ରାହୁଲ ଗାନ୍ଧିଙ୍କୁ କାହିଁକି ଡରୁଛନ୍ତି କେନ୍ଦ୍ର ସରକାର। କାହିଁକି ତାଙ୍କୁ ଗୃହ ଭିତରେ କହିବାକୁ ସୁଯୋଗ ଦେଉ ନାହାନ୍ତି ଶାସକ ଦଳ। ଏହାତ ଗଣତନ୍ତ୍ରର ହତ୍ୟା। ଏପରି କଡ଼ା ଭାଷାରେ ଆଜି ରାଜ୍ୟସଭାରେ ବର୍ଷିଛନ୍ତି ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡ଼ଗେ। ଗତକାଲି ଲୋକସଭାରେ ହୋଇଥିବା ହଙ୍ଗାମା ପ୍ରସଙ୍ଗ ଉଠାଇ ସେ କହିଥିଲେ। ଏହାର ଉତ୍ତରରେ ଜେପି ନଡ୍ଡା କହିଛନ୍ତି, ଲୋକସଭାର କଥା ରାଜ୍ୟସଭାରେ ଉଠାଇବା ଠିକ ନୁହେଁ। ନିଜ ବକ୍ତବ୍ୟ ରଖିବା ପାଇଁ ବାଚସ୍ପତି ରାହୁଲ ଗାନ୍ଧିଙ୍କୁ ସୁଯୋଗ ଦେଇଥିଲେ ବୋଲି ସେ ସଫେଇ ଦେଇଛନ୍ତି। କିନ୍ତୁ ନିୟମ ବାହାରେ ନିଜ ବକ୍ତବ୍ୟ ରଖିବାକୁ ଚାହୁଁଥିଲେ। ନିୟମ ଭିତରେ ହିଁ ଗୃହ ଚାଲିବା ଉଚିତ ବୋଲି କହିଛନ୍ତି ନଡ୍ଡା।
ସେପଟେ ଆଜି ମଧ୍ୟ ସଂସଦ ପରିସରରେ ବିରୋଧୀଙ୍କ ପ୍ରତିବାଦ ହୋଇଥିଲା। ୮ ସାଂସଦଙ୍କ ନିଲମ୍ବନ ପ୍ରତିବାଦରେ ଧାରଣା ଦେଇଥିଲେ ବିରୋଧୀ। ଗତକାଲି ବିରୋଧୀ ସାଂସଦଙ୍କ ହଟ୍ଟଗୋଳ ଯୋଗୁଁ ରାଷ୍ଟ୍ରପତିଙ୍କ ଅଭିଭାଷଣର ଧନ୍ୟବାଦ ପ୍ରସ୍ତାବ ଉପରେ ପ୍ରଧାନମନ୍ତ୍ରୀ ଉତ୍ତର ରଖିପାରିନଥିଲେ। ଗୃହର ମଧ୍ୟଭାଗରେ ବିରୋଧୀ ମହିଳା ସାଂସଦ ହଙ୍ଗାମା କରିଥିଲେ। ଆଜି ପ୍ରଧାନମନ୍ତ୍ରୀ ରାଜ୍ୟସଭାରେ ଉତ୍ତର ରଖିବାର ସମ୍ଭାବନା ଅଛି। ପ୍ରଧାନମନ୍ତ୍ରୀ ଉତ୍ତର ରଖିବା ବେଳେ ବିରୋଧୀ ପ୍ରତିବାଦ କରିବେ ବୋଲି ଜଣାପଡ଼ିଛି। ଆଜି ଲୋକସଭାର କାର୍ଯ୍ୟ ଆଦୌ ଚାଲିପାରିନଥିଲା। ଗୃହକୁ ଆସୁ ଆସୁ ଏହାକୁ ୧୨ଟା ଯାଏ ମୁଲତବୀ କରିଥିଲେ ବାଚସ୍ପତି। ପରେ ଗୃହରେ ରାଷ୍ଟ୍ରପତିଙ୍କ ଅଭିଭାଷଣ ପାସ୍ ହୋଇଛି। ସେପଟେ ଆଜି ଅପରାହ୍ନ ୫ଟାରେ ପ୍ରଧାନମନ୍ତ୍ରୀ ରାଜ୍ୟସଭାରେ ଅଭିଭାଷଣ ଦେବେ ବୋଲି ଜଣାପଡ଼ିଛି।
