଚଳିତ ବର୍ଷ ଯାତ୍ରାରେ କଟକ ଇନ କଟକ ପାଭିଲୀଅନ, ବୋଟିଂ ପ୍ରତିଯୋଗିତା, ଲେଜର ଲାଇଟ ସୋ ସାଜିଥିଲା ମୁଖ୍ୟ ଆକର୍ଷଣ । ସବୁଠୁ ଆକର୍ଷଣ ଥିଲା ସାଂସ୍କୃତିକ କାର୍ଯ୍ୟକ୍ରମ । ତେବେ ଶେଷ ଦିନରେ ଅତ୍ୟଧିକ ଭିଡ଼ ଯୋଗୁଁ କିଛି ସ୍ଥାନରେ ସ୍ଥିତି ଅଣାୟତ ହୋଇଥିବା କହିଛନ୍ତି ଜିଲ୍ଲାପାଳ । ଚଳିତବର୍ଷ ରବିବାର ଦିନ ସର୍ବାଧିକ ୧୨ ଲକ୍ଷରୁ ଅଧିକ ଲୋକ ଏକତ୍ରିତ ହୋଇଥିଲେ । ତେବେ ପୋଲିସ ପକ୍ଷରୁ ନିଆଯାଇଥିବା ପଦକ୍ଷେପକୁ ପ୍ରଶଂସା କରିଛନ୍ତି କମିଶନର । ବାଦ ବିବାଦ ମଧ୍ୟରେ ଶେଷ ହୋଇଛି ବାଲିଯାତ୍ରା । ତେବେ ଦୁଇଟି ପଡ଼ିଆରେ ଯାତ୍ରା ହୋଇଥିଲେ ଭିଡ଼ ଉପରେ ନିୟନ୍ତ୍ରଣ ହୋଇ ପାରନ୍ତା ବୋଲି କହିଛନ୍ତି ବୁଦ୍ଧିଜୀବୀ ।
