ନନ୍ଦିଘୋଷ ବ୍ୟୁରୋ : ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ କର୍ମନିଯୁକ୍ତି ଗ୍ୟାରେଣ୍ଟି ଯୋଜନା ବା MGNREGA ପ୍ରସଙ୍ଗରେ ଆଜିଠାରୁ ଦେଶବ୍ୟାପୀ ଆନ୍ଦୋଳନ କରିବ କଂଗ୍ରେସ। ଦଳ ପକ୍ଷରୁ ପାଳନ କରାଯିବ MGNREGA ବଚାଓ ଆନ୍ଦୋଳନ। MGNREGA ବଦଳରେ ବିକଶିତ ଭାରତ ଗ୍ରାମୀଣ ଜୀବିକା ମିଶନ ବା VB–G RAM G କେନ୍ଦ୍ର ସରକାର ପ୍ରବର୍ତ୍ତନ କରିଥିବାରୁ ଦେଶବାସୀଙ୍କ ନିକଟକୁ ଯିବ କଂଗ୍ରେସ। କଂଗ୍ରେସ କାର୍ଯ୍ୟକାରୀ ବୈଠକରେ ଏନେଇ ନିଆଯାଇଥିଲା ନିଷ୍ପତ୍ତି। MGNREGA ପ୍ରସଙ୍ଗରେ ବିରୋଧୀ ଦଳ ନେତା ରାହୁଲ ଗାନ୍ଧୀ କହିଥିଲେ- କେନ୍ଦ୍ର ସରକାର ସଂଘୀୟ ବ୍ୟବସ୍ଥା ଉପରେ ହମଲା କରିବା ସହ କର୍ପୋରେଟ ଜଗତର ସ୍ବାର୍ଥ ଲାଗି ସରକାର କାମ କରୁଛନ୍ତି। ଗତ ଶୀତକାଳୀନ ଅଧିବେଶନ କାଳରେ MGNREGAକୁ ହଟାଇ କେନ୍ଦ୍ର ସରକାର ଆଣିଥିଲେ VB–G RAM G। ଏହାକୁ ନେଇ ଏବେ ବି ବିଭିନ୍ନ ରାଜ୍ୟରେ କଂଗ୍ରେସ ପକ୍ଷରୁ ବିରୋଧ ପ୍ରଦର୍ଶନ କରାଯାଉଛି। ନୂଆ ବ୍ୟବସ୍ଥାରେ ବାର୍ଷିକ ୧୨୫ ଦିନର କାମ ସୁଯୋଗ ଥିଲେ ବି ଏହି ଆଇନ ଜରିଆରେ ବାପୁଙ୍କ ନାମକୁ ହଟାଇବା ଲାଗି ଷଡ଼ଯନ୍ତ୍ର କରାଯାଇଛି ବୋଲି ଅଭିଯୋଗ କରିଛି କଂଗ୍ରେସ।
