ନନ୍ଦିଘୋଷ ବ୍ୟୁରୋ: ମଧ୍ୟପ୍ରାଚ୍ୟରେ ନିଜର ସାମରିକ କାୟା ବିସ୍ତାର କଲା ଆମେରିକା। ମୁତୟନ କରିଛି ୫୦ରୁ ଅଧିକ ଫାଇଟର ଜେଟ। ଗତ ୨୪ ଘଣ୍ଟା ଭିତରେ ଆମେରିକା ଦେଖାଇଛି ଦମ୍ । ଇରାନର ଆଣବିକ କାର୍ଯ୍ୟକ୍ରମ ପ୍ରସଙ୍ଗରେ କଥାବାର୍ତ୍ତା ଲାଗି ଚାପ ସୃଷ୍ଟି କରିବା ପାଇଁ ଆମେରିକା ଏହି ପଦକ୍ଷେପ ନେଇଛି । ମଧ୍ୟପ୍ରାଚ୍ୟରେ ଆମେରିକା ମୁତୟନ କରିଛି ବାୟୁସେନା ଓ ନୌସେନାର ବହୁ ଯୁଦ୍ଧଜାହାଜ ଓ ବିମାନ । ପଠାଇଥିବା ଯୁଦ୍ଧ ବିମାନରେ ରହିଛି- F-22, F-35 ଓ F-16 ଫାଇଟର ଜେଟ। ଏହା ସହ ଏରିଆଲ ରିଫୁଏଲ ଟ୍ୟାଙ୍କର ବି ପଠାଯାଇଛି ।
ଜେନେଭାରେ ଆମେରିକା ଓ ଇରାନ ମଧ୍ଯରେ ଦ୍ବିତୀୟ ରାଉଣ୍ଡ ଆଲୋଚନା ପରେ ପରେ ଆମେରିକା ଏହି ପଦକ୍ଷେପ ନେଇଛି । ସେପଟେ ବର୍ତ୍ତମାନ ମଧ୍ୟ-ଆଟଲାଣ୍ଟିକ ମହାସାଗରରେ ମୁତୟନ ରହିଛି ୟୁଏସଏସ ଗେରାଲଡ ଆର. ଫୋର୍ଡ ଯୁଦ୍ଧ ଜାହାଜ । ଗେରାଲଡ ଫୋର୍ଡ ସହ ରହିଛନ୍ତି ୩ଟି ଗାଇଡେଡ ମିସାଇଲ ଡେଷ୍ଟ୍ରୟର- ୟୁଏସଏସ ମହାନ, ୟୁଏସଏସ ବେନବ୍ରିଜ ଓ ୟୁଏସଏସ ଉଇନସନ ଚର୍ଚ୍ଚିଲ । ପୂର୍ବରୁ ମୁତୟନ ରହିଛି ୟୁଏସଏସ ଆବ୍ରାହମ ଲିଙ୍କନ ଯୁଦ୍ଧ ଜାହାଜ । ସେପଟେ ଆମେରିକା ଉପରାଷ୍ଟ୍ରପତି ଜେ.ଡି. ଭାନ୍ସ କହିଛନ୍ତି- ଜେନେଭାରେ ଅନୁଷ୍ଠିତ ଆଣବିକ ସଂକ୍ରାନ୍ତ କଥାବାର୍ତ୍ତାରେ ବିଶେଷ ଫଳବତୀ ହୋଇନାହିଁ।
