ସୁବର୍ଣ୍ଣପୁରରେ ଆଣ୍ଠେଇ ପଡ଼ିଲାଣି ସ୍ଵାସ୍ଥ୍ୟ ବ୍ୟବସ୍ଥା । ଜିଲ୍ଲା ମୁଖ୍ୟ ଚିକିତ୍ସାଳୟରେ ନାହାନ୍ତି ଆବଶ୍ୟକୀୟ ଡାକ୍ତର । ପାଲଟିଛି ରେଫରାଲ ସେଣ୍ଟର ।… ରୋଗୀଙ୍କ ସୁବିଧା ପାଇଁ କୋଟି କୋଟି ଟଙ୍କା ବ୍ୟୟରେ ତିଆରି ହୋଇଥିଲା ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟ । ମେଡିକାଲ ଉପରେ ସୁବର୍ଣ୍ଣପୁର ଜିଲ୍ଲା ସହ ବୌଦ୍ଧ ଓ ବରଗଡ ଜିଲ୍ଲାର ଅନେକ ରୋଗୀ ନିର୍ଭର କରିଥାନ୍ତି । ହେଲେ ମେଡିକାଲରେ ଆବଶ୍ୟକୀୟ ଡାକ୍ତର ନଥିବାରୁ ରୋଗୀ ମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ସାଧାରଣ ରୋଗୀଙ୍କୁ ବୁର୍ଲା ଓ ବଲାଙ୍ଗୀର ଡାକ୍ତରଖାନାକୁ ରେଫର କରିଦିଆଯାଉଛି ।
ଜିଲ୍ଲା ମୁଖ୍ୟ ଚିକିତ୍ସାଳୟରେ ଥିବା କିଛି ଲାଭଖୋର ମନୋବୃତ୍ତିର ଡାକ୍ତରଙ୍କ ପାଇଁ ହଇରାଣ ହେଉଛନ୍ତି ରୋଗୀ । ଏମର୍ଜେନସିରେ ବସିଥିବା ଡାକ୍ତର ରୋଗୀଙ୍କୁ ସେବା ନଦେଇ ପରଦିନ ଦିନ ୯ ଟାରେ ଡାକ୍ତର ଆସିଲେ ଚିକିତ୍ସା କରିବେ ବୋଲି କହି ଚୁପ ବସିପଡୁଛନ୍ତି । ଆଉ ଏପଟେ ରୋଗୀ ଯନ୍ତ୍ରଣାରେ ଛଟପଟ ହେଉଛନ୍ତି । ରୋଗୀଙ୍କ ସଂପର୍କୀୟ ଅଭିଯୋଗ କଲେ ଡାକ୍ତର ଚିକିତ୍ସା ନକରିବାକୁ ଧମକ ଦେଉଥିବା ଅଭିଯୋଗ ହୋଇଛି । ଅନ୍ୟପଟେ ଆମ ପାଖରେ ଅଭିଯୋଗ ନାହିଁ । ତଦନ୍ତ ପରେ କାର୍ଯ୍ୟାନୁଷ୍ଠାନ ନେବୁ ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ । ଗୁରୁତର ରୋଗୀଙ୍କୁ ଡାକ୍ତର ଚିକିତ୍ସା କରୁନାହାନ୍ତି କାହିଁକି ? ମନମାନି କରୁଥିବା ଡାକ୍ତରଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ନିଆଯାଉଛି ? ତାକୁ ହିଁ ଅପେକ୍ଷା ।
