ପହରିଆ ସଂପ୍ରଦାୟର ଆଦିମ ଜନଜାତିଙ୍କୁ ମିଳୁନି ଜଙ୍ଗଲ ଜମି ପଟ୍ଟା, ଆନ୍ଦୋଳନ ଚେତାବନୀ
ନନ୍ଦିଘୋଷ ବ୍ୟୁରୋ: ଜଙ୍ଗଲ ଜମି ଅଧିକାର ଆଇନର ହେଉଛି ଅବମାନନା । ଦୀର୍ଘ ଦଶନ୍ଧି ଧରି ଜଙ୍ଗଲରେ ବସବାସ କରୁଥିବା ପହରିଆ ସଂପ୍ରଦାୟର ଆଦିମ ଜନଜାତିଙ୍କୁ ମିଳୁନି ଜଙ୍ଗଲ ଜମି ପଟ୍ଟା । ଫଳରେ ସରକାରୀ ସୁବିଧା ସୁଯୋଗରୁ ବଞ୍ଚିତ ରହୁଛନ୍ତି ଆଦିବାସୀ । ଅଭିଯୋଗ ସତ୍ତ୍ବେ ପ୍ରଶାସନ ଦୃଷ୍ଟି ଦେଉ ନଥିବାରୁ ଆନ୍ଦୋଳନ ଚେତାବନୀ ଦେଲେଣି ଆଦିବାସୀ ନେତା ।
ସଙ୍କଟରେ ପହରିଆ ସଂପ୍ରଦାୟର ଆଦିମ ଜନଜାତି । ଜଙ୍ଗଲ ଜମି ପଟ୍ଟା ନଥିବାରୁ ମିଳୁନି ଆଦିବାସୀ ମାନ୍ୟତା । ପାଉନାହାନ୍ତି ମୌଳିକ ସୁବିଧା ସୁଯୋଗ । ନୂଆପଡା ଜିଲ୍ଲାର ସୁନାବେଡ଼ା ଅଭୟାରଣ୍ୟ ଶହ ପାଟଧାରାର ଜଙ୍ଗଲ ଅଞ୍ଚଳରେ କାହିଁ କେଉଁ କାଳରୁ ରହି ଆସୁଛନ୍ତି ଏହି ପହରିଆ ସଂପ୍ରଦାୟ ଲୋକେ । ଜଙ୍ଗଲରୁ ବନଜାତ ଦ୍ରବ୍ୟ ସହ ବାଉଁଶରୁ ବିଭିନ୍ନ ଘରକରଣା ସାମଗ୍ରୀ ତିଆରି କରି ଜୀବିକା ନିର୍ବାହ କରିଥାନ୍ତି । କିନ୍ତୁ ବର୍ତ୍ତମାନ ବଜାରରେ ବାଉଁଶ ତିଆରି ସାମଗ୍ରୀର ଚାହିଦା କମିବାରୁ ଏମାନଙ୍କ ଜୀବିକା ସଙ୍କଟରେ ପଡିଛି ।
ଜଙ୍ଗଲ ଜମି ପଟ୍ଟା ପାଇଁ ଏହି ଜନଜାତି ବନ ବିଭାଗ ସହ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରି ଆସୁଥିଲେ ସୁଦ୍ଧା କେହି ଦୃଷ୍ଟି ଦେଉନାହାନ୍ତି । ଫଳରେ ସରକାରୀ ଯୋଜନାରୁ ବଞ୍ଚିତ ହୋଇ ଏମାନେ ଦୁର୍ଦ୍ଦିନରେ କାଳ କାଟୁଛନ୍ତି । ଏମାନଙ୍କୁ ଶୀଘ୍ର ସରକାରୀ ସହାୟତା ସହ ସମସ୍ତ ଯୋଜନାରେ ସାମିଲ କରିବାକୁ ଆଦିବାସୀ ସଂଘ ଦାବି କରିଛି । ପହରିଆ ଜନଜାତିଙ୍କ ସମସ୍ୟା ପ୍ରତି ପ୍ରଶାସନ ଦୃଷ୍ଟି ନଦେଲେ ଜନଜାତି ଆନ୍ଦୋଳନକୁ ଓହ୍ଲାଇବ ବୋଲି ଆଦିବାସୀ ନେତା ଚେତାଇ ଦେଇଛନ୍ତି ।
