ଅଲ୍ ଫଲାହ ବିଶ୍ବବିଦ୍ୟାଳୟରେ ଇଡି ରେଡ୍, ତଥ୍ୟ ଦେଖି ଉଡ଼ିଲା ସମସ୍ତଙ୍କ ହୋସ୍
ନନ୍ଦିଘୋଷ ବ୍ୟୁରୋ: ଦିଲ୍ଲୀ ବ୍ଲାଷ୍ଟ ପରେ ବଢ଼ିବାରେ ଲାଗିଛି ଅଲ୍ ଫଲାହ ବିଶ୍ବବିଦ୍ୟାଳୟର ସମସ୍ୟା । ଏଠାରେ କାର୍ଯ୍ୟରତ ଡକ୍ଟର ଆତଙ୍କବାଦୀ କାର୍ଯ୍ୟପଳାପରେ ସମ୍ପୃକ୍ତ ଥିବା ସ୍ପଷ୍ଟ ହେବା ପରେ ସୁରକ୍ଷା ଏଜେନ୍ସି ବିଶ୍ବବିଦ୍ୟାଳୟ ଉପରେ କଡ଼ା ନଜର ରଖିଛନ୍ତି । ଆଜି ସକାଳୁ ସକାଳୁ ବିଶ୍ବବିଦ୍ୟରଳୟର ବିଭିନ୍ନ ଠିକଣାରେ ପ୍ରବର୍ତ୍ତନ ନିର୍ଦ୍ଦେଶାଳାୟ (ଇଡି) ପକ୍ଷରୁ ଚଢ଼ାଉ କରାଯାଇଛି । ଦିଲ୍ଲୀର ଓଖଲା ଜାମିଆ ନଗର ସମେତ ୨୫ଟି ସ୍ଥାନରେ ଚଢାଉ ଜାରି ରହିଛି । ସକାଳ ୫ଟାରୁ ଅଲ ଫଲାହ ବିଶ୍ବବିଦ୍ୟାଳୟ, ଏହାର ଟ୍ରେଜେରୀ ଓ ଏହା ସହ ଜଡିତ ବ୍ୟକ୍ତି ଏବଂ ସଂସ୍ଥାରେ ଚାଲିଛି ସର୍ଚ୍ଚ ଅପରେସନ ।
ଅଲ ଫଲାହ ଗ୍ରୁପ ସହ ଜଡିତ ଆର୍ଥିକ ଅନିୟମିତତା, ସେଲ କମ୍ପାନୀର ବ୍ୟବହାର, ନକଲି ଦେଣନେଣ ଓ ମନି ଲଣ୍ଡରିଂ ଅଭିଯୋଗକୁ ଆଧାର କରି ଚଢ଼ାଉ ଜାରି ରହିଛି । ଚଢାଉ ସମୟରେ ଯାଞ୍ଚକାରୀ ଟିମ୍ ଗ୍ରୁପ ସହ ଜଡ଼ିତ ୯ଟି ସନ୍ଦିଗ୍ଧ ସେଲ କମ୍ପାନୀଙ୍କ ଗତିବିଧିକୁ ତର୍ଜମା କରାଯାଉଛି । ଏସବୁ କମ୍ପାନୀ ଗୋଟିଏ ଠିକଣାରେ ରେଜିଷ୍ଟ୍ରି ହୋଇଥିବା ଜଣାପଡ଼ିଛି । ପ୍ରାରମ୍ଭିକ ଯାଞ୍ଚରୁ ଏମିତି ଏକାଧିକ ତଥ୍ୟ ମିଳିଛି, ଯାହା ସେଲ କମ୍ପାନୀ ଚଲାଯିବାକୁ ଇଙ୍ଗିତ କରୁଛି ।
ଯାଞ୍ଚରୁ କ’ଣ ଜଣାପଡ଼ିଛି ?
