ଭଦ୍ରକ : ପୁଣି ଯୌତୁକ ଜୁଇରେ ଆଉ ଜଣେ ନବବଧୂ। ବିବାହ ପରେ ଅଧିକ ଯୌତୁକ ନଦେବାରୁ ନବବଧୂକୁ ହତ୍ୟା ଅଭିଯୋଗ । ଭଦ୍ରକ ଆଗରପଡା ଥାନା ଓଲଡାଙ୍ଗ ଗାଁରୁ ସଙ୍ଗୀନ ଅଭିଯୋଗ ଆସିଛି । ଗାଁର ଜ୍ୟୋତିରଞ୍ଜନ ପଣ୍ଡାଙ୍କୁ ଭଦ୍ରକ ବାଲୁଅଶାସନ ଗାଁର ସୁଭଦ୍ରା ପଣ୍ଡା ଗତ ମେ ମାସରେ ବୈଦିକ ରୀତିରେ ବିବାହ କରିଥିଲେ । ତେବେ ବିବାହ ପରେ ସ୍ୱାମୀ, ଶ୍ୱଶୁର ଘର ଲୋକେ ଯୌତୁକ ଦାବି କରି ଶାରୀରିକ ଓ ମାନସିକ ନିର୍ଯାତନା ଦେଉଥିବା ଅଭିଯୋଗ ହୋଇଛି ।
ଗତକାଲି ସୁଭଦ୍ରାଙ୍କ ମୃତ୍ୟୁ ହୋଇଥିବାବେଳେ ମୃତଦେହକୁ ଛାଡ଼ି ଫେରାର ହୋଇଯାଇଛନ୍ତି ସ୍ୱାମୀ ଓ ଶ୍ବଶୁର ଘର ଲୋକେ। ଖବର ପାଇ ବାପଘର ଲୋକେ ପହଞ୍ଚି ସୁଭଦ୍ରାଙ୍କ ବେକରେ ଦାଗ ଥିବା ଦେଖିବାକୁ ପାଇଥିଲେ। ଏନେଇ ଆଗରପଡ଼ା ଥାନାରେ ଅଭିଯୋଗ ପରେ ପୋଲିସ ମୃତଦେହ ଉଦ୍ଧାର କରି ବ୍ୟବଛେଦ ପାଇଁ ପଠାଇଛି। ଶାଶୁକୁ ଥାନାରେ ଅଟକ ରଖି ଅନ୍ୟମାନଙ୍କୁ ଖୋଜାଖୋଜି ଆରମ୍ଭ କରିଛି ପୋଲିସ।
