ଜମୁଛି ବିଶ୍ଵପ୍ରସିଦ୍ଧ ବରଗଡ଼ ଧନୁଯାତ୍ରା । କୃଷ୍ଣମୟ ହୋଇଛି ଗୋପପୁର । ବିଶ୍ୱପ୍ରସିଦ୍ଧ ବରଗଡ଼ ଧନୁଯାତ୍ରାର ସପ୍ତମ ଦିବସରେ ଅଭିନୀତ ହୋଇଛି ରାଧାକୃଷ୍ଣଙ୍କ ନାବକେଳି ଦୃଶ୍ୟ । କୃଷ୍ଣଙ୍କ ଲୀଳା ଦେଖିବାକୁ ମିଳିଛି । ରାଧା ଓ ଗୋପୀମାନେ ମଥୁରାରେ ଦଧି ବିକି ଗୋପପୁର ଫେରିବା ବାଟରେ ଯମୁନା ପାରି ହୋଇ ଆସିଲା ବେଳକୁ କୃଷ୍ଣ ନାଉଁରିଆ ବେଶରେ ଜଗି ରହିଥିଲେ । ତା ପରେ ଅନୁଷ୍ଠିତ ହୋଇଥିଲା ରାଧାକୃଷ୍ଣଙ୍କ ନାବକେଳି । ସପ୍ତମ ଦିନରେ ଏହି ମନୋରମ ଦୃଶ୍ୟ ସ୍ଥାନୀୟ ମନାବନ୍ଧରେ ଅନୁଷ୍ଠିତ ହୋଇଥିଲା । ଯାହାକୁ ଦେଖି ରାଧାକୃଷ୍ଣଙ୍କ ପ୍ରେମରେ ବିଭୋର ହୋଇପଡିଥିଲେ ହଜାର ହଜାର ଶ୍ରଦ୍ଧାଳୁ । ଏପଟେ ମଥୁରାରେ କୃଷ୍ଣ ବଳରାମଙ୍କୁ ହତ୍ୟା କରିବା ପାଇଁ ମହାରାଜ କଂସ ଆୟୋଜନ କରିଛନ୍ତି ଛଳନାର ଯାତ୍ରା ଧନୁଯାତ୍ରା । ଦୁଇ ଭାଇଙ୍କୁ ଧନୁଯାତ୍ରା ପାଇଁ ନିମନ୍ତ୍ରଣ କରିବାକୁ ମହାମନ୍ତ୍ରୀ ଅକୃରଙ୍କୁ ଗୋପପୁରକୁ ପଠାଇଛନ୍ତି । ଚିଟାଉ ଦେଇ ପଠାଇଛନ୍ତି ମହାରାଜ କଂସ । ଆଜି ଯାତ୍ରାର ଅଷ୍ଟମ ଦିବସରେ ଅଭିନୀତ ହେବ ମହାରାଜ କଂସଙ୍କ ନଗରଭ୍ରମଣ । ଇନ୍ଦ୍ରଙ୍କ ସହ ଯୁଦ୍ଧ ଓ ବନ୍ଦୀ, ଯମପୁର ଆକ୍ରମଣ । ଅକ୍ରୁରଙ୍କ ଗୋପପୁର ଗମନ ଓ ଯମୁନା ବାଲିରେ କୃଷ୍ଣପାଦ ଦର୍ଶନ, କୃଷ୍ଣ ବଳରାମ ସହ ଅକ୍ରୁରଙ୍କ ସାକ୍ଷାତ, ଶ୍ରୀକୃଷ୍ଣଙ୍କ ଗିରି ଗୋବର୍ଦ୍ଧନ ଧାରଣ ଦୃଶ୍ୟ ଅଭୀନିତ ହେବ ।