୧. ଘୋଷିତ କମ୍ପାନୀରେ କର୍ମଚାରୀ ନାହାନ୍ତି କି ପାଣି, ବିଦ୍ୟୁତ ବ୍ୟବହାର ହୋଇଛି ।
୨. ଅଲଗା ଅଲଗା କମ୍ପାନୀ ପାଇଁ ଗୋଟିଏ ମୋବାଇଲ ନମ୍ବର ଓ ଗୋଟିଏ ଇ-ମେଲ୍ ବ୍ୟବହାର ହୋଇଛି ।
୩. ଇପିଏଫଓ/ଇଏସଆଇସିର କୌଣସି ରେକର୍ଡ ନାହିଁ । କାଗଜରେ ବଡ଼ କାରବାର ଦେଖାଯାଇଛି ।
୪. ଏକାଧିକ କମ୍ପାନୀରେ ସମାନ ଡାଇରେକ୍ଟର, ସାଇନେଟାରୀ, କେଓ୍ବାଇସି ରେକର୍ଡ ବି ବହୁତ ଦୁର୍ବଳ ଥିବା ତଥ୍ୟ ମିଳିଛି ।
୫. ବ୍ୟାଙ୍କ ଖାତାରେ ନାମକୁ ମାତ୍ର ଟ୍ରାଞ୍ଜାକ୍ସନ ହୋଇଛି ।
୬. ଏଚଆର ରେର୍କଡ ନଥିବା ସହିତ ସମାନ ।
୭. କମ୍ପାନୀ ଗଠନରେ ଗୋଟିଏ ପ୍ରକାର ଟାଇମଲାଇନ୍ ଓ କମନ କଣ୍ଟାକ୍ଟ ଡିଟେଲ୍ସ ରହିଛି ।
ସୂଚନାଯୋଗ୍ୟ, ସନ୍ଦିଗ୍ଧ ଦେଣନେଣକୁ ଲୁଚାଇବାକୁ ଏସବୁ କମ୍ପାନୀ ଗଠନ କରାଯାଇଥିବା ଯାଞ୍ଚ ଟିମ୍ ସନ୍ଦେହ କରୁଛନ୍ତି ।
UGC ଓ NAAC ମାନ୍ୟତାକୁ ନେଇ ପ୍ରଶ୍ନ
କେବଳ ସେତିକି ନୁହେଁ ତଦନ୍ତକାରୀ ଟିମଙ୍କୁ ପ୍ରାଥମିକ ଯାଞ୍ଚରୁ UGC ଓ NAAC ମାନ୍ୟତାକୁ ନେଇ ଗ୍ରୁପ୍ ଦ୍ବାରା କରାଯାଇଥିବା ଦାବିରେ ବି ଘୋଟାଲା ଥିବା ତଥ୍ୟ ମିଳିଛି । ଏହାକୁ ନେଇ ସମ୍ପୃକ୍ତ ଅଧିକାରୀଙ୍କୁ ଅଲଗା ପଚରାଉଚରା କରାଯାଇଛି । ଯାଞ୍ଚ ପରେ ପରବର୍ତ୍ତି କାର୍ଯ୍ୟାନୁଷ୍ଠାନ କ’ଣ ନିଆଯିବ ତାହା ସ୍ଥିର ହେବ ବୋଲି ତଦନ୍ତକାରୀ ଟଇମ୍ କହିଛନ୍ତି ।
ସୂଚନାଯୋଗ୍ୟ, ହ୍ବାଇଟ ଟେରର ମଡ୍ୟୁଲକୁ ନେଇ ଅଲ୍ ଫଲାହ ବିଶ୍ବବିଦ୍ୟାଳୟ ତଦନ୍ତର କେନ୍ଦ୍ରରେ ରହିଛି । ଏହା ପୂର୍ବରୁ ଚଞ୍ଚକତା, ଠକେଇକୁ ନେଇ ଦିଲ୍ଲୀ ପୋଲିସ ବିଶ୍ବବିଦ୍ୟାଳୟ ବିରୋଧରେ ଦୁଇଟି ମାମଲା ରୁଜୁ କରି କୁଳପତିଙ୍କ ଦୁଇ ଥର ସମନ କରିସାରିଛି । ଦିଲ୍ଲୀ ବ୍ଲାଷ୍ଟ ସହ ଜଡିତ ବ୍ୟକ୍ତି ବିଶ୍ବବିଦ୍ୟାଳ ସହ ସମ୍ପୃକ୍ତ ଥିବା ସନ୍ଦେହ କରାଯାଉଛି । ଯାହାକୁ ନେଇ ତଦନ୍ତକାରୀ ଟିମ୍ ବିଶ୍ବବିଦ୍ୟାଳୟର କୁଣ୍ଡଳୀ ବାହାର କରୁଛି ।
ଜବରଦଖଲ ଉପରେ ଶୀଘ୍ର ବୁଲିବ ବୁଲଡୋଜର
ଦିଲ୍ଲୀ ବ୍ଲାଷ୍ଟ ତଦନ୍ତ ଯେମିତି ଆଗକୁ ବଢୁଛି ଆଲ ଫଲାହ ବିଶ୍ବବିଦ୍ୟାଳୟକୁ ନେଇ ନୂଆ ନୂଆ ତଥ୍ୟ ଆସିବାରେ ଲାଗିଛି । ବିଶ୍ବବିଦ୍ୟାଳୟରେ ବଡ଼ ଧରଣର ନିୟମ ଉଲ୍ଲଂଘନ କରାଯାଇଥିବା ତଦନ୍ତକାରୀ ଟିମ୍ ସନ୍ଦେହ କରୁଛନ୍ତି । ଏହି କାରଣରୁ ପ୍ରଶାସନ ବିଶ୍ବବିଦ୍ୟାଳୟ ଉପରେ କାର୍ଯ୍ୟାନୁଷ୍ଠାନ ପାଇଁ ପୂରା ପ୍ରସ୍ତୁତି ଆରମ୍ଭ କରି ଦେଇଛି । ତଦନ୍ତ ବେଳେ ବିଶ୍ବବିଦ୍ୟାଳୟରେ ଏକାଧିକ ନିର୍ମାଣ ବିନା ଅନୁମୋଦନରେ କରାଯାଇଥିବା ଜଣାପଡ଼ିଛି । ଯାହା ଉପରେ ଶୀଘ୍ର ବୁଲଡୋଜର ବୁଲିବା ନେଇ ମଧ୍ୟ ଅନୁମାନ କରାଯାଉଛି ।
