ନନ୍ଦିଘୋଷ ବ୍ୟୁରୋ : ଗଞ୍ଜାମ ଜିଲ୍ଲା ଭଞ୍ଜନଗର ଥାନା ସାରଦୋଳ ଗାଁରେ ଅଭାବନୀୟ ଘଟଣା । ଚୋରି ସନ୍ଦେହରେ ଜଣକୁ ପିଟି ପିଟି ହତ୍ଯା ଅଭିଯୋଗ । ମୃତକ କନ୍ଧମାଳ ଜିଲ୍ଲା କୁରୁମୁଙ୍ଗିଆ ଗାଁର ବାନଧର ପ୍ରଧାନ ବୋଲି ଜଣାପଡିଛି l ଗତରାତିରେ ଅଭିଯୁକ୍ତ ଜଣଙ୍କ ସାରଦୋଳ ଗାଁରେ ଜଣଙ୍କ ଘରେ ପଶିଥିବା ବେଳେ ଅନ୍ୟ ଜଣେ ବାହାରେ ଅପେକ୍ଷା କରିଥିଲେ । କୌଣସି କାରଣରୁ ଲୋକ ଚୋର ପଶିଥିବା ଜାଣି ପାରିଥିଲେ । ଏବଂ ଦୁହିଁଙ୍କୁ ଧରିବାକୁ ଚେଷ୍ଟା କରିଥିଲେ । ଜଣେ ଲୋକଙ୍କ ହାବୁଡ଼ରେ ପଡିଥିବା ବେଳେ ଅନ୍ୟ ଜଣଙ୍କ ଖସି ପଳାଇଥିଲେ । ସ୍ଥାନୀୟ ଲୋକ କାବୁ କରିଥିବା ଅଭିଯୁକ୍ତକୁ ନିର୍ଧୁମ ପିଟିଥିଲେ । ଖବର ପାଇ ଭଞ୍ଜନଗର ପୋଲିସ ଘଟଣା ସ୍ଥଳରେ ପହଞ୍ଚି ଅଭିଯୁକ୍ତକୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ସେଠାରେ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି । ଘଟଣାର ପୋଲିସ ଅଧିକ ତଦନ୍ତ କରୁଛି ।
