ଶୀତ ରାତିର ଥଣ୍ଡା ପବନ । ରାଜଧାନୀର କିଟିମିଟ୍ ଅନ୍ଧାର । ସବୁ କଷ୍ଟକୁ ତିଳେମାତ୍ର ଖାତିର କରିନାହାନ୍ତି ଶିକ୍ଷକ । ନିଜ ହକ ପାଇଁ କରୁଛନ୍ତି ଆନ୍ଦୋଳନ । ପିଏମଜିର କଳା ମଚମଚ ରାସ୍ତାରେ ଶୋଇ ପ୍ରତିବାଦ ଜାରି ରଖିଛନ୍ତି ଓଡ଼ିଶା ସ୍କୁଲ୍ କଲେଜ ଶିକ୍ଷକ। ୧୯୪ ଅନୁଦାନ ଯୋଗ୍ୟ ବିଦ୍ୟାଳୟକୁ ମିଳୁନି ଅନୁଦାନ । ୩୦ ବର୍ଷରୁ ଉର୍ଦ୍ଧ୍ବ ସମୟ ଧରି ବିନା ବେତନରେ କାର୍ଯ୍ୟ କରୁଛନ୍ତି ସ୍କୁଲ କଲେଜ ଶିକ୍ଷକ ଓ ଅଧ୍ୟାପକ। ବ୍ଲକଗ୍ରାଣ୍ଟ ଶିକ୍ଷକଙ୍କୁ ଅବସରରେ ମିଳୁନି ପେନସନ୍ ଓ ମିଳୁନି ଅବସରକାଳୀନ ସୁବିଧା। ଏହି ୩ଟି ଦାବି ଶୁଣୁ ନାହାଁନ୍ତି ରାଜ୍ୟ ସରକାର। ରାସ୍ତାରେ ବସି ରାତ୍ରୀ ଭୋଜନ କରିବା ସହ ରାସ୍ତାରେ ଶୋଇ ପ୍ରତିବାଦ କରିଛନ୍ତି ଶିକ୍ଷକ। ତୁରନ୍ତ ଦାବି ପୂରଣ ନହେଲେ ଆନ୍ଦୋଳନ ତୀବ୍ରର କରିବାକୁ ଚେତାବନୀ ଦେଇଛନ୍ତି ।
ପ୍ରତିଶ୍ରୁତି ଦେଇ ପ୍ରତାରଣା କଲେ ଡବଲ୍ ଇଞ୍ଜିନି ସରକାର। ୩୦ ବର୍ଷ ତଳେ ଗାଁ ଗଣ୍ଡାରେ ତିଆରି ହୋଇଥିବା ବିଦ୍ୟାଳୟ ଶିକ୍ଷକ ଅଭାବରୁ ବନ୍ଦ ହେବ । ଗାଁ ଲୋକଙ୍କ ସ୍ବପ୍ନ ଭାଙ୍ଗିଚୁରମା ହେବ । ତେଣୁ ଗାଁ ଲୋକଙ୍କର ସ୍ବପ୍ନକୁ ସାକାର କରିବାକୁ ଲଢେଇ ଜାରି ରହିବ ବୋଲି କହିଛନ୍ତି ଶିକ୍ଷକ । ଓଡ଼ିଶାର ଅନୁଦାନ ପାଉନଥିବା ୧୯୪ ବିଦ୍ୟାଳୟରେ ଜଣେ ବା ଦୁଇ ଜଣ ଶିକ୍ଷକଙ୍କ ଦ୍ବାରା ଚାଲିଛି ପାଠପଢା । ପିଲାଙ୍କ ପାଇଁ ନାହିଁ ଖେଳ ପଡିଆ, ନାହିଁ ଭଲ ଶ୍ରେଣୀ ଗୃହ, ପିଲାଙ୍କୁ ବହି ବି ମିଳୁନି । ସରକାର ତୁରନ୍ତ ବିଦ୍ୟାଳୟ ଗୁଡ଼ିକୁ ଅନୁଦାନ ଓ ଶିକ୍ଷକମାନଙ୍କୁ ପେନସନ୍ ଦିଅନ୍ତୁ ବୋଲି ଅନୁରୋଧ କରିଛନ୍ତି ଶିକ୍ଷକ । ଶିକ୍ଷକଙ୍କ ମୁହଁରେ କେବେ ଫୁଟିବ ହସ, କେବେ ରାଜ୍ୟରେ ସଠିକ ଢଙ୍ଗରେ ଚାଲିବ ଶିକ୍ଷାଦାନ । କେବେ ସ୍କୁଲ ଗୁଳିକରେ ପୂରଣ ହେବ ଶିକ୍ଷକ ପଦ, ତାକୁ ହିଁ ଅପେକ୍ଷା ।
