ଜାମ୍ମୁ ଓ କାଶ୍ମୀରରେ ବିଭିନ୍ନ ଅଞ୍ଚଳରେ ଜୋରଦାର ସର୍ଚ୍ଚ ଅପରେସନ। ପାକିସ୍ତାନୀ ଆତଙ୍କୀମାନେ ଜାମ୍ମୁ ଓ କାଶ୍ମୀରରେ ଅନୁପ୍ରବେଶ କରିଛନ୍ତି ବୋଲି ଗୁଇନ୍ଦା ସୂଚନା ଆଧାରରେ ଏହି ଅପରେସନ କରାଯାଇଛି। ଅପରେସନରେ ସାମିଲ ହୋଇଛନ୍ତି ସେନା ଓ ଜାମ୍ମୁ ଓ କାଶ୍ମୀର ପୋଲିସ। ଜାମ୍ମୁ ଓ କାଶ୍ମୀରର ଡୋଡା ଅନ୍ତର୍ଗତ ଭାଲେସାରେ ପ୍ରବଳ ଶୀତ ସତ୍ତ୍ବେ ସର୍ଚ୍ଚ ଅପରେସନ ଜାରି ରହିଛି। ଶୀତକାଳ ଓ ବରଫପାତର ସୁଯୋଗ ନେଇ ଜାମ୍ମୁ ଓ କାଶ୍ମୀରକୁ ଆତଙ୍କୀ ଚାଲିଆସିବାର ଆଶଙ୍କା ବଢ଼ିଛି। ଅନୁପ୍ରବେଶ ରୋକିବା ଲାଗି ଗୁଲମାର୍ଗ, ଜାମ୍ମୁ ସମେତ ବିଭିନ୍ନ ସ୍ଥାନରେ ଜାରି ରହିଛି ସର୍ଚ୍ଚ ଅପରେସନ। ନିୟୋଜିତ ହୋଇଛନ୍ତି ସୀମା ସୁରକ୍ଷା ବଳ। ଯବାନମାନ ଜୀବନକୁ ବାଜି ଲଗାଇ ଚଳାଇଛନ୍ତି କମ୍ବିଂ। ତାରବାଡ଼ ଲଗାଯାଇଥିବା ଅଞ୍ଚଳ, ଘନ ବରଫ ଭରା ଅଞ୍ଚଳ, ଜଙ୍ଗଲିଆ ସ୍ଥାନରେ ଜାରି ରହିଛି କମ୍ବି। ନୂଆବର୍ଷ ଆଗରୁ ଆତଙ୍କୀମାନେ ଅନୁପ୍ରବେଶ କରିବା ଆଶଙ୍କା ରହିଥିବାରୁ ଏହି ଅପରେସନ କରାଯାଉଛି। ସେପଟେ ଆତଙ୍କବାଦୀଙ୍କ ମୁକାବିଲା ଲାଗି ଡୋଡାରେ ସ୍ଥାନୀୟ ଭିଲେଜ ଡିଫେନ୍ସ ଗାର୍ଡଙ୍କୁ ଗରିଲା ଯୁଦ୍ଧ ସମ୍ପର୍କରେ ତାଲିମ ପ୍ରଦାନ କରିଛି ସେନା। ଏଥିରେ ଶତାଧିକ ଲୋକ ସାମିଲ ହୋଇଛନ୍ତି।
