ନନ୍ଦିଘୋଷ ବ୍ୟୁରୋ : ଚଳିତ ବର୍ଷ ମାଟ୍ରିକ ପରୀକ୍ଷାକୁ ରହିଲା ମାତ୍ର ଦୁଇ ଦିନ । ହେଲେ କିଭଳି ପରୀକ୍ଷା ଦେବେ ଦିବ୍ୟାଙ୍ଗ ଛାତ୍ର ? ତାଙ୍କ ପାଇଁ ପରୀକ୍ଷା ଖାତାରେ କିଏ ଲେଖିବେ ଉତ୍ତର ? ତାହା ଏଯାଏଁ ସ୍ପଷ୍ଟ କରିନାହାନ୍ତି ବୋର୍ଡ କର୍ତ୍ତୃପକ୍ଷ । ଯାହାକୁ ନେଇ ଗଞ୍ଜାମ ସାନଖେମୁଣ୍ଡି ବ୍ଲକ ଖଲିଙ୍ଗିରେ ଅଭିଭାବକ ମହଲରେ ତୀବ୍ର ଅସନ୍ତୋଷ ଦେଖାଦେଇଛି ।
ଦୁଇ ଦିନ ପରେ ମାଟ୍ରିକ ପରୀକ୍ଷା । ହେଲେ ଏଯାଏଁ ସ୍ଥିର ହୋଇନାହିଁ ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ଲେଖିବା ପାଇଁ ବିକଳ୍ପ ବ୍ୟବସ୍ଥା । ନିଘୋଡ଼ ନିଦ୍ରାରେ ଶିକ୍ଷା ବିଭାଗ । ଗଞ୍ଜାମ ସାନଖେମୁଣ୍ଡି ବ୍ଲକ ଖଲିଙ୍ଗିରୁ ଆସିଛି ସଙ୍ଗୀନ ଅଭିଯୋଗ । ଇଏ ହେଉଛନ୍ତି ଖଲିଙ୍ଗି ହାଇସ୍କୁଲର ଦଶମ ଶ୍ରେଣୀ ଛାତ୍ର ଗୌତମ ମହାନ୍ତି । ଯିଏ କି ଜନ୍ମରୁ ଦିବ୍ୟାଙ୍ଗ । ନା ସେ ଠିକ ସେ ଖାଇ ପାରୁଛନ୍ତି ନା ଲେଖି ପାରୁଛନ୍ତି । ଏପରିକି ସାର୍ଟ ପ୍ୟାଣ୍ଟ ବି ନିଜେ ପିନ୍ଧି ପାରୁନାହାନ୍ତି । ସେ ଯାହାବି ଲେଖନ୍ତି କେବଳ ସେ ହିଁ ବୁଝିପାରିବେ । ସ୍ୱାସ୍ଥ୍ୟ ବିଭାଗ ପକ୍ଷରୁ ଗୌତମଙ୍କୁ ୫୦ ପ୍ରତିଶତ ଭିନ୍ନକ୍ଷମ ସାର୍ଟିଫିକେଟ ମିଳିଛି । ହେଲେ ଏଯାଏଁ ଗୌତମଙ୍କ ପାଇଁ ପରୀକ୍ଷାରେ କିଏ ଲେଖିବେ ତାହା ସ୍ପଷ୍ଟ ହୋଇନାହିଁ । ଯାହାକୁ ନେଇ ଚିନ୍ତାରେ ପରିବାର ।
ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ପାଇଁ ସରକାରଙ୍କ ଅନେକ ଯୋଜନା ରହିଛି । ମାଟ୍ରିକ ବୋର୍ଡ ପରୀକ୍ଷା ପୂର୍ବରୁ ଯେଉଁ ସ୍କୁଲରେ ଦିବ୍ୟାଙ୍ଗ ଛାତ୍ରଛାତ୍ରୀ ଥିବେ ବିଦ୍ୟାଳୟ କର୍ତ୍ତୃପକ୍ଷ ସେହି ଛାତ୍ରଛାତ୍ରୀଙ୍କ ପାଇଁ ଜଣେ ନବମ ଶ୍ରେଣୀ ଛାତ୍ର ସ୍ଥିର କରି ବୋର୍ଡ କର୍ତ୍ତୃପକ୍ଷଙ୍କୁ ଜଣାଇଥାନ୍ତି । ବୋର୍ଡ କର୍ତ୍ତୃପକ୍ଷ ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ସାର୍ଟିଫିକେଟ ଯାଞ୍ଚ କରି ନବମ ଶ୍ରେଣୀ ଛାତ୍ରଙ୍କୁ ସ୍ଵୀକୃତି ଦିଅନ୍ତି । କିନ୍ତୁ ୧୯ ତାରିଖରେ ମାଟ୍ରିକ ପରୀକ୍ଷା ଥିଲେ ସୁଦ୍ଧା ଗୌତମଙ୍କ ପାଇଁ କିଏ ଉତ୍ତର ଲେଖିବେ ତାହା ବିଦ୍ୟାଳୟ ତରଫରୁ ସ୍ପଷ୍ଟ ହୋଇନାହିଁ । ଅନ୍ୟପଟେ ବୋର୍ଡକୁ ଲେଖି ଦେଇଛୁ ବୋଲି କହିଛନ୍ତି ଖଲିଙ୍ଗି ସ୍କୁଲର ପ୍ରଧାନ ଶିକ୍ଷୟିତ୍ରୀ ।
