ନନ୍ଦିଘୋଷ ବ୍ୟୁରୋ: ମଧ୍ୟାହ୍ନ ଭୋଜନ ଚାଉଳ ଚାଲାଣ ବେଳେ ଧରା ପଡିଲେ ପ୍ରଧାନ ଶିକ୍ଷକ । କାର ସହ ମଧ୍ୟାହ୍ନ ଭୋଜନ ଚାଉଳ ପୋଲିସକୁ ହସ୍ତାନ୍ତର କରିଛନ୍ତି ଗ୍ରାମବାସୀ ।ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ କୃତ୍ତିବାସପୁର ଉଚ୍ଚ ପ୍ରାଥମିକ ବିଦ୍ୟାଳୟରେ ଘଟିଛି ଏଭଳି ଅଭାବନୀୟ ଘଟଣା । ପ୍ରଧାନ ଶିକ୍ଷକ ଗୋପାଳ ନାୟକ ରାତିରେ ବିଦ୍ୟାଳୟରୁ ଏକ କୁଇଣ୍ଟାଲ ମଧ୍ୟାହ୍ନ ଭୋଜନ ଚାଉଳ ଚାଲାଣ କରୁଥିବା ବେଳେ ଗ୍ରାମବାସୀଙ୍କ ଦ୍ୱାରା ଧରା ପଡିଛନ୍ତି । ବିଦ୍ୟାଳୟରେ ପୂର୍ବରୁ କିଛି ସାମଗ୍ରୀ ଚୋରି ହୋଇଥିଲା । ଏହା ପରେ ଗ୍ରାମବାସୀ ମାନେ ବିଦ୍ୟାଳୟକୁ ରାତ୍ରୀ ସମୟରେ ଅନେକ ଥର ଯାଞ୍ଚ କରୁଥିବା ବେଳେ ବିଦ୍ୟାଳୟର ପ୍ରଧାନ ଶିକ୍ଷକ ଗୋପାଳ ତାଙ୍କର ଏକ କାର ଯୋଗେ ଦୁଇ ବସ୍ତା ଚାଉଳ ବିଦ୍ୟାଳୟରୁ ରାତିରେ ଆଣୁଥିବା ବେଳେ ଗାଁର କିଛି ଯୁବକ ଦେଖିଥିଲେ । ପରେ ଯୁବକ ମାନେ ଯାଇ ଗ୍ରାମବାସୀଙ୍କୁ ଜଣାଇବା ପରେ ଗ୍ରାମବାସୀ ମାନେ ଏକ ଜୁଟ ହୋଇ ଆସି ପ୍ରଧାନ ଶିକ୍ଷକଙ୍କୁ ଘେରି ପଚରାଉଚରା କରିଥିଲେ ।
ରାତି ୮ ଟାରେ କାହିଁକି ବିଦ୍ୟାଳୟକୁ ଆସିଛନ୍ତି ବୋଲି ପଚାରିବାରୁ ପ୍ରଧାନ ଶିକ୍ଷକ କିଛି ଉତ୍ତର ନଦେଇ ପ୍ରସଙ୍ଗକୁ ଏଡ଼ାଇ ଦେଇଥିଲେ । ପରେ ଗ୍ରାମବାସୀ ମାନେ ପ୍ରଧାନ ଶିକ୍ଷକଙ୍କର କାରକୁ ଯାଞ୍ଚ କରିଥିବା ବେଳେ ଦୁଇ ବସ୍ତା ମଧ୍ୟାହ୍ନ ଭୋଜନ ଚାଉଳ ଥିବା ଦେଖିବାକୁ ପାଇଥିଲେ । ଘଟଣାକୁ ନେଇ ଗାଁରେ ଉତ୍ତେଜନା ଦେଖାଦେଇଥିଲା l ପୂର୍ବରୁ ମଧ୍ୟ ବିଦ୍ୟାଳୟରୁ ମଧ୍ୟାହ୍ନ ଭୋଜନ ଚାଉଳ ଚାଲାଣ ହୋଇ ଥିବା ଅଞ୍ଚଳବାସୀ ଜାଣିବାକୁ ପାଇଥିଲେ । ପରେ ଗ୍ରାମବାସୀ ମାନେ ଠାକୁରଗଡ଼ ପୁଲିସକୁ ସୂଚନା ଦେଇଥିଲେ । ଖବର ପାଇ ଠାକୁର ଗଡ଼ ପୋଲିସ ଘଟଣା ସ୍ଥଳରେ ପହଂଚିବା ପରେ ଗ୍ରାମବାସୀ ମାନେ ମଧ୍ୟାହ୍ନ ଭୋଜନ ଚାଉଳ ସହ କାରକୁ ହସ୍ତାନ୍ତର କରିଥିଲେ । ଏଥିସହ ବିଦ୍ୟାଳୟର ପ୍ରଧାନ ଶିକ୍ଷକଙ୍କୁ ମଧ୍ୟ ଠାକୁରଗଡ଼ ପୋଲିସ ଆଣି ପଚରା ଉଚରା କରିବା ସହ ଅଟକ ରଖିଛି ।
