ଋଷର ହଷ୍ଟେଲରେ ଆଖିବୁଜା ଛୁରା ମାଡ଼ ଘଟଣାରେ ୪ ଭାରତୀୟ ଛାତ୍ର ଆହତ
ନନ୍ଦିଘୋଷ ବ୍ୟୁରୋ: ଋଷର ବାସକୋର୍ତ୍ତୋସ୍ତାନରେ ଅଭାବନୀୟ ଘଟଣା l ଏକ ହଷ୍ଟେଲରେ ଘଟିଥିବା ଆଖିବୁଜା ଛୁରାମାଡ଼ ଘଟଣାରେ ୪ ଭାରତୀୟ ଛାତ୍ରଙ୍କ ସମେତ ଏକାଧିକ ଆହତ । ଏନେଇ ମସ୍କୋସ୍ଥିତ ଭାରତୀୟ ଦୂତାବାସ ପକ୍ଷରୁ ଦିଆଗଲା ସୂଚନା । ଦୁର୍ବୃତ୍ତଙ୍କ ଆକ୍ରମଣରେ ଦୁଇ ପୋଲିସ କର୍ମୀ ବି ଆହତ ହୋଇଥିବା ଜଣାପଡିଛି ।
ବାସକୋର୍ତ୍ତୋସ୍ତାନର ରାଜଧାନୀ ଉଫାସ୍ଥିତ ଷ୍ଟେଟ ମେଡିକାଲ ୟୁନିଭର୍ସିଟିରେ ଏହି କାଣ୍ଡ ଘଟିଛି l ମେଡିକାଲ ୟୁନିଭର୍ସିଟି ହଷ୍ଟେଲରେ ପ୍ରବେଶ କରି ଜଣେ ୧୫ ବର୍ଷ ନାବାଳକ ଛାତ୍ର ଓ ପୋଲିସ ଉପରେ ଆକ୍ରମଣ କରିଥିଲା ବୋଲି କହିଛନ୍ତି ଋଷର ସ୍ବରାଷ୍ଟ୍ର ମନ୍ତ୍ରୀ l ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି l ଛୁରାମାଡ଼ର କାରଣ ଜଣାପଡ଼ି ନଥିବାବେଳେ ଘଟଣାର ତଦନ୍ତ କରୁଛି ତଦନ୍ତକାରୀ କମିଟି l ଘଟଣାକୁ ନିନ୍ଦା କରିଛି ମସ୍କୋସ୍ଥିତ ଭାରତୀୟ ଦୂତାବାସ l ଉଫାକୁ କାଜାନସ୍ଥିତ ଭାରତୀୟ କନସୁଲେଟ ପକ୍ଷରୁ ଏକ ଟିମ ଗସ୍ତ କରିଛନ୍ତି l ତେବେ ଏକ ନିଷିଦ୍ଧ ଘୋଷିତ ନବ୍ୟନାଜିବାଦୀ ସଂଗଠନ ଏନଏସଡବ୍ଲୁପି ପକ୍ଷରୁ ଏହି ଛୁରାମାଡ଼ ଘଟିଛି ବୋଲି ସୂଚନା ମିଳିଛି l ଆହତମାନଙ୍କ ରକ୍ତରେ ଆକ୍ରମଣକାରୀ ଜଣକ କାନ୍ଥରେ ସ୍ବସ୍ତିକ ଚିହ୍ନ ଆଙ୍କିଥିବା କୁହାଯାଇଛି l ଭାରତୀୟ ମେଡିକାଲ ଓ ଇଞ୍ଜିନିୟରିଂ ଛାତ୍ରଙ୍କ ହବ୍ ହେଉଛି ଉଫା l
